ហេតុអ្វីអ្នកគួរស្វែងរកតម្លៃនៅក្នុងឧបសគ្គនៃជីវិតរបស់អ្នក?
របស់ដែលបានមកដោយស្រួល ពេលបាត់បង់ទៅវិញក៏ស្រួលដូចគ្នាដែរ។ នៅលើលោកនេះ តើនរណាម្នាក់ដែលមិនធ្លាប់ជួបប្រទះបញ្ហាសោះក្នុងជីវិត ? ជីវិតដែលមិនធ្លាប់ជួបបញ្ហាសោះគ្មានតម្លៃអ្វីបន្តិចនោះទេ។ មិនថាខណៈពេលនេះ អ្នកកំពុងតែជួបប្រទះនឹងអ្វីក៏ដោយ អ្នកត្រូវចាំថាអ្នកមានសក្ដានុពលហួសពីអ្វីដែលអ្នកអាចធ្លាប់គិតដល់ទៅទៀត គ្រប់យ៉ាងគឺស្ថិតនៅលើការគិតរបស់អ្នកប៉ុណ្ណោះ។
បើឧបសគ្គនៅខាងក្រៅកំពុងតែមករារាំងដំណើរអ្នក ចូរអ្នកធ្វើខ្លួនឯងឲ្យខ្លាំងជាងឧបសគ្គនោះ។ នៅពេលអ្នកជួបការលំបាក ចូរអ្នកក្រឡេកមើលមនុស្សជុំវិញខ្លួនអ្នក នោះអ្នកនឹងដឹងថាតាមពិតទៅអ្នកនេះឯងគឺជាមនុស្សដែលសំណាងជាពួកគេទៅទៀត។ ជីវិតមួយនេះអាចនឹងមានការលំបាកជាច្រើនមកបន្តបន្ទាប់គ្នា ប៉ុន្តែអ្នកមិនត្រូវទួញសោកស្រណោះអាណិតខ្លួនឯងនោះទេ ព្រោះការណ៍ដែលអ្នកធ្វើបែបនេះមានន័យថាអ្នកកំពុងបន្ទាបខ្លួនឯងឲ្យទន់ខ្សោយហើយ គឺអ្នកធ្វើឲ្យខ្លួនឯងជាអ្នកចាញ់ដោយខ្លួនឯង។ កុំបន្ទោសសង្គម គ្រួសារ មិត្តភ័ក្ដិ ឬមនុស្សនៅខាងក្រៅណាទាំងអស់ តែបន្ទោសខ្លួនឯងវិញទៅ ព្រោះគ្មាននរណាម្នាក់ជាសត្រូវរបស់អ្នក ដូចជាអ្នកខ្លួនឯងនោះឡើយ។ ការគិតរបស់អ្នកជាអ្នកតាក់តែង គូរវាស ឆ្លាក់ឆ្នៃ និងបង្កើតនូវការពិតទាំងឡាយរបស់អ្នកឡើង។
បើអ្នកចង្អុលអ្នកដទៃចំពោះរាល់អ្វីៗដែលអ្នកទទួលបាននៅក្នុងជីវិត នោះមានន័យថាអ្នកលែងមានម្ចាស់ការលើជីវិតរបស់ខ្លួនឯងហើយ។ ការគិតរបស់អ្នកដទៃចំពោះអ្នកមានឥទ្ធិពលលើអ្នកឬអត់អាស្រ័យទៅលើថាតើអ្នកអនុញ្ញាតឲ្យពួកគេកំណត់ទៅលើសេចក្ដីសុខឬសេចក្ដីទុក្ខរបស់អ្នកឬអត់។ អ្វីដែលធ្វើឲ្យមនុស្សជោគជ័យជោគជ័យមិនមែនដោយសារតែពួកគេមិនធ្លាប់បរាជ័យនោះទេ ប៉ុន្តែគឺដោយសារតែពួកគេធ្លាប់បរាជ័យច្រើនរាប់មិនអស់នេះឯង។ ពួកគេមិនសម្លឹងឃើញការបរាជ័យជារឿងអាក្រក់នោះទេ។ ពួកគេសម្លឹងឃើញវាជាមេរៀន មេរៀនជីវិតដ៏មានតម្លៃដែលគ្មាននរណាគេបង្រៀននៅក្នុងសាលា ព្រោះសាលាបង្រៀនតែរឿងជោគជ័យនោះទេ តែមនុស្សអាចជោគជ័យក្នុងជីវិតបានដោយសាកល្បងអ្វីថ្មីនិងរៀនពីវាពេលមានកំហុស រៀនដឹងថាវិធីនេះមិនប្រើការកើតព្រោះមូលហេតុអ្វី ហើយពួកគេអាចកែប្រែរកវិធីត្រឹមត្រូវបានដោយរបៀបណាវិញ ?
មនុស្សបរាជ័យប្រាកដ គឺបរាជ័យនៅត្រង់ចាញ់ខ្លួនឯងនេះហើយ។ ពួកគេចាញ់ខ្លួនឯង ក្លាយជាទាសករនៃការគិតរបស់ខ្លួនឯង ដែលប្រាប់ពួកគេថាគ្មានផ្លូវអាចទៅរួចទេ។ ចូរធ្វើខ្លួនឯងឲ្យខ្លាំងជាងឧបសគ្គរបស់អ្នក ខ្លាំងជាងរហូតទាល់តែឧបសគ្គអ្វីក៏អ្នកលែងខ្លាចនឹងជួបទាំងអស់។ កុំប្រាថ្នាឲ្យជីវិតរបស់អ្នកស្រួល តែបើអ្នកអាចប្រាថ្នាបាន ចូរប្រាថ្នាឲ្យខ្លួនឯងខ្លាំងក្លានិងរឹងមាំជាងមុនវិញ ហើយក៏គ្មានឧបសគ្គឯណាអាចយកឈ្នះលើចិត្តអំណត់អត់ធ្មត់តស៊ូរបស់មនុស្សបាននោះឡើយ៕
ដោយ៖ ស្រីពៅ
