មេរៀនជីវិតទាំង៤យ៉ាងដែលអ្នកមិនបានរៀននៅសាលា
ឪពុកម្ដាយគ្រប់រូបតែងបញ្ជូនកូនឲ្យទៅសាលារៀនដើម្បីក្រេបយកចំណេះដឹងដោយសង្ឃឹមថានឹងអាចជួយឲ្យកូនពួកគាត់ទទួលបានភាពជោគជ័យនៅក្នុងជីវិត។ ថ្វីត្បិតតែចំណេះដឹងពីសាលាអាចជួយបានមួយផ្នែកធំក៏ពិតមែន ប៉ុន្តែសាលារៀនមិនបានបង្រៀនមេរៀនជីវិតឡើយ។ ខាងក្រោមនេះជាមេរៀនជីវិតទាំង៤យ៉ាងដែលអ្នកគួរដឹងសម្រាប់ភាពជោគជ័យក្នុងជីវិត៖
១) គ្មានទេយុត្តិធម៌ក្នុងជីវិត៖ ពេលខ្លះអ្នកជាមនុស្សឆ្លាត ខិតខំធ្វើការនិងស្មោះត្រង់ចំពោះក្រុមហ៊ុន តែក៏មិនពិតប្រាកដថាអ្នកនឹងទទួលបានការដំឡើងឋានៈឬប្រាក់ខែឡើយ។ ជីវិតគឺវាបែបនេះឯង វាមិនផ្ដល់ឲ្យនូវអ្វីដែលអ្នកគិតថាអ្នកស័ក្ដិសមឡើយ ដូច្នេះហើយ អ្នកត្រូវតែដឹងនិងទទួលស្គាល់គ្មានទេយុត្តិធម៌ក្នុងជីវិត ប៉ុន្តែចូរអ្នកបន្តខិតខំបើទោះបីជាគ្មានអ្នកឲ្យតម្លៃ។
២) ភាពល្បីល្បាញពិតជាអាចជួយអ្នកបាន៖ ភាពល្បីល្បាញពិតជាអាចជួយអ្នកឲ្យជោគជ័យក្នុងជីវិតបាន។ វាគឺជាជំនាញទំនាក់ទំនងមួយដែលមនុស្សគ្រប់រូបគួរតែមាន ព្រោះវាអាចជួយនៅក្នុងការងារបាន។ ឧទាហរណ៍ថាអ្នកមានកេរ្តិ៍ឈ្មោះល្បីល្បាញក្នុងសាលា ពេលដែលអ្នកដាក់ពាក្យធ្វើការ ក្រុមហ៊ុនអាចនឹងជ្រើសរើសយកអ្នកជាជាងអ្នកដទៃដោយសារតែភាពល្បីល្បាញរបស់អ្នក។
៣) បើអ្នកបរាជ័យ នេះមិនមែនជាកំហុសឪពុកម្ដាយទេ៖ ឈប់បន្ទោសទៅលើ ឪពុកម្ដាយរបស់អ្នកទៀតទៅសម្រាប់ភាពបរាជ័យក្នុងជីវិត អ្នកគួរតែរៀនទទួលខុសត្រូវចំពោះជីវិតខ្លួនឯង។ មនុស្សយើងចូលចិត្តណាស់បន្ទោសអ្នកដទៃ។ ប្រសិនអ្នកចង់ជោគជ័យ អ្នកត្រូវរៀនទទួលស្គាល់កំហុសខ្លួនឯង កែប្រែកំហុសនិងរៀនរស់នៅដោយឯករាជ្យដោយមិនពឹងពាក់លើឪពុកម្ដាយ។
៤) ជីវិតមិនបែងចែកជាឆមាសនោះទេ៖ នៅសាលា ប្រសិនអ្នកប្រលងធ្លាក់ អ្នកអាចប្រលងសងម្ដងហើយម្ដងទៀតរហូតដល់អ្នកប្រលងជាប់។ ក្នុងជីវិតពិតគឺមិនបែបនេះទេ។ ក្នុងសង្គមពិត អ្នកមិនប្រាកដថាមានឱកាសច្រើននោះទេ ហើយជីវិតបន្តទៅរហូត។ ដូច្នេះហើយអ្នកត្រូវប្រុងប្រយ័ត្នចំពោះរាល់ការសម្រេចចិត្ត បើមិនអ៊ីចឹងទេ អ្នកនឹងខាតពេលវេលា៕
ប្រែសម្រួល៖ អុឹង មុយយូ ប្រភព៖ Bornrealist.com
