ចំណុចទាំង៥យ៉ាងដែលមានតម្លៃលើសពីលុយ
មនុស្សមួយចំនួនយល់ថាលុយគឺជាវត្ថុដែលសំខាន់បំផុតក្នុងឆាកជីវិត ពោលគឺពួកគាត់គិតថាមានលុយគឺមានអ្វីៗទាំងអស់។ មនុស្សដែលយល់ឃើញបែបនេះនឹងក្លាយជាទាសករនៃលុយនិងអនុញ្ញាតឲ្យលុយមកគ្រប់គ្រងជីវិតរបស់ពួកគេ។ លុយពិតជាសំខាន់ ប៉ុន្តែមានចំណុចមួយចំនួនទៀតដែលមានតម្លៃថ្លៃជាងលុយទៅទៀតព្រោះអ្នកមិនអាចទិញ មិនថាអ្នកមានលុយច្រើនដល់កម្រិតណា។ ខាងក្រោមនេះជាចំណុចទាំង៥យ៉ាងដែលលុយមិនអាចទិញបាន៖
១) បទពិសោធន៍៖ អ្នកមិនអាចទិញបទពិសោធន៍ដោយលុយនោះទេ។ ប្រសិនអ្នកជាបុគ្គលិក អ្នកត្រូវចុះធ្វើការដើម្បីបានបទពិសោធន៍។ ប្រសិនអ្នកទៅដើរលេងនៅក្រៅប្រទេស បើទោះបីជាអ្នកចំណាយលុយក៏ពិតមែន ប៉ុន្តែបទពិសោធន៍ដែលអ្នកទទួលបានគឺមានតម្លៃយ៉ាងលើសលប់។
២) ប្រាជ្ញា៖ ប្រសិនអ្នកគិតថាអ្នកចេះហើយ នោះអ្នកមិនមែនជាមនុស្សដែលឆ្លាតនោះទេ។ អ្នកដែលឆ្លាតពិតប្រាកដគឺបន្តការរៀនសូត្រ បន្តការអភិវឌ្ឍន៍ព្រោះពួកគេដឹងថាមានចំណេះដឹងជាច្រើនដែលពួកគេត្រូវរៀនបន្ថែម។ ចំណេះដឹងកើតចេញពីការរៀនសូត្រ ហើយចំណេះដឹងនិងប្រាជ្ញានេះហើយដែលជួយឲ្យកើនទ្រព្យហើយចោរលួចមិនបាន។
៣) ចំណងអាពាហ៍ពិពាហ៍៖ ការទទួលយកដៃគូជីវិតអាចជារឿងលំបាកហើយក៏ជាបទពិសោធន៍មួយដែលផ្លាស់ប្ដូរជីវិតរបស់អ្នកទាំងស្រុងដែរ។ ប៉ុន្តែ វាមានតម្លៃព្រោះថាដៃគូជីវិតអាចជាមនុស្សដែលលើកទឹកចិត្ត ជឿជាក់លើអ្នកនិងជំរុញឲ្យអ្នកក្លាយជាមនុស្សដែលប្រសើរជាងមុន។
៤) មិត្តភាព៖ វាមិនមែនជារឿងងាយនោះទេប្រសិនអ្នករកឃើញមនុស្សដែលមានចំណង់ចំណូលចិត្តដូចអ្នក។ ហើយ វាកាន់តែអស្ចារ្យទៅទៀតប្រសិនអ្នករកឃើញមិត្តល្អដែលជួយអ្នកក្នុងគ្រាលំបាក មិនបោះបង់ចោលអ្នកនិងជួយរកដំណោះស្រាយបញ្ហាជាមួយនឹងគ្នា។ មិត្តល្អមិនអាចទិញបានទេ។
៥) សុខភាព៖ បើទោះបីជាលុយអាចជួយព្យាបាលជំងឺរបស់អ្នកនិងជួយឲ្យអ្នករស់នៅបានយូរ តែប្រសិនអ្នកគ្មានសុខភាពល្អ រស់នៅបានយូរមានតែធ្វើឲ្យអ្នកកាន់តែឈឺចាប់។ សុខភាពល្អគឺមិនអាចទិញដោយលុយ។ អ្នកត្រូវធ្វើលំហាត់ប្រាណនិងប្រយ័ត្នចំពោះចំណីអាហារដែលអ្នកពិសា៕
ដោយ៖ អុឹង មុយយូ
