គុណសម្បត្តិនៃការហាត់ប្រាណ ទៅលើដំណើរការណ៍អភិវឌ្ឍ ខួរក្បាលមនុស្ស
មានការសិក្សាជាច្រើនបានអះអាងនិងជំរុញមនុស្សឲ្យចំណាយពេលខ្លះដើម្បីហាត់ប្រាណ ព្រោះថាការហាត់ប្រាណមានគុណសម្បត្តិជាច្រើនរាប់មិនអស់ទៅលើសុខភាពរបស់ពួកគេ។ មិនត្រឹមតែគុណសម្បត្តិទៅលើសុខភាពផ្លូវកាយនោះទេ តែចំពោះខួរក្បាលរបស់អ្នកក៏ទទួលបាននូវប្រយោជន៍ដ៏លើសលប់ជាច្រើន ហើយខាងក្រោមនេះគឺជាគុណសម្បត្តិចំនួន៣សំខាន់ៗដែលអ្នកគួរចាប់អារម្មណ៍៖
១) ជួយបង្កើនការផ្ចង់អារម្មណ៍របស់អ្នក៖ ការហាត់ប្រាណជួយបង្កើនការផ្ចង់អារម្មណ៍របស់អ្នកទៅលើការងារឬការរៀនសូត្រ ហើយមិនតែប៉ុណ្ណោះការហាត់ប្រាណក៏ជួយបង្កើនសមត្ថភាពក្នុងការចងចាំរបស់អ្នកឲ្យបានល្អជាងមុន ព្រោះផ្នែកនៃខួរក្បាលដែលមាននាទីទៅលើការរៀនសូត្រទទួលយកព័ត៌មានថ្មីៗនិងស្តុកទុកនូវការចងចាំក្នុងរយៈពេលវែង មានភាពសកម្មជាងធម្មតានៅពេលអ្នកបញ្ចេញសកម្មភាពដូចជាការធ្វើលំហាត់ប្រាណនេះជាដើម។
២)ជួយបង្កើនសុខភាពផ្លូវចិត្តរបស់អ្នក៖ មនុស្សដែលធ្វើការហាត់ប្រាណរួចនឹងតែងតែទទួលបាននូវអារម្មណ៍មួយដែលមានភាពស្រស់ស្រាយនិងធូរស្រឡះជាងមុន។ ពិតប្រាកដណាស់ លទ្ធផលរបស់ការសិក្សាចំនួន២បានរកឃើញថា ការធ្វើលំហាត់ប្រាណពិតជាមានប្រសិទ្ធភាពក្នុងការទប់ទល់ជាមួយនឹងជំងឺបាក់ទឹកចិត្តដែលកំពុងតែក្លាយជាជំងឺដ៏ពេញនិយមបំផុតមួយកើតឡើងចំពោះមនុស្សទូទាំងសកលលោក។
ការសិក្សាទី១បានចេញផ្សាយក្នុងឆ្នាំ២០១០ បានឲ្យអ្នកចូលរួមធ្វើលំហាត់ប្រាណដោយការធ្វើយូហ្កានិងការតាំងសមាធិជារៀងរាល់ថ្ងៃអស់រយៈពេល៨សប្ដាហ៍ ហើយលទ្ធផលក៏បានរកឃើញថាអ្នកចូលរួមទាំងនោះសុទ្ធតែបានកាត់បន្ថយនូវអារម្មណ៍ស្ត្រេសរបស់ពួកគេយ៉ាងគួរឲ្យកត់សម្គាល់។ រីឯការសិក្សាមួយទៀតនៅក្នុងឆ្នាំ២០១៣ក៏បានរកឃើញដែរថា ការហាត់ប្រាណបានដើរតួប្រៀបដូចជាឱសថសម្រាប់ព្យាបាលជំងឺធ្លាក់ទឹកចិត្តយ៉ាងមានប្រសិទ្ធភាពដូច្នោះដែរ។
៣) ជួយបង្កើនភាពច្នៃប្រឌិតរបស់អ្នក៖ ការសិក្សាមួយនៅក្នុងឆ្នាំ២០១៤ បានអះអាងថាការដើរលំហាត់ប្រាណអាចជួយជំរុញដល់ភាពច្នៃប្រឌិតបាន។ ក្រៅពីនេះ ការដើរហាត់ប្រាណថែមទាំងអាចជួយពន្យឺតដំណើរការណ៍ភ្លេចភ្លាំងដែលតែងតែកើតឡើងនៅពេលអ្នកមានអាយុច្រើនជាងមុន។ ការដើរហាត់ប្រាណនេះគ្រាន់តែចំណាយពេលត្រឹមតែ៣០ទៅ៤៥នាទីនិង៣ដងក្នុង១សប្ដាហ៍ក៏មានប្រសិទ្ធភាពបានដែរ៕
ប្រភព៖ quickanddirtytips.com
ប្រែសម្រួល៖ ស្រីពៅ
