ហេតុផល៤យ៉ាង ដែលបញ្ជាក់ថាអ្នកមានភាពខ្លាំងលើសពីអ្វីដែលខ្លួនគិត
មានថ្ងៃខ្លះអ្នកមានអារម្មណ៍ថាខ្លួនឯងអន់ ទន់ជ្រាយ គ្មានប្រយោជន៍។ល។ អ្នកចង់បោះបង់ចោលនូវអ្វីៗគ្រប់យ៉ាងព្រោះអ្នកគិតថាអ្នកគ្មានថ្ងៃនឹងជោគជ័យឡើយ។ ពិតប្រាកដណាស់ថាឧបសគ្គតែងតែមានក្នុងជីវិត មានពេលខ្លះអ្នកស្ទើរតែដួលដោយសារតែបញ្ហាមួយហ្នឹងហើយភ្លេចគិតដល់បញ្ហារាប់រយដែលអ្នកធ្លាប់ជម្នះមកហើយ។ ខាងក្រោមនេះជាហេតុផល៤យ៉ាងដែលសំអាងថាអ្នករឹងមាំលើសពីអ្វីដែលអ្នកគិត៖
១) អ្នកមិនបោះបង់ចោល៖ បើទោះបីជាអ្នកនៅមិនទាន់ឃើញលទ្ធផលឬទទួលបានការបរាជ័យជាច្រើនលើកច្រើនសារមកហើយ អ្នកនៅតែមិនបោះបង់ចោលនូវក្តីសុបិន ការខិតខំនិងការជឿជាក់។ អ្នកនៅតែរឹងមាំឆ្ពោះទៅរកគោលដៅរបស់អ្នក។
២) អ្នកមិនចងគំនុំ៖ អ្នកដឹងហើយថាការខឹងឬការសងសឹកមានតែធ្វើឲ្យអ្នកកាន់តែឈឺចាប់និងខ្ជះខ្ជាយពេលវេលារបស់អ្នក។ អ្នកតែងតែបំភ្លេចចោលនូវអ្វីដែលអ្នកដទៃបានធ្វើចំពោះអ្នក។ ហើយអ្នករឹងមាំដោយសារតែអ្នកអាចលើកលែងឲ្យអ្នកដទៃ។
៣) អ្នកឈរលើអ្វីដែលអ្នកជឿជាក់៖ បើទោះបីជាអ្នកស្ដាប់មតិយោបល់របស់អ្នកដទៃ តែអ្នកនៅតែធ្វើនូវអ្វីដែលអ្នកចង់ធ្វើ។ ម៉្យាងវិញទៀត បើទោះបីជាមនុស្សមិនយល់ស្រប អ្នកនៅតែតាមគំនិតខ្លួនឯងជានិច្ច។
៤) អ្នកដឹងពីចំណុចខ្វះខាត ៖ អ្នកដឹងថាខ្លួនឯងមិនមែនជាមនុស្សល្អឥតខ្ចោះនោះទេ។ ម៉្យាងវិញទៀត អ្នកដឹងថាចំណុចខ្វះខាតរបស់អ្នកគឺអាចកែប្រែបានដោយអ្នកត្រូវការពេលវេលានិងការតាំងចិត្ត៕
ប្រែសម្រួល៖ អឹុង មុយយូ ប្រភព៖ Bornrealist.com
