លោក​ ​Tony Hsieh​ ​​​គឺ​ជា​​នាយក​ប្រតិបត្តិ​របស់​ក្រុមហ៊ុន Zappos​  ​​ហើយ​បច្ចុប្បន្ន​​មាន​ទ្រព្យ​សម្បត្តិ​​៨៤០​លាន​ដុល្លារ​អាមេរិក ​។ ​​ក្នុង​វ័យ​​ត្រឹម​តែ​៤​៤ឆ្នាំ ​​ហើយ​មាន​ទ្រព្យសម្បត្តិ​យ៉ាង​ច្រើន​បែប​នេះ​​​​​​​​គេ​អាច​ចាត់ទុក​ថា ​​លោក​ជា​បុគ្គល​ជោគជ័យ​មួយ​រូប​ ​ហើយ​​​​មាន​មនុស្ស​មិន​តិច​ទេ​ ​ដែល​ព្យាយាម​រៀនសូត្រ​​​​​​ពី​រូប​​លោក​។ ​ខាង​ក្រោម​នេះ ​ជា​​មេរៀន​សំខាន់​៥​យ៉ាង​ ​​សម្រាប់​សហគ្រិន​វ័យ​ក្មេង​​រៀន​សូត្រ​៖​​​​

១) ​​ធ្វើ​អ្វី​ដែល​អ្នក​ពេញ​ចិត្ត​ខ្លាំង​ ​នឹង​ជួយ​​​ឲ្យ​អ្នក​មាន​ឱកាស​ជោគជ័យ​ច្រើន​៖

មិន​មែនគ្រប់​បុគ្គល​​ដែល​ធ្វើ​អ្វី​ដែល​ខ្លួន​ពេញ​ចិត្ត​សុទ្ធតែ​ជោគជ័យ ​ប៉ុន្តែ​រាល់​បុគ្គល​ជោគជ័យ​​​​​ជាច្រើន​ក្នុង​លោក​សុទ្ធតែ​ ​ជា​មនុស្ស​ដែល​​កំពុង​ធ្វើ​ការងារ​ដែល​​ពួកគេ​​ពេញ​ចិត្ត​ខ្លាំង​បំផុត​។ ​សម្រាប់​​​លោក​ Tony Hsieh ​បាន​ណែនាំ​ថា ​ត្រូវ​រក​​​ឲ្យ​ឃើញ​​ ​អ្វី​​មួយ​ដែល​យើង​ពេញ​ចិត្ត​ខ្លាំង​បំផុត​ ​​​​​​​​ហើយ​ព្យាយាម​ធ្វើ​វា​​​ឲ្យ​អស់​ពី​លទ្ធភាព​បំផុតដែរ ​ទើប​​ជីវិត​​​​​​មាន​ការ​ផ្លាស់ប្ដូរ​​។ ​​​​​

២) ​ត្រូវ​ដឹង​ថា ​អ្វី​ដែល​​លើក​ទឹកចិត្ត​មនុស្ស​ខ្លាំង​បំផុត​

​ដើម្បី​ដំណើរការ​ក្រុមហ៊ុន​មួយ​ជោគជ័យ ​​​​​វា​ពិត​ជា​ត្រូវ​ការ​មនុស្ស​ជាច្រើន​ចូលរួម​ធ្វើ​ការ។ ​​នៅ​ពេល​មាន​មនុស្ស​ច្រើន​ធ្វើ​ការ​ ​​​​​​​​​​​​​នោះ​បញ្ហា​ជាច្រើន​នឹង​កើត​ឡើង​​មិន​ខាន​ ​ដូច្នេះ​បើ​គ្មាន​វិធី​ក្នុង​ការ​ដោះស្រាយ​ ​និង ​លើក​ទឹកចិត្ត​ពួកគេ​ទេ ​​​​​​អ្នក​ពូកែៗ​ប្រាកដ​ជា​រត់​ចេញ​មិន​ខាន​។ ​អ៊ីចឹង​ហើយ​បាន​ជា ​​លោក​ Tony Hsieh ​​​បាន​ដាស់តឿន​ថា ​ក្នុង​នាម​ជា​​​អ្នក​ដឹកនាំ​​ ​ត្រូវ​​យល់​ពី​ជម្រៅ​ចិត្ត​មនុស្ស​ក្រោមបង្គាប់ ​ហើយ​ត្រូវ​រក​​​ឲ្យ​ឃើញ​​ថា ​មាន​ចំណុច​អ្វី​ខ្លះ​​ដែល​​ជំរុញ​​ ​និង​ ​លើក​ទឹកចិត្ត​ពួកគេ​​​​ឲ្យ​បន្ត​ធ្វើការ​​​យ៉ាង​សស្រាក់សស្រាំ។

៣) ​រៀន​ពី​កំហុស​ខ្លួន​ឯង​

​​ក្នុង​លោក​នេះ ​​គ្មាន​នរណា​ដែល​​​មិន​ចេះ​ខុស​​នោះ​ឡើយ ​ឬ​​យើង​អាច​និយាយ​បាន​ថា ​ឲ្យ​តែ​ធ្វើ​​​ប្រាកដ​ជា​​មាន​កំហុស​ ​​គ្រាន់​តែ​​មាន​​ទំហំ​ខុស​គ្នា​​​​ប៉ុណ្ណោះ​។ ​អ្វី​ដែល​សំខាន់ ​រាល់​ពេល​មាន​កំហុស​ម្តងៗ​​ ​ត្រូវ​រៀន​ពី​វា​​ឲ្យ​អស់​ ​​ដើម្បី​ប្រាកដ​ថា ​ថ្ងៃ​ក្រោយ​​​​យើង​នឹង​មិន​ធ្វើ​បែប​នេះ​ម្តង​ទៀត​។ Tony Hsieh​ បាន​ចែក​រំលែក​បទពិសោធន៍​ជាក់​ស្តែង​របស់​ខ្លួន​ថា ​​​លោក​បាន​សម្រេច​ចិត្ត​លក់​ក្រុមហ៊ុន​ដំបូង​​​​​មាន​ឈ្មោះ​ថា  Link Exchange ​​ក្នុង​​តម្លៃ២៦៥​លាន​ដុល្លារ​អាមេរិក​ ​ដោយ​សារ​​តែ​​​លោក​​​​មិន​ពេញ​ចិត្ត​​​ចំពោះ​បរិយាកាស​ការងារ​ដែល​​​លោក​បាន​បង្កើត​។ ​ដូច្នេះ​ហើយ ​​ក្រុមហ៊ុន​បច្ចុប្បន្ន​ដែល​​លោក​កំពុង​តែ​ដំណើរ​ការ ​​​​ហើយ​កំពុង​ទទួល​បាន​ជោគជ័យ​ឈ្មោះ​ថា Zappos ​នេះ ​​គឺ​មិន​ដូច​ក្រុមហ៊ុន​មុន​នោះ​ឡើយ ​ព្រោះ​​លោក​បាន​រៀន​ពី​កំហុស​របស់​ខ្លួន​​​នៅ​ពេល​បើក​ក្រុមហ៊ុន​ដំបូង​​។

៤) ត្រូវ​ផ្ដោត​ទៅ​លើ​អតិថិជន​ ​មិន​មែន​​ផលិតផល​នោះ​ទេ​

​មាន​សហគ្រិន​ជាច្រើន​​ ​​​​បាន​ចំណាយ​ពេល​លើសលប់​​ក្នុង​ការ​​​​អភិវឌ្ឍន៍​​​​ផលិតផល​ ​ឬ​ ​សេវាកម្ម​របស់​ខ្លួន​​ ​​ដើម្បី​ប្រាកដ​ថា ​​​​​​​​នៅ​ពេល​លក់​ចេញ​​នៅ​លើ​ទីផ្សារ​​ ​នឹង​មាន​មនុស្ស​ជាច្រើន​ទិញ​​។ ​​​​​សម្រាប់​​​សេដ្ឋី​វ័យ​៤៤​​ឆ្នាំ​រូប​នេះ ​​​បាន​​​​​​ពន្យល់​ថា ​គួរ​ណាស់​តែ​ព្យាយាម​​យកចិត្ត​​ទុកដាក់​ទៅ​លើ​​​អតិថិជន​​ឲ្យ​បាន​ច្រើន ​ព្រោះ​ថា ​​​​​​បើ​យើង​មិន​ដឹង​ថា ​អតិថិជន​ចង់​បាន ​និង ​ពេញ​ចិត្ត​អ្វី​ផង ​តើ​​​​​​​ធ្វើ​ដូចម្តេច​​ទើប​អាច​ដឹង​ថា​​​ ​ផលិតផល​ឬ សេវាកម្ម​របស់​យើង​ល្អ​​ទៅ​។

៥) ​​​ចំណាយ​ពេល​​និយាយ​​លេង​​ជាមួយ​​បុគ្គលិក​​៖

​ធ្វើ​ជា​​អ្នកដឹកនាំ​​គេ​ ​មិន​មែន​​មួយថ្ងៃៗ​ត្រូវ​អង្គុយ​ក្នុង​បន្ទប់​ធ្វើការ​របស់​ខ្លួន​នោះ​ទេ ​អ្នក​ត្រូវ​តែ​ចំណាយ​ពេល​ខ្លះ​ដើម្បី​​ជជែក​គ្នា​ជាមួយ​នឹង​បុគ្គលិក​ទូទៅ ​ដើម្បី​អាច​ស្ទង់​ដឹង​ពី​​តម្រូវ​ការ​​របស់​ពួកគេ​​។ ​ដូច្នេះ​ហើយ​​អ្នក​គួរ​តែ​ចំណាយ​ពេល​ខ្លះ​ ​ដើម្បី​ដឹង​​ថា​​​​​ឲ្យ​ច្បាស់​ថា ​ពួក​គេ​ពេញ​ចិត្ត​​​អ្វី​ ​​និង ​មិន​​ពេញ​ចិត្ត​អ្វី​​​​៕

​ដោយ​៖ ​រតនា​ ​វិចិត្រ