តើគោលការណ៍ជីវិតបែបណា ដែលអ្នកគួរប្រកាន់យកតាមដើម្បីសម្រេចនូវភាពជោគជ័យ ?
ដើម្បីសម្រេចទៅដល់គោលដៅនៃជីវិតរបស់អ្នក អ្នកត្រូវចាំថាមិនមែនផ្លូវដើរសម្រាប់អ្នកមានតែមួយច្រកនោះទេ។ ដរាបណាអ្នកមានឆន្ទៈដ៏មោះមុតក្នុងការសម្រេចគោលដៅនោះ ផ្លូវមួយមិនបើកទ្វារសម្រាប់អ្នក អ្នកអាចមានផ្លូវផ្សេងទៀត បើវានៅតែមិនបើកសម្រាប់អ្នកទៀត ដូច្នេះអ្នកត្រូវបង្កើតផ្លូវដើរនោះដោយខ្លួនឯង។ អ្នកមិនចាំបាច់ទៅតាមលំដាប់លំដោយនៃផែនការដែលអ្នកបានគ្រោងទុកនោះទេ។ ការគិតក្រៅប្រអប់ ឬជាការគិតបែបច្នៃប្រឌិត គឺជាគំនិតផ្ដួចផ្ដើមដែលអ្នកបង្កើតឡើង និងជាគោលការណ៍ប្រចាំជីវិតមួយដែលអ្នកត្រូវប្រកាន់យក ដើម្បីសម្រេចបាននូវភាពជោគជ័យក្នុងជីវិត។
អ្នកមិនត្រូវធ្វើជាអ្នកដែលរងអំពើ ចាំតែទទួលបានការបង្គាប់ណែនាំឲ្យធ្វើបែបនេះ បែបនោះ និងរងអំពើពីស្ថានការណ៍ខាងក្រៅ ឬអ្នកដទៃដែលបានជះឥទ្ធិពលមកលើអ្នក ហើយអនុញ្ញាតឲ្យកត្តាខាងក្រៅទាំងនោះកំណត់ជោគវាសនាមកលើជីវិតអ្នកនោះទេ។ អត្ថន័យនៃការមានជីវិតរស់រានរបស់ពួកយើងម្នាក់ៗមកនេះ គឺដើម្បីធ្វើជាមនុស្សសកម្ម មានការទទួលខុសត្រូវលើជីវិតខ្លួនឯង ក្រោកឈរឡើងទៅកំណត់ជោគវាសនាដែលយើងចង់បាន មិនមែនអង្គុយបន់ស្រន់ឲ្យកត្តាខាងក្រៅផ្លាស់ប្ដូរ ដើម្បីឲ្យអ្នកទទួលបាននូវជីវិតដែលអ្នកចង់បាននោះឡើយ។
បើអ្នករកឃើញថា អ្នកបានជាប់ឬសយ៉ាងជ្រៅទៅក្នុងផ្នត់គំនិតរបស់មនុស្សអសកម្ម និងអ្នករងអំពើ ហើយបើអ្នកចង់ផ្លាស់ប្ដូរខ្លួនឯងឲ្យក្លាយជាមនុស្សសកម្ម និងអ្នកធ្វើអំពើវិញ ដូច្នេះអ្នកត្រូវប្រាកដថាអ្នកនឹងប្រកាន់ខ្ជាប់នូវឧបនិស្ស័យទាំងនេះជាគោលក្នុងខ្លួនជារៀងរហូតទៅ៖
១) ទទួលខុសត្រូវទៅលើរាល់បញ្ហាដែលកើតឡើងក្នុងជីវិតអ្នក៖ អ្នកត្រូវបណ្ដុះនូវផ្នត់គំនិតនៃភាពមានទំនួលខុសត្រូវទៅលើជីវិតខ្លួនឯង ស្វែងរកដំណោះស្រាយចំពោះរាល់បញ្ហាដែលកើតមានក្នុងជីវិតអ្នក និងចេញមុខដោះស្រាយវាដោយខ្លួនឯង។ អ្នកប្រហែលជាអាចគិតថា ការរុញចោលទំនួលខុសត្រូវទាំងនោះ និងទម្លាក់កំហុសទៅលើអ្នកដទៃដែលបានបង្កឲ្យជីវិតអ្នកក្លាយជាបែបនេះជាការងាយស្រួលជាង ប៉ុន្តែអ្នកត្រូវចាំថា វាមិនមែនជាផ្លូវដែលនឹងនាំអ្នកទៅកាន់ជោគជ័យនោះឡើយ។
២) ផ្ដោតទៅលើអ្វីដែលអ្នកអាចគ្រប់គ្រងបាន មិនមែនជាអ្វីដែលអ្នកមិនអាចគ្រប់គ្រងបាននោះឡើយ៖ មូលហេតុមួយដែលមនុស្សភាគច្រើនទៅមិនដល់គោលដៅរបស់ពួកគេ ព្រោះពួកគេតែងផ្ដោតទៅលើការផ្លាស់ប្ដូរកត្តាខាងក្រៅ ជាអ្វីដែលពួកគេមិនអាចគ្រប់គ្រងបាន បន្ទាប់មកពួកគេក៏ទទួលអារម្មណ៍ខកបំណង រួចក៏មានទំនោរទៅរកការបោះបង់។ ផ្ទុយទៅវិញ បើពួកគេងាកមកផ្ដោតទៅលើការផ្លាស់ប្ដូរខ្លួនឯង ជាអ្វីដែលពួកគេអាចគ្រប់គ្រងបាន នោះពួកគេនឹងពង្រីកឥទ្ធិពលនៃដំណោះស្រាយចំពោះរាល់បញ្ហា ហើយចុងក្រោយពួកគេនឹងសម្រេចវាបានជោគជ័យ៕
ប្រភព៖ lifehack
