តើការច្រាល់ជាតិអាស៊ីដក្នុងក្រពះកើតឡើងមកពីអ្វី ហើយអាហារអ្វីខ្លះដែលអ្នកត្រូវចៀសវាង?
អាហារដែលអ្នកទទួលទានឆ្លងកាត់តាមបំពង់អាហាររបស់អ្នក បន្ទាប់មកត្រូវឆ្លងកាត់សន្ទះមួយរួចទើបចូលទៅកាន់ក្រពះរបស់អ្នក។ សន្ទះដែលជាច្រកទ្វារសម្រាប់ចូលទៅក្រពះរបស់អ្នកនេះ នឹងតែងតែបិទភ្លាមៗនៅពេលអាហារបានឆ្លងកាត់វារួច។ យ៉ាងណាមិញ ក្នុងករណីដែលសន្ទះនេះបើកញឹកញាប់ពេក ជាតិអាស៊ីដដែលផលិតចេញពីក្រពះរបស់អ្នកនឹងអាចធ្វើដំណើរឆ្លងកាត់ដល់បំពង់អាហាររបស់អ្នកបាន។
នៅពេលនេះហើយដែលអ្នកអាចនឹងមានបញ្ហាច្រាល់ជាតិអាស៊ីដក្នុងក្រពះ។ ជំងឺនេះអាចកើតចេញមកពីទម្លាប់ប្រចាំថ្ងៃរបស់អ្នកដែលអាចមានដូចជា ទទួលទានអាហារច្រើនៗឬទម្រេតខ្លួនគេងភ្លាមៗបន្ទាប់ពីទទួលទានអាហាររួច ទទួលទានអាហារដែលមានជាតិហិល ភេសជ្ជៈកាបូណាតដូចជាកូកាកូឡានិងទឹកសូដា ភេសជ្ជៈដែលសម្បូរជាតិអាល់កុល និងអាចជាកាហ្វេឬតែ មានទម្លាប់ជក់បារី ទទួលទានថ្នាំអាស្ពីរីន ឬថ្នាំបន្ថយសម្ពាធឈាមជាដើម។
បើអ្នកមានបញ្ហាច្រាល់ជាតិអាស៊ីដក្នុងក្រពះ មានប្រភេទអាហារមួយចំនួនដែលអ្នកត្រូវចៀសវាង ព្រោះថាអាហារទាំងនោះនឹងធ្វើឲ្យអាស៊ីដក្នុងក្រពះរបស់អ្នកបញ្ចេញមកច្រើនលើសលប់ ហើយធ្វើឲ្យបញ្ហារបស់អ្នកកាន់តែយ៉ាប់យ៉ឺនជាងមុនទៅទៀត។ អាហារទាំងនោះមានដូចជាផ្លែប៉េងប៉ោះ ព្រោះថាវាគឺជាបន្លែមួយប្រភេទដែលសម្បូរទៅដោយជាតិអាស៊ីដស៊ីទ្រិកដែលមាននៅក្នុងក្រូចឆ្មារ ផ្លែក្រូច និងផ្លែទំពាំងបាយជូរ ដែលនៅពេលអ្នកទទួលទានចូលទៅ វានឹងជំរុញនូវការផលិតអាស៊ីដក្នុងក្រពះរបស់អ្នកកាន់តែច្រើន។
សូម្បីតែកាហ្វេដែលជាភេសជ្ជៈដ៏ពេញនិយមសម្រាប់មនុស្សភាគច្រើននេះ ក៏មិនមានផលល្អសម្រាប់អ្នកដែលមានបញ្ហាច្រាល់ជាតិអាស៊ីដក្នុងក្រពះនេះដែរ រួមទាំងភេសជ្ជៈកូកាកូឡានិងជាតិអាល់កុលដូចជាស្រានេះផងដែរ។ អ្វីដែលអ្នកត្រូវចៀសវាងផងដែរនោះគឺជាអាហារណាដែលមានជាតិហិល និងអាហារដែលសម្បូរជាតិខ្លាញ់ ព្រោះវានឹងកាន់តែធ្វើឲ្យបញ្ហារបស់អ្នកយ៉ាប់កាន់តែខ្លាំងបាន៕
