មេរៀនជីវិតដ៏មានតម្លៃពីលោក បិនចាមិន ហ្វ្រេនឃ្លីន បិតាស្ថាបនិកសហរដ្ឋអាមេរិក
តើអ្នកដឹងទេថា រូបបុរសម្នាក់ដែលត្រូវបានបង្ហាញនៅលើក្រដាសប្រាក់អាមេរិក១០០ដុល្លារមួយសន្លឹកនេះគឺជានរណា ? តើលោកមានតម្លៃប៉ុណ្ណាសម្រាប់ប្រជាជនអាមេរិក ? តើការលះបង់របស់លោកមានអ្វីខ្លះទើបអាចឲ្យអាមេរិកកសាងប្រវត្តិសាស្ត្ររបស់ខ្លួននៅក្នុងពិភពលោកនេះបាន ?
ប្រភពរូប៖ Pixabay
រូបភាពរបស់បុរសដែលមាននៅលើក្រដាសប្រាក់១០០ដុល្លារសហរដ្ឋអាមេរិកនេះ គឺជារូបរបស់រដ្ឋបុរសអាមេរិក លោក បិនចាមិន ហ្វ្រេនឃ្លីន (Benjamin Franklin)។ ឆាកជីវិតរបស់លោកតាំងពីដើមរហូតដល់ចប់គឺជាការលះបង់បម្រើប្រយោជន៍រួម ដើម្បីទាមទាររកសិទ្ធិសេរីភាពនិងបង្រួបបង្រួមប្រជាជាតិអាមេរិកឲ្យចូលមកជាសង្គមជាតិតែមួយ អំឡុងពេលដែលអាមេរិកស្ថិតនៅក្រោមការគ្រប់គ្រងរបស់ចក្រភពអង់គ្លេសនៅឡើយ។ រដ្ឋបុរសរបស់អាមេរិករូបនេះគឺជាអ្នកដែលបានរួមចំណែកដ៏សំខាន់ក្នុងការកសាងសហរដ្ឋអាមេរិក ដែលជាមូលហេតុមួយដែលនាំឲ្យប្រវត្តិសាស្ត្រពិភពលោកតែងតែផ្ដល់កិត្តិសព្ទដល់លោកក្នុងនាមជាបិតាស្ថាបនិកសហរដ្ឋអាមេរិក។
អ្វីដែលរឹតតែសំខាន់ជាងនេះទៅទៀតគឺ លោកគឺជាមនុស្សតែម្នាក់គត់ដែលបានចុះហត្ថលេខាក្នុងកិច្ចព្រមព្រៀងសំខាន់ៗចំនួន៤ច្បាប់ដែលរួមចំណែកក្នុងការស្ថាបនាអាមេរិក ក្នុងនោះមានសេចក្ដីប្រកាសទាមទារឯករាជ្យក្នុងឆ្នាំ១៧៧៦ កិច្ចព្រមព្រៀងសម្ព័ន្ធមិត្តជាមួយបារាំងក្នុងឆ្នាំ១៧៧៨ កិច្ចព្រមព្រៀងសន្តិភាពនៅទីក្រុងប៉ារីសជាមួយចក្រភពអង់គ្លេសក្នុងឆ្នាំ១៧៨៣ និងរដ្ឋធម្មនុញ្ញរបស់អាមេរិកក្នុងឆ្នាំ១៧៨៧។
ក្រៅពីជាបិតាស្ថាបនិកអាមេរិកដ៏សំខាន់មួយរូបហើយ អ្នកវិទ្យាសាស្ត្ររូបនេះថែមទាំងជាអ្នកដែលបានរកឃើញថារន្ទះបាញ់គឺជាអគ្គិសនី តាមរយៈការពិសោធន៍បង្ហោះខ្លែងដ៏ល្បីល្បាញបំផុតមួយរបស់លោក ព្រមទាំងបានបង្កើតពាក្យបច្ចេកទេសសម្រាប់ប្រើប្រាស់ក្នុងភាសាអគ្គិសនីជាច្រើនផងដែរ។ គាត់ក៏ជាអ្នកច្នៃប្រឌិតបង្កើតវត្ថុដែលក្នុងនោះមានដូចជា កែវយឹត ឧបករណ៍តន្ត្រីអាម៉ូនីកា និងឡដុតកម្ដៅដែលប្រើប្រាស់ធ្យូងថ្មតិចជាងមុន តែចំណេញកម្ដៅជាងមុន។
មិនតែប៉ុណ្ណោះអ្នកជំនួញដ៏មានទ្រព្យស្ដុកស្ដម្ភរូបនេះថែមទាំងជាអ្នកបោះពុម្ពផ្សាយដ៏ល្បីឈ្មោះបោះសំឡេងផងដែរ។ សូម្បីតែចុងក្រោយនៃឆាកជីវិតរយៈពេល៨៤ឆ្នាំដែលពោរពេញដោយការលះបង់បម្រើប្រយោជន៍ជាតិរបស់លោក លោកបានបរិច្ចាគប្រាក់របស់លោកឲ្យទីក្រុងបុសស្តុន (Boston) និងទីក្រុងហ្វីឡាដេលហ្វីយ៉ា (Philadelphia) ដែលពេលក្រោយមកក៏បង្កើតបានជាសាលា សារមន្ទីរវិទ្យាសាស្ត្រ ជំនួយអាហារូបករណ៍ និងគម្រោងដទៃផ្សេងទៀតក្នុងសហគមន៍ផងដែរ។
ខាងក្រោមនេះគឺជាមេរៀនជីវិតសំខាន់ៗ២ចំណុចដែលបិតាស្ថាបនិកអាមេរិករូបនេះបានបន្សល់ទុកសម្រាប់មនុស្សជំនាន់ក្រោយ៖
១) កុំបញ្ឈប់ការសិក្សារៀនសូត្រឲ្យសោះ៖ នៅក្នុងតារាងកាលវិភាគប្រចាំថ្ងៃរបស់លោកខាងក្រោមនេះ អ្នកនឹងសង្កេតឃើញថាលោក ហ្វ្រេនឃ្លីន គឺជាបុគ្គលមួយរូបដែលបានបង្រៀនយើងឲ្យស្គាល់នូវតម្លៃនៃពេលវេលា។ គាត់មានទំនួលខុសត្រូវលើការងាររាប់ជំពូក ប៉ុន្តែគាត់នៅតែអាចស្វែងរកពេលវេលាជារៀងរាល់ថ្ងៃដើម្បីដុសខាត់សំលៀងកាំបិតចំណេះដឹងរបស់ខ្លួនឲ្យមុតជានិច្ច។ គាត់ក៏បានឲ្យយើងរៀនសូត្រដឹងថា មនុស្សដែលខ្ជះខ្ជាយពេលវេលារបស់ពួកគេឥតប្រយោជន៍ មានន័យថាបុគ្គលនោះមិនទាន់រកឃើញពីតម្លៃនៅក្នុងជីវិតរបស់ពួកគេនោះឡើយ។
២) បង្កើតផែនការត្រៀមទុកជាមុន៖ គាត់គឺជាមនុស្សដែលឆាប់ចូលគេង ហើយក៏ឆាប់ភ្ញាក់ពីគេងដែរ។ ខុសស្រឡះពីជីវិតរស់នៅបច្ចុប្បន្នដែលធ្វើឲ្យជីវិតប្រែជាគ្មានអត្ថន័យនិងគ្មានប្រសិទ្ធភាព គាត់បានចំណាយពេលវេលា៣ម៉ោងទៅលើការជម្រះខួរក្បាលឲ្យជ្រះស្រឡះល្អមុននឹងចាប់ផ្ដើមការងារ។ គាត់ក៏បាននិយាយថា បើអ្នកបរាជ័យក្នុងការត្រៀមខ្លួន នោះអ្នកនឹងត្រៀមខ្លួនសម្រាប់ការបរាជ័យ។ ការប្រើប្រាស់ពេលវេលាដ៏ឈ្លាសវៃរយៈពេល៣ម៉ោងយ៉ាងស្ងប់ស្ងាត់នៅពេលព្រឹកនេះ នឹងអាចឲ្យលោកត្រឡប់រិះគិតមកលើដំណោះស្រាយដែលលោកបានប្រើប្រាស់ និងអាចរៀបចំផែនការត្រៀមខ្លួនតាមសម្រួលសម្រាប់ដោះស្រាយបញ្ហាសំខាន់ៗក្នុងការងារបានយ៉ាងមានប្រសិទ្ធភាព៕
ដោយ៖ ស្រីពៅ
