តិចនិកក្នុងការដោះស្រាយជាមួយមនុស្សពិបាកៗដែលមនុស្សឆ្លាតប្រើប្រាស់
មនុស្សខ្លះពិតជាពិបាកនិយាយគ្នាដល់ហើយ មិនថាអ្នកនិយាយហេតុផលយ៉ាងណានោះទេ ពួកគាត់គិតថាខ្លួនឯងត្រូវរហូត។ ឯអ្នកខ្លះអាចធ្វើឲ្យអ្នកមិនសប្បាយចិត្ត មានអារម្មណ៍មិនល្អនិងធ្វើឲ្យអ្នកខឹងជាដើម។ ប៉ុន្តែ សម្រាប់មនុស្សដែលឆ្លាតគឺមានតិចនិកក្នុងការដោះស្រាយជាមួយមនុស្សពិបាកៗ។ ខាងក្រោមនេះជាគន្លឹះដែលអ្នកអាចរៀនសូត្របាន៖
១) កំណត់ព្រំដែន៖ មនុស្សពិបាកមិនដែលខ្វល់ថាខ្លួនឯងនឹងជះឥទ្ធិពលអាក្រក់ដល់អ្នកដទៃឡើយ ពោលគឺគិតតែខ្លួនឯង។ ឧទាហរណ៍ថាអ្នកជក់បារីជាដើម ពួកគាត់មិនដែលខ្វល់ថាផ្សែងបារីដែលចេញពីបារីរបស់ពួកគាត់នឹងប៉ះពាល់ដល់អ្នកដទៃឡើយ ប៉ុន្តែមនុស្សដែលឆ្លាតមិនបង្ករឿងជាមួយមនុស្សទាំងនោះទេ។ ផ្ទុយទៅវិញ ពួកគាត់ដោះស្រាយជាមួយមនុស្សដែលពិបាកនិយាយគ្នាដោយដកខ្លួនឯងចេញឲ្យឆ្ងាយពីមនុស្សបែបហ្នឹង។
២) នៅឲ្យឆ្ងាយពីមនុស្សអវិជ្ជមាន៖ មនុស្សអវិជ្ជមានច្រើនតែបារម្ភពីនេះពីនោះដោយមិនគិតរកដំណោះស្រាយនោះទេ ម៉្យាងវិញទៀត ពួកគាត់រអ៊ូមិនចប់មិនចេះហើយ។ បើអ្នកនៅជាមួយមនុស្សបែបនេះ អ្នកនឹងក្លាយជាមនុស្សអវិជ្ជមានដូចគ្នា។ មនុស្សឆ្លាតដឹងពីរបៀបដោះស្រាយជាមួយមនុស្សអវិជ្ជមានទាំងនោះ ពួកគាត់មិនបណ្ដោយឲ្យមនុស្សអវិជ្ជមានមកជះឥទ្ធិពលលើពួកគាត់ឡើយ បន្ថែមពីលើនេះ ពួកគាត់នឹងព្យាយាមនៅឲ្យឆ្ងាយព្រោះនេះជាអ្វីដែលពួកគាត់អាចគ្រប់គ្រងបាន។
៣) អត់ធ្មត់៖ ពិតប្រាកដណាស់ថាការដោះស្រាយជាមួយមនុស្សមិននិយាយហេតុផលពិតជាលំបាកមហាសែនលំបាកក៏ពិតមែន ប៉ុន្តែប្រសិនមនុស្សពិបាកទាំងនោះធ្វើអ្វីដែលប៉ះពាល់ដល់អារម្មណ៍ឬធ្វើឲ្យអ្នកខឹងនោះ ចូររក្សាអារម្មណ៍ចិត្តឲ្យបានស្ងប់ ដកដង្ហើមឲ្យវែងៗហើយដកខ្លួនចេញឲ្យឆ្ងាយ ព្រោះថាការឈ្លោះគ្នាជាមួយមនុស្សពិបាកនឹងមិនផ្ដល់ផលប្រយោជន៍អ្វីដល់អ្នកឡើយ៕
ដោយ៖ អុឹង មុយយូ
