ទទួលស្គាល់ការពិត តែមិនមែនអោនក្បាលទទួលយកវានោះទេ
ទោះជាអ្នកគិតថាអាចទៅរួចឬមិនអាចទៅរួចក៏ដោយ ចុងក្រោយអ្នកនៅតែត្រូវដូច្នោះ ព្រោះអ្នកនិងការពិតរបស់អ្នកនឹងក្លាយជាអ្វីដែលអ្នកបានគិត។ អ្នកមិនអាចសម្រេចអ្វីមួយបានជោគជ័យដោយមិនមានការជឿជាក់លើខ្លួនឯងជាមុនសិននោះទេ។ អ្នកមិនអាចយកឈ្នះលើឧបសគ្គនិងការសង្ស័យរបស់អ្នកដទៃមកលើសក្ដានុពលរបស់អ្នកបាននោះទេ បើអ្នកមិនទាន់អាចយកឈ្នះលើសំឡេងអវិជ្ជមានដែលតែងខ្សឹបប្រាប់អ្នកថាអ្នកអសមត្ថភាពមិនអាចធ្វើវាបាន ឬមានខ្លួនឯងជាសត្រូវរបស់ខ្លួនឯងនោះ។ បើអ្នកចង់ផ្លាស់ប្ដូរពិភពលោក អ្នកត្រូវផ្លាស់ប្ដូរខ្លួនឯងជាមុនសិន។
អ្នកមិនអាចចៀសផុតបានឡើយពីការរិះគន់និងការសង្ស័យរបស់មនុស្សជុំវិញខ្លួន ដែលមានមកលើសក្ដានុពលរបស់អ្នកក្នុងការសម្រេចគោលដៅអ្វីមួយដោយជោគជ័យទៅតាមការរំពឹងទុករបស់អ្នក។ ពួកគេទាំងនោះអាចនិយាយត្រូវដែលថាអ្នកដេកស្រមើស្រមៃជ្រុលទាំងកណ្ដាលថ្ងៃត្រង់ និងការណ៍ដែលអ្នកកុហកខ្លួនឯងនិងមិនទទួលស្គាល់ការពិតពីស្ថានភាពជាក់ស្ដែងរបស់អ្នក។
ពួកគេនិយាយត្រឹមត្រូវហើយ ប៉ុន្តែការណ៍ដែលអ្នកមានជីវិតមករស់នៅក្នុងពិភពលោកនេះ គឺមិនមែនដើម្បីអោនក្បាលចុះទទួលយកការពិតទាំងនោះឡើយ អ្នកនៅតែទទួលស្គាល់ការពិតជាការពិត ប៉ុន្តែគោលដៅរបស់អ្នកក្នុងលោកនេះគឺដើម្បីបង្កើតការពិត ផ្លាស់ប្ដូរការពិតឲ្យល្អប្រសើរ។ តើអ្នកអាចផ្លាស់ប្ដូរការពិតដោយទទួលស្គាល់ការពិត អោនក្បាលទទួលយកការពិតទាំងនោះ និងអង្គុយចាំតែបន្ទោសសង្គមនិងមនុស្សខាងក្រៅដែលបង្ករឿងសោកនាដកម្មទាំងនោះឡើងឬ ? បើអ្នកធ្វើបែបនេះ អ្នកមិនអាចផ្លាស់ប្ដូរអ្វីឡើយ។
ការរអ៊ូរទាំនិងទម្លាក់កំហុសទៅឲ្យកត្តាខាងក្រៅមិនអាចកែប្រែអ្វីឲ្យល្អប្រសើរនោះឡើយ ផ្ទុយទៅវិញវាគឺជារបៀបនៃការរស់នៅមួយដែលបង្រៀនអ្នកឲ្យក្លាយជាមនុស្សទន់ខ្សោយ អាត្មានិយម និងជាទាសករឬជនរងគ្រោះរបស់សង្គមនិងមនុស្សជុំវិញខ្លួនអ្នក។ អ្នកមិនមែនវង្វេងវង្វាន់មិនស្គាល់ថាការពិតជាអ្វីនោះទេ អ្នកទទួលស្គាល់វាប៉ុន្តែមិនអោនក្បាលទទួលយកវានោះឡើយ ហើយអ្នកក៏មិនអាចផ្លាស់ប្ដូរបានដោយការបន្ទោសរំពឹងទុកឲ្យពិភពលោកខាងក្រៅផ្លាស់ប្ដូរ នោះជីវិតអ្នកនឹងផ្លាស់ប្ដូរទៅជាល្អប្រសើរដូចដែលអ្នកធ្លាប់រំពឹងចង់បាននោះដែរ។ អ្នកត្រូវចាប់ផ្ដើមដោយផ្លាស់ប្ដូរខ្លួនឯងជាមុនសិន។
ហើយអ្នកយកអ្វីមកផ្លាស់ប្ដូរ ? គ្មានអ្វីក្រៅពីចំណេះដឹងរបស់អ្នកនោះឡើយ។ ដូចអតីតប្រធានាធិបតីអាហ្វ្រិកខាងត្បូង លោក នេលស៊ុន មេនដេឡា បានពោលថា៖ "ចំណេះដឹងគឺជាអាវុធដ៏ខ្លាំងក្លាបំផុតដែលអ្នកអាចប្រើប្រាស់ដើម្បីផ្លាស់ប្ដូរពិភពលោកបាន"។ នៅលើលោកនេះគ្មានអ្វីដែលមានដែនកំណត់នោះទេ គឺមានតែភាពល្ងង់ខ្លៅរបស់មនុស្សប៉ុណ្ណោះ៕
ដោយ៖ ស្រីពៅ
