អាហារ ៣ប្រភេទដែលអាចកាត់បន្ថយអ្នកពីហានិភ័យជំងឺបេះដូង ដោយមិនចាំបាច់ប្រើប្រាស់ថ្នាំពេទ្យបាន
មានមនុស្សជាច្រើនកំពុងតែប្រឈមមុខនឹងហានិភ័យពីជំងឺបេះដូង។ វាជារឿងដ៏សំខាន់ដែលពួកយើងគួរតែយកចិត្តទុកដាក់ទៅលើអាហារដែលយើងតែងបរិភោគជាប្រចាំថ្ងៃ។ ប៉ុន្តែមានអាហារមួយចំនួនដែលអាចកាត់បន្ថយជាតិកូឡេស្តេរ៉ុល និងបញ្ចៀសអ្នកពីហានិភ័យនៃជំងឺបេះដូងនេះបាន ដោយមិនចាំបាច់ត្រូវការថ្នាំពេទ្យនោះឡើយ។
១) គ្រាប់ធញ្ញជាតិ៖ បើនិយាយពីអត្ថប្រយោជន៍ចំពោះសុខភាព គ្រាប់ធញ្ញជាតិមានគុណសម្បត្តិច្រើនរាប់មិនអស់ ជាពិសេសគឺជាអាស៊ីដខ្លាញ់អូមេហ្កា៣ដែលសម្បូរនៅក្នុងគ្រាប់ធញ្ញជាតិភាគច្រើន បានដើរតួយ៉ាងសំខាន់សម្រាប់សុខភាពបេះដូងរបស់អ្នក។ រដ្ឋបាលចំណីអាហារនិងឱសថរបស់អាមេរិក បានណែនាំឲ្យទទួលទានគ្រាប់ធញ្ញជាតិឲ្យបានចំនួន១អោនស៍ ឬប្រហាក់ប្រហែលនឹង២៨ក្រាមជារៀងរាល់ថ្ងៃ អាចជួយកាត់បន្ថយជាតិកូឡេស្តេរ៉ុលនិងហានិភ័យពីជំងឺបេះដូងផងដែរ។
២) ផ្លែអាវ៉ូកាដូ៖ ផ្លែអាវ៉ូកាដូគឺជាប្រភេទផ្លែឈើម្យ៉ាងដែលមិនត្រឹមតែផ្ដល់ថាមពលដល់អ្នកប៉ុណ្ណោះទេ តែថែមទាំងសម្បូរទៅដោយគុណប្រយោជន៍ចំពោះសុខភាពអ្នកផងដែរ។ ផ្លែឈើនេះសម្បូរដោយអាស៊ីដខ្លាញ់ ប៉ុន្តែគឺជាអាស៊ីដខ្លាញ់ដែលល្អចំពោះសុខភាពរបស់អ្នក។ នៅពេលអ្នកបានទទួលទានវា វានឹងជួយបង្កើនកម្រិតអាស៊ីដខ្លាញ់ដែលចាំបាច់សម្រាប់រាងកាយរបស់អ្នក និងកាត់បន្ថយនូវកម្រិតអាស៊ីដខ្លាញ់ទាំងឡាយដែលមិនល្អវិញ។ ក្រៅពីនេះអាវ៉ូកាដូក៏សម្បូរដោយប៉ូតាស្យូម ជាតិសរសៃ អាស៊ីដហ្វូលិក (ដែលស្ថិតក្នុងចំណោមវីតាមីនBមួយប្រភេទ និងចាំបាច់សម្រាប់រាងកាយរបស់អ្នកក្នុងការផលិតនិងថែទាំកោសិកាថ្មីៗ) រួមទាំងវីតាមីនC វីតាមីនK និងវីតាមីនB6។
៣) ចៀសវាងអាហារស្រាប់ៗច្រកក្នុងកំប៉ុង៖ អាហារស្រាប់ៗប្រើប្រាស់ប្រភេទអាស៊ីដខ្លាញ់ដែលមិនល្អដើម្បីអាចរក្សាទុកអាហារឲ្យបានយូរ។ អាស៊ីដខ្លាញ់ប្រភេទនោះឯងដែលជាដើមហេតុនៃការកើតជំងឺបេះដូង។ ផ្ទុយទៅវិញអ្នកគួរងាកមកទទួលទានប្រភេទអាស៊ីដខ្លាញ់ល្អដូចមាននៅក្នុងស៊ុត និងបញ្ចូលនូវអាហារសាច់សត្វបន្តិចបន្តួចក្នុង១សប្ដាហ៍ ព្រមទាំងកាត់បន្ថយការទទួលទានអាហារដែលសម្បូរជាតិផ្អែម នោះទើបជាការប្រសើរ៕
