តើភាពជោគជ័យរបស់ក្រុមហ៊ុនតូយ៉ូតា អាចឲ្យយើងរៀនអ្វីខ្លះបានពីពួកគេ ?
សហរដ្ឋអាមេរិកនិងបណ្ដាប្រទេសនៅប៉ែកអឺរ៉ុប តែងតែជាប់ឈ្មោះល្បីល្បាញនៅក្នុងវិស័យជាច្រើន ហើយជាពិសេសគឺក្នុងផ្នែកឧស្សាហកម្មផលិតយានយន្តនេះតែម្ដង។ ប៉ុន្តែ ជប៉ុន ដែលជាប្រទេសមួយស្ថិតនៅក្នុងប៉ែកអាស៊ី មិនរួញរាចុះចាញ់នឹងភាពខ្លាំងក្លារបស់ពួកគេទាំងនោះឡើយ។
ជាក់ស្ដែងបំផុតនោះគឺជាភាពជោគជ័យរបស់រោងចក្រឧស្សាហកម្មផលិតរថយន្តរបស់តូយ៉ូតា (Toyota) ដែលចាប់ផ្ដើមចេញពីការប្រឈមមុខជាមួយនឹងឧបសគ្គលំបាកៗជាច្រើនក្នុងអំឡុងពេលទើបនឹងចប់សង្គ្រាមលោកលើកទី២ រហូតកសាងសមិទ្ធផលជោគជ័យដ៏អស្ចារ្យក្លាយជារោងចក្រឧស្សាហកម្មដ៏ធំជាងគេបង្អស់របស់ពិភពលោក។
ក្រុមហ៊ុនតូយ៉ូតាត្រូវបានបង្កើតឡើងក្នុងឆ្នាំ១៩៣៧ ដោយបុរសជនជាតិជប៉ុនមួយរូបគឺលោក Kiichiro Toyoda ក្រោយពីលោកបានចុះទស្សនកិច្ចទៅកាន់រោងចក្រឧស្សាហកម្មផលិតរថយន្តជាច្រើនរបស់សហរដ្ឋអាមេរិក។ អំឡុងពេលនោះគឺជាពេលនៃសង្គ្រាមលោកលើកទី២នៅឡើយ ដែលវិស័យយានយន្តរបស់ប្រទេសជប៉ុន ត្រូវបានទទួលរងឥទ្ធិពលខ្លាំងក្លាពីសហរដ្ឋអាមេរិកដែលក្នុងនោះមានក្រុមហ៊ុន General Motor និងក្រុមហ៊ុន Ford ដែលបានដាក់ដំណើរការណ៍រោងចក្រផលិតយានយន្តរបស់ខ្លួននៅជប៉ុន។
ទោះជាយ៉ាងណាក៏ដោយ លោក Kiichiro Toyoda មិនបានបាក់ស្បាតនូវភាពខ្លាំងក្លារបស់មហាអំណាចទាំងនោះឡើយ ហើយគាត់មើលឃើញថាពួកគេបានផ្ដោតទៅលើការផលិតរថយន្តខ្នាតកណ្ដាលនិងខ្នាតធំ ដូច្នេះជាជាងប្រកួតប្រជែងដណ្ដើមយកទីផ្សារពីក្រុមហ៊ុនរបស់អាមេរិកទាំងនោះ គាត់ក៏បានផ្ដោតទៅលើការផលិតរថយន្តខ្នាតតូចវិញ និងបានជោគជ័យជាមួយនឹងគំរូរថយន្តដំបូងដែលអាចបើកបររហូតទៅដល់ល្បឿន៥៤ម៉ៃល៍ក្នុង១ម៉ោង។
ប៉ុន្តែកំឡុងពេលនោះគឺជារយៈពេល២ឆ្នាំក្រោយពីការចាញ់សង្គ្រាមរបស់ជប៉ុន ហេតុនេះស្ថានការណ៍នាពេលនោះបាននាំមកនូវឧបសគ្គជាច្រើនដែលក្រុមហ៊ុនរបស់គាត់ត្រូវប្រឈមមុខ។ ក្នុងឆ្នាំ១៩៤៩ ក្រុមហ៊ុនរបស់គាត់មានបញ្ហាផ្ទៃក្នុងពាក់ព័ន្ធជាមួយនឹងការគ្រប់គ្រងនិងកម្លាំងពលកម្ម។ ប្រទេសជប៉ុននាពេលនោះកំពុងតែប្រឈមមុខជាមួយនឹងបញ្ហាអតិផរណា ខ្វះខាតស្បៀងនិងសម្ភារប្រើប្រាស់ចាំបាច់ជាច្រើន ហើយក្រុមហ៊ុនតូយ៉ូតារបស់គាត់ក៏ត្រូវប្រឈមមុខនឹងបញ្ហាខ្វះខាតទុនជំនួយ ដែលជាលទ្ធផលការផលិតរបស់ពួកគេត្រូវធ្លាក់ចុះជាលំដាប់។ ចុងក្រោយចំនួនបុគ្គលិកត្រូវបានធ្លាក់ចុះពី៨០០០នាក់នៅសល់ត្រឹម៦០០០នាក់។
នៅពេលលោក Kiichiro Toyoda បានស្លាប់បាត់បង់ជីវិតនៅឆ្នាំ១៩៥២ ក្រុមហ៊ុនរបស់គាត់ក៏ត្រូវបានជំនួសដោយលោក Eiji Toyoda និងលោក Shoichi Saito ហើយពួកគាត់ក៏បានផ្ដោតជាចម្បងទៅលើគុណភាពនិងប្រសិទ្ធភាព រហូតក្នុងឆ្នាំ១៩៦៥ ក្រុមហ៊ុនតូយ៉ូតាត្រូវបានប្រគល់ពានរង្វាន់ Deming Prize ចំពោះសមិទ្ធផលទៅលើការគ្រប់គ្រងគុណភាពរបស់ពួកគេ។ បច្ចុប្បន្នតូយ៉ូតាគឺជារោងចក្រឧស្សាហកម្មយានយន្តដំបូងគេបង្អស់ដែលបានផលិតយានយន្តច្រើនរហូតដល់ចំនួន១០លានគ្រឿងក្នុង១ឆ្នាំៗ និងជាក្រុមហ៊ុនទី៥ដែលរកបានចំណូលច្រើនជាងគេបំផុតនៅលើពិភពលោកចាប់តាំងពីឆ្នាំ២០១៦នេះផងដែរ៕
ប្រភព៖ www.successprinciplesonline.com ប្រែសម្រួល៖ ស្រីពៅ
