ចំណុច៣យ៉ាងដែលអាចជួយអ្នកឲ្យមានសេរីភាពហិរញ្ញវត្ថុក្នុងវ័យខ្ទង់២០ឆ្នាំ
នរណាម្នាក់ក៏ចង់មានសេរីភាពហិរញ្ញវត្ថុផងដែរ ប៉ុន្តែពុំមានមនុស្សជាច្រើននាក់មានសេរីភាពហិរញ្ញវត្ថុនោះទេ។ សេរីភាពហិរញ្ញវត្ថុមិនមែនត្រឹមតែលទ្ធភាពក្នុងការរកប្រាក់ចំណូល តែវាជាប់ទាក់ទងទៅនឹងការវាយចាយនិងការសន្សំលុយផងដែរ។ យុទ្ធសាស្ត្រទាំង៣ខាងក្រោមនេះនឹងជួយអ្នកមានសេរីភាពហិរញ្ញវត្ថុនៅវ័យម្ភៃឆ្នាំ៖
១) គោលដៅ៖ ប្រសិនអ្នកពុំមានគោលដៅក្នុងការសន្សំលុយដើម្បីអ្វីមួយ អ្នកនឹងមិនចាប់ផ្ដើមឡើយ។ ទោះបីជាអ្នកចាប់ផ្ដើម ប៉ុន្តែប្រសិនអ្នកគ្មានកម្លាំងចិត្តក្នុងការសន្សំ អ្នកក៏ពុំអាចមានវិន័យលើខ្លួនឯងផងដែរ។ ដូច្នេះហើយ អ្នកត្រូវតែមានគោលដៅ។
២) សន្សំលុយ៖ អ្នកណាតែចង់មានសេរីភាពហិរញ្ញវត្ថុ ការសន្សំគឺជារឿងចាំបាច់ជាទីបំផុត។ អ្នកដែលសល់ប្រាក់ច្រើន ភាគច្រើនសុទ្ធតែមានទម្លាប់ក្នុងការសន្សំប្រាក់ពីវ័យក្មេងទៅ។ ហើយដោយសារតែប្រាក់សន្សំទាំងអស់ អ្នកអាចយកទៅវិនិយោគនិងបង្កើនចំណូលបន្ថែមទៀត។
៣) បង្កើនប្រាក់ចំណូល៖ មិនថាអ្នកមានគំនិតសន្សំលុយឬពូកែសន្សំលុយយ៉ាងណាក៏ដោយ ប្រសិនអ្នកមិនរកលុយ តើអ្នកមានលុយឯណាទៅសន្សំសម្រាប់សេរីភាពហិរញ្ញវត្ថុទៅ? ដូច្នេះហើយ អ្នកត្រូវរកវិធីដើម្បីបង្កើនប្រាក់ចំណូលរបស់អ្នក។ រកចំណូលបានកាន់តែច្រើន កាន់តែល្អ៕
ដោយ៖ អឹុង មុយយូ
