វិធីងាយៗ ដើម្បីបំបាត់ការឈឺធ្មេញដោយខ្លួនឯង បើអ្នកមិននៅជិតគ្រូពេទ្យ
ការឈឺចុកចាប់ធ្មេញគឺជាអារម្មណ៍ដ៏រំខានមួយ ដែលអាចនឹងកើតឡើងចំពោះមនុស្សភាគច្រើន ដោយសារមូលហេតុផ្សេងៗគ្នាដែលអាចមានមកពីទម្លាប់ទទួលទានអាហាររបស់ពួកគេ ឬអាចជាទម្លាប់ក្នុងការសម្អាតធ្មេញជាដើម។ នៅពេលអ្នកឈឺធ្មេញ មានពេលខ្លះអ្នកចាំបាច់ត្រូវតែទៅជួបគ្រូពេទ្យដើម្បីពិនិត្យនិងទទួលការព្យាបាល ប៉ុន្តែបើគ្រាន់តែជាបញ្ហាបណ្ដោះអាសន្នធម្មតាទេ នោះវិធីសាស្ត្រខាងក្រោមអាចព្យាបាលការឈឺចុកចាប់របស់អ្នកឲ្យមានប្រសិទ្ធភាពបាន។
១) តែជីអង្កាម៖ តែជីអង្កាមមានប្រសិទ្ធភាពសម្រាប់ព្យាបាលការហើមជើងធ្មេញនិងឈឺធ្មេញ។ អ្នកគ្រាន់តែដាក់ស្លឹកជីអង្កាមមួយស្លាបព្រាបាយចូលទៅក្នុងទឹកក្ដៅមួយកែវដែលទើបនឹងដាំពុះ បន្ទាប់មកទុកឲ្យត្រជាក់ល្មមរយៈពេលប្រហែល១៥នាទី ហើយអ្នកអាចខ្ពុរទឹកតែជីអង្កាមនោះហើយខ្ជាក់ចេញឬក៏លេបចូលក៏បាន។
២) ទឹកអ៊ីដ្រូហ្សែនពែអុកស៊ីត៖ សូលុយស្យុងអ៊ីដ្រូហ្សែនពែអុកស៊ីតអាចកម្ចាត់មេរោគពីបាក់តេរីនិងថែមទាំងអាចជួយសម្រាលការឈឺចុកចាប់ធ្មេញរបស់អ្នកបានទៀតផង។ អ្នកអាចព្យាបាលការឈឺចុកចាប់របស់អ្នកបានដោយខ្ពុរមាត់ជាមួយទឹកអ៊ីដ្រូហ្សែនពែអុកស៊ីតនេះ ហើយខ្ជាក់ចេញ និងបន្ទាប់មកត្រូវខ្ពុរជាមួយទឹកធម្មតាឲ្យបានច្រើនដង។
៣) ទឹកអំបិល៖ វិធីសាស្ត្រនេះគឺជាវិធីព្យាបាលដ៏សាមញ្ញបំផុតមួយដែលគ្រឿងផ្សំអាចរកបាននៅក្នុងផ្ទះបាយ។ មនុស្សមួយចំនួនមានទម្លាប់ខ្ពុរមាត់ជាមួយទឹកអំបិល ឬដុសធ្មេញជាមួយអំបិលដើម្បីសម្អាតធ្មេញនិងព្យាបាលការឈឺចុកចាប់ធ្មេញរបស់ពួកគេស្រាប់ទៅហើយ។ ដោយគ្រាន់តែដាក់អំបិលមួយស្លាបព្រាបាយលាយបញ្ចូលគ្នានៅក្នុងទឹកក្ដៅមួយកែវ ហើយខ្ពុរមាត់ប្រមាណ១នាទីកន្លះជាមួយទឹកអំបិលនោះ និងខ្ជាក់ចេញ ធ្វើបែបនេះជាញឹកញាប់ នោះអ្នកនឹងអាចកាត់បន្ថយការឈឺចុកចាប់ធ្មេញរបស់អ្នក បំបាត់ការហើម និងថែមទាំងអាចសម្អាតកាកសំណល់ផ្សេងៗនៅចន្លោះធ្មេញរបស់អ្នកបានផងដែរ។
ទោះជាយ៉ាងណាក៏ដោយ វិធីសាស្ត្រដែលបានរៀបរាប់ខាងលើនេះគ្រាន់តែជាការព្យាបាលបណ្ដោះអាសន្នខណៈពេលអ្នកមិននៅក្បែរគ្រូពេទ្យប៉ុណ្ណោះ។ លើសពីនេះ អ្នកត្រូវកាត់បន្ថយទម្លាប់ទទួលទានអាហារដែលសម្បូរជាតិផ្អែម ជួបជាមួយគ្រូពេទ្យឲ្យបានយ៉ាងតិចម្ដងក្នុង១ឆ្នាំ ដុសសម្អាតធ្មេញឲ្យបានទៀងទាត់និងប្ដូរច្រាស់ដុសធ្មេញរយៈពេល៣ខែម្ដង និងប្រើប្រាស់ទឹកខ្ពុរមាត់ដើម្បីលាងសម្អាតធ្មេញអ្នកឲ្យមានសុខភាពល្អ៕
ប្រភព៖ lifehack ប្រែសម្រួល៖ ស្រីពៅ
