ហេតុអ្វីភាពបរាជ័យគឺជាធាតុផ្សំដែលអ្នកមិនអាចខ្វះបាន ដើម្បីភាពជោគជ័យក្នុងជីវិត ?
អ្នកច្នៃប្រឌិតបង្កើតអំពូលភ្លើង លោក ថូម៉ាស់ អេឌីសាន់ ធ្លាប់និយាយថា៖ "ខ្ញុំមិនបានបរាជ័យនោះទេ តែគ្រាន់តែខ្ញុំបានរកឃើញនូវវិធី១ម៉ឺនដងដែលប្រើការមិនកើតតែប៉ុណ្ណោះ"។ សំណាងមិនមែនធ្លាក់មកពីលើមេឃនោះទេ។ បើទោះជាភាពចៃដន្យនៃសំណាងអាចកើតមានក៏ពិតមែន ប៉ុន្តែវាក៏មិនមែនចេះតែមានរហូតនោះដែរ។ ហេតុនេះហើយអ្នកមិនអាចដេករង់ចាំឲ្យសំណាងធ្លាក់ពីលើមេឃដោយមិនបានប្រឹងប្រែងធ្វើអ្វីសោះចេញពីកម្លាំងញើសឈាមរបស់ខ្លួននោះឡើយ។ មានតែបុគ្គលដែលខិតខំប្រឹងប្រែងប៉ុណ្ណោះទើបចុងក្រោយអាចក្លាយជាម្ចាស់កម្មសិទ្ធិនៃភាពជោគជ័យបាន។ ខណៈពេលនេះ អ្នកអាចនឹងមិនបានសម្រេចនូវគោលដៅរបស់អ្នក ប៉ុន្តែចូរកុំឲ្យខ្លួនឯងបរាជ័យនៅក្នុងការរៀនសូត្របានអ្វីម្យ៉ាងពីបទពិសោធន៍នីមួយៗឲ្យសោះ។
បើអ្នកមិនមានសេចក្ដីក្លាហាននៅក្នុងការចេញទៅតស៊ូទាមទារយកនូវអ្វីដែលអ្នកចង់បានទេ នោះអ្នកនឹងមិនអាចមានវាអស់មួយជីវិត។ ភាពភ័យខ្លាចការបរាជ័យ ភ័យខ្លាចកំហុសឆ្គង និងការប្រកាន់យកភាពល្អឥតខ្ចោះនិយមហួសហេតុពេក តែងតែជាការគិតដែលនាំអ្នកទៅរកភាពអន់ថយ និងមិនលូតលាស់រីកចម្រើន ក៏ព្រោះតែអ្នកជាប់គាំងមួយកន្លែងមិនហ៊ានក្រោកឈរឡើងចេញពីតំបន់សុវត្ថិភាពរបស់ខ្លួន ដើម្បីទាមទាររកអ្វីដែលខ្លួនឯងចង់បានយ៉ាងពិតប្រាកដ។ ស្ថាបនិកបង្កើត Facebook លោក Mark Zuckerberg ធ្លាប់និយាយថា៖ "មនុស្សម្នាក់ៗគួរតែមានសេរីភាពគ្រប់គ្រាន់សម្រាប់ការបរាជ័យ"។
ដូចអ្វីដែលលោកអេឌីសាន់បានលើកឡើងដូច្នោះ នៅពេលដែលអ្នកសាងកំហុសខុសឆ្គងច្រើន នោះអ្នកនឹងទទួលបានបទពិសោធន៍ច្រើន ដែលអាចឲ្យអ្នករៀនសូត្រដឹងបានថាតើផ្លូវដើរណាអាចចម្លងអ្នកទៅដល់គោលដៅបាន ឯផ្លូវដើរណាដែលអ្នកគួរចៀសវាងក៏ព្រោះតែអ្នកធ្លាប់មានបទពិសោធន៍ហើយថាវានឹងមិនអាចប្រើការបានប្រយោជន៍នៅក្នុងស្ថានការណ៍ជាក់លាក់ណាមួយនោះឡើយ។ បើកាលណាអ្នកមានបទពិសោធន៍ច្រើន ធ្លាប់សាងកំហុសបរាជ័យច្រើន នោះអ្នកនឹងមានវិធីច្រើននៅក្នុងការដោះស្រាយបញ្ហា ខណៈពេលដែលមនុស្សដទៃទៀតដែលស្វែងរកតែភាពល្អឥតខ្ចោះ និងចាំតែរិះគន់ចំអកឲ្យអ្នក ពួកគេនឹងជាប់គាំងមួយកន្លែងទៅនឹងវិធីដោះស្រាយបញ្ហាដដែលៗ ដែលពួកគេរំពឹងទុកថានឹងនាំទៅរកភាពជោគជ័យ។ បើអ្នកចង់បានអ្វីមួយហើយ នោះអ្នកមិនគួរបោះបង់វាចោលនោះទេ។ ប៉ុន្តែមនុស្សឈ្លាសវៃនឹងដឹងថាពេលណាគួរបោះបង់ ហើយពេលណាដែលគួរតែប្រឹងប្រែងបន្តទៀត។ អ្នកក៏ត្រូវចាំឃ្លាមួយរបស់ Shree Krishna ដែរថា៖ "បើអ្នកបរាជ័យនៅក្នុងការសម្រេចនូវគោលដៅរបស់អ្នក ចូរអ្នកផ្លាស់ប្ដូរចេញនូវយុទ្ធសាស្ត្រដែលអ្នកបានប្រើប្រាស់ តែកុំផ្លាស់ប្ដូរគោលដៅរបស់អ្នកឲ្យសោះ"៕
ដោយ៖ ស្រីពៅ
