អាហារអ្វីខ្លះដែលមានប្រសិទ្ធភាពក្នុងការកាត់បន្ថយសម្ពាធឈាមឡើងខ្ពស់បាន ?
ទម្លាប់របស់អ្នកនៅក្នុងការទទួលទានអាហារប្រចាំថ្ងៃពិតជាមានឥទ្ធិពលសំខាន់ចំពោះសុខភាពរបស់អ្នក។ ការកើនឡើងសម្ពាធឈាមគឺជាជំងឺមួយដែលកើតឡើងទៅលើមនុស្សជាច្រើននៅពេលពួកគេមានអាយុច្រើន។ វាអាចបណ្ដាលមកពីមូលហេតុផ្សេងៗចូលរួមផ្សំគ្នា ប៉ុន្តែនៅក្នុងនោះមូលហេតុដ៏សំខាន់មួយដែលបាននាំទៅរកការកើនឡើងសម្ពាធឈាមនេះ ក៏កើតចេញមកពីទម្លាប់បរិភោគប្រចាំថ្ងៃរបស់ពួកគាត់ដែរ។ ដូច្នេះតើប្រភេទអាហារអ្វីខ្លះ ដែលអាចជួយការពារអ្នកពីជំងឺមួយនេះបាន ?
១) ខ្ទឹមស៖ តាំងពីយូរណាស់មកហើយ ខ្ទឹមសត្រូវបានចាស់បុរាណប្រើប្រាស់ធ្វើជាឱសថធម្មជាតិសម្រាប់ព្យាបាលជំងឺជាច្រើនប្រភេទ។ ពិតប្រាកដណាស់ខ្ទឹមសពោរពេញដោយអត្ថប្រយោជន៍ជាច្រើនក្នុងការទប់ស្កាត់និងព្យាបាលជំងឺ។ ខ្ទឹមសគឺជាឱសថធម្មជាតិដ៏មានប្រសិទ្ធភាពបំផុតមួយសម្រាប់សុខភាពបេះដូងរបស់អ្នក។ វាថែមទាំងជួបកាត់បន្ថយសម្ពាធឈាម ជាតិកូឡេស្តេរ៉ុល និងលើសពីនេះទៅទៀតខ្ទឹមសផ្ទុកទៅដោយសារធាតុដែលមាននាទីបង្កើនថាមពលដល់ប្រព័ន្ធភាពស៊ាំរបស់អ្នក ជួយប្រឆាំងនឹងបាក់តេរី និងជួយប្រឆាំងនឹងអុកស៊ីតកម្មផងដែរ។
២) ត្រី៖ អាស៊ីដខ្លាញ់ទាំងអស់មិនមែនសុទ្ធតែមិនល្អចំពោះសុខភាពរបស់អ្នកនោះទេ។ ជាក់ស្ដែងអាស៊ីដខ្លាញ់អូមេហ្កា៣ដែលសម្បូរនៅក្នុងត្រីសាលមនជាពិសេស ត្រូវបានគេរកឃើញថាជួយកាត់បន្ថយសម្ពាធឈាម ជាតិកូឡេស្តេរ៉ុល និងកាត់បន្ថយប្រភេទអាស៊ីដខ្លាញ់មួយចំនួនដែលមិនល្អសម្រាប់សុខភាពរបស់អ្នក។ អ្នកនឹងទទួលបានអត្ថប្រយោជន៍កាន់តែមានប្រសិទ្ធភាព បើសិនជាអ្នកទទួលទានវាដោយចំហុយ ស្ងោរឬអាំងជាដើម ជាជាងការប្រើប្រាស់ខ្លាញ់ដើម្បីចម្អិន។
៣) ចិញ្ចឹមសត្វ៖ នៅពេលអ្នកត្រឡប់មកផ្ទះពីកន្លែងធ្វើការវិញ និងពោរពេញដោយអារម្មណ៍ស្ត្រេសនិងហត់នឿយ នោះការណ៍ដែលបានប្រលែងលេងជាមួយនឹងសត្វចិញ្ចឹមរបស់អ្នក នឹងជួយកាត់បន្ថយភាពតប់ប្រមល់អស់ទាំងនោះ ហើយនឹងជួយធ្វើឲ្យអារម្មណ៍អ្នកធូរស្រាលជាងមុន ដែលត្រង់ចំណុចនេះក៏បានចូលរួមជាផ្នែកមួយដ៏សំខាន់ក្នុងការជួយកាត់បន្ថយឬបង្ការការកើនឡើងសម្ពាធឈាមរបស់អ្នក។
៤) សូកូឡាខ្មៅ៖ សូកូឡាខ្មៅតែងតែត្រូវបានគេលើកសរសើរពីអត្ថប្រយោជន៍របស់វាដែលមានចំពោះសុខភាពជានិច្ច។ វាមិនត្រឹមតែជួយបង្កើននូវការផលិតដូប៉ាមីន ដែលជាសារធាតុគីមីនៅក្នុងខួរក្បាលរបស់អ្នកដែលមាននាទីជួយធ្វើឲ្យអារម្មណ៍របស់អ្នកសប្បាយរីករាយនិងស្រស់ស្រាយជាងមុននោះទេ តែសូកូឡាខ្មៅក៏អាចជួយកាត់បន្ថយសម្ពាធឈាមរបស់អ្នកយ៉ាងមានប្រសិទ្ធភាពដែរ៕
ប្រភព៖ www.quickanddirtytips.com ប្រែសម្រួល៖ ស្រីពៅ
