សិស្សានុសិស្សត្រូវតែមានជំនាញទាំងបីយ៉ាងនេះសម្រាប់វិថីជោគជ័យក្នុងជីវិត
ក្រោយពីបញ្ចប់ការសិក្សាថ្នាក់ទី១២ ប្អូនៗក្រៅពីធ្វើការសម្រេចចិត្តជ្រើសរើសមុខជំនាញសម្រាប់បន្តការសិក្សានៅថ្នាក់ឧត្ដមសិក្សាដើម្បីភាពជោគជ័យនាថ្ងៃអនាគត មិនថាប្អូនសិក្សាមុខជំនាញអ្វីនោះទេ ជំនាញបីយ៉ាងនេះគឺជាអ្វីដែលប្អូនមិនអាចអត់បាន៖
១) ជំនាញបច្ចេកទេស៖ ជំនាញបច្ចេកទេសគឺជាជំនាញដែលអត់មិនបានព្រោះវាជាជំនាញដែលជួយអ្នករកការងារធ្វើនិងរកប្រាក់ចំណូល។ ប៉ុន្តែ មិនថាប្អូនសិក្សាជំនាញបច្ចេកទេសអ្វីក៏ដោយ ប្អូនត្រូវតែសិក្សាវាឲ្យបានច្បាស់និងមានលទ្ធភាពក្នុងការប្រើប្រាស់ក្រោយបញ្ចប់ការសិក្សា។ ឧទាហរណ៍ថាប្អូនសិក្សាពេទ្យ ប្អូនត្រូវតែមានវិជ្ជាជីវៈគ្រប់គ្រាន់ក្នុងការព្យាបាលអ្នកជំងឺ។
២) ជំនាញមនុស្ស៖ ជំនាញមនុស្សគឺការធ្វើការជាក្រុម។ ក្នុងស្ថាប័ន វាជៀសមិនផុតឡើយក្នុងការធ្វើការជាក្រុមឬជាមួយអ្នកដទៃ។ ដូច្នេះហើយ អ្នកត្រូវចេះសម្រកខ្លួននិងស្គាល់កាលៈទេសៈក្នុងការធ្វើការរួមគ្នាប្រសិនអ្នកចង់ជោគជ័យក្នុងស្ថាប័នរបស់អ្នក។ បើអ្នកមិនអាចធ្វើការជាក្រុមនោះ មិនថាអ្នកពូកែយ៉ាងណាក៏គេមិនទទួលយកអ្នកដែរ។
៣) ជំនាញក្នុងការគិត៖ ជំនាញក្នុងការគិតគឺជាជំនាញក្នុងការគិតឲ្យបានស៊ីជម្រៅនិងគិតឲ្យបានវែងឆ្ងាយ។ វាពិតជាសំខាន់ខ្លាំងណាស់ព្រោះជំនាញនេះនឹងជួយអ្នកដោះស្រាយបញ្ហានិងជៀសវាងពីបញ្ហា។ល។ មានជំនាញមួយនេះស្នើនឹងអ្នកមានលុយ១ម៉ឺនដុល្លារឯណោះ៕
ដោយ៖ អឹុង មុយយូ
