តើកំហុសលុយកាក់អ្វីខ្លះ ដែលអ្នកអាចមានជាមួយដៃគូជីវិតរបស់អ្នក ?
តើកំហុសលុយកាក់អ្វីខ្លះដែលអ្នកនិងដៃគូរបស់អ្នកអាចសាងឡើងដែលអាចបង្កជាបញ្ហាធ្ងន់ធ្ងរ? តើអ្នកគួរដោះស្រាយបញ្ហាទាំងនោះដោយរបៀបណា?
១) មិនស្មោះត្រង់ជាមួយគ្នា៖ ទំនុកចិត្តអាចកើតមានបានលុះត្រាតែមានភាពស្មោះត្រង់កើតចេញមកជាមុនសិន។ កុហកមិនមែនសុទ្ធតែជាអំពើមិនល្អទាំងអស់នោះទេ ព្រោះអ្វីដែលសំខាន់គឺស្ថិតនៅលើគោលបំណងពិតប្រាកដរបស់អ្នកមានទិសដៅក្នុងផ្លូវល្អឬយ៉ាងណា។ យ៉ាងណាមិញចំពោះបញ្ហាលុយកាក់ វាគឺជារឿងសំខាន់បំផុតមួយដែលមិនថាជាមានបញ្ហាអ្វីកើតឡើងក៏ដោយ អ្នកគួរតែមានភាពស្មោះត្រង់ចំពោះគ្នាទៅវិញទៅមក ប្រាប់ពីបញ្ហាលម្អិតដែលចាំបាច់ទាំងអស់ ដើម្បីជួយគ្នាស្វែងរកផ្លូវចេញពីច្រកនៃបញ្ហាជាមួយគ្នា។ មានបញ្ហាលុយកាក់អ្វីគួរតែជជែកគ្នាកាន់តែឆាប់កាន់តែប្រសើរ ពុំនោះទេបើទុកកាន់តែយូរ វាអាចនឹងនាំមកនូវបញ្ហាកាន់តែច្រើននៅពេលខាងមុខទៀតមិនខាន។
២) កុំឲ្យអារម្មណ៍គ្រប់គ្រងអ្នកបានឲ្យសោះ៖ មិនថាមានបញ្ហាធ្ងន់ធ្ងរប៉ុណ្ណាក៏ដោយ កំហឹងពុះកញ្ជ្រោលមិនដែលអាចដោះស្រាយបញ្ហាអ្វីបាននោះឡើយ។ បើសិនជាដៃគូរបស់អ្នកបានប្រព្រឹត្តកំហុសធ្ងន់ធ្ងរអ្វីមួយជាមួយនឹងលុយកាក់ នោះអ្នកគួរតែព្យាយាមអង្គុយស្ដាប់គាត់ដោយការអត់ធ្មត់ ដើម្បីស្វែងយល់ថាអ្វីទៅទើបនាំមកនូវបញ្ហានោះយ៉ាងពិតប្រាកដ បន្ទាប់មកអ្នកទាំងពីរនឹងអាចស្វែងរកដំណោះស្រាយរួមគ្នាបានជាក្រោយ។
៣) មិនរៀបចំនិងគោរពតាមផែនការចំណាយឲ្យបានច្បាស់លាស់៖ អ្នកនិងដៃគូអាចនឹងបានរៀបចំផែនការសម្រាប់ចាយវាយទៅលើអ្វីទៅតាមកាលកំណត់របស់អ្នកបានច្បាស់លាស់រួចរាល់ហើយ ប៉ុន្តែបញ្ហាអាចកើតឡើងនៅពេលដែលអ្នកមិនបានគោរពទៅតាមផែនការដែលបានកំណត់មកនោះ។ មិនមានផែនការច្បាស់លាស់និងមិនគោរពទៅតាមផែនការចំណាយរបស់ខ្លួន គឺជាកំហុសដ៏ធំមួយដែលអាចធ្វើឲ្យអ្នកមិនអាចគ្រប់គ្រងស្ថានការណ៍បានទាន់ពេលវេលា និងប៉ះពាល់រាលដាលទៅដល់បញ្ហាដទៃៗទៀតឲ្យកើតឡើងផងដែរ។ បើអ្នករស់នៅតែម្នាក់ឯង វាមិនជាបញ្ហាអ្វីធំដុំនោះទេ ប៉ុន្តែបើអ្នករស់នៅជាមួយដៃគូ ហើយបើសិនជាមានកូនៗទៀតនោះ នោះវាប្រាកដជាក្លាយជាបញ្ហាធំមិនខាន៕
ប្រភព៖ quickanddirtytip.com ប្រែសម្រួល៖ ស្រីពៅ
