អាថ៌កំបាំងទាំងបីនៃគុណភាពជីវិតសម្រាប់ភាពជោគជ័យ
យើងខិតខំប្រឹងប្រែងរាល់ថ្ងៃគឺដើម្បីភាពជោគជ័យនិងភាពរីករាយក្នុងឆាកជីវិត។ ប៉ុន្តែ ការសិក្សានិងការធ្វើការមិនអាចជួយអ្នកឲ្យជោគជ័យនិងរីករាយទាំងស្រុងនោះទេ។ អ្នកត្រូវមានចំណុចបន្ថែមពីលើនេះទៀត។ ខាងក្រោមនេះជាអាថ៌កំបាំងទាំងបីដែលជួយពង្រឹងគុណភាពជីវិតរបស់អ្នក៖
១) គុណភាពផ្ទាល់ខ្លួន៖ គុណភាពមានន័យថាចម្រើនឬល្អប្រសើរឡើង។ ដូច្នេះហើយ គុណភាពផ្ទាល់ខ្លួនគឺជាអ្វីដែលជួយអភិវឌ្ឍន៍ខ្លួនឯងឲ្យរីកចម្រើនជាងមុន។ ក្នុងឆាកជីវិត វាមានចំណុចជាច្រើនដែលអ្នកអាចពង្រឹងខ្លួនឯងបាន។ ឧទាហរណ៍ថាអ្នកគួរតែមានសមត្ថភាពគ្រប់គ្រាន់ក្នុងការបំពេញការងារឲ្យបានល្អ។ អ្នកនឹងមានអារម្មណ៍ថាខ្លួនឯងជាមនុស្សមានផលិតភាពនិងមិនអត់ប្រយោជន៍។ ម៉្យាងវិញទៀត ការសម្រេចផលទាំងនោះក៏អាចជួយរកប្រាក់ចំណូលបន្ថែមក៏មិនដឹង។
២) គុណភាពនៃទំនាក់ទំនង៖ ភាពជោគជ័យពិតជាពិបាកកើតឡើងប្រសិនជាអ្នកគ្មានទំនាក់ទំនងជាមួយអ្នកដទៃព្រោះក្នុងជីវិត អ្នកត្រូវការប្រាស្រ័យទាក់ទងរវាងគ្នានិងគ្នា។ ការចេះទំនាក់ទំនងក៏នឹងជួយបង្កើនឱកាសជាច្រើន ដែលអាចជួយអ្នកជោគជ័យក្នុងជីវិត។ អ៊ីចឹងហើយ ប្រសិនអ្នកជាមនុស្សដែលអៀនច្រើន អ្នកគួរតែពង្រឹងខ្លួនឯងឲ្យចេះនិយាយស្តី ហ៊ាននិយាយទៅកាន់អ្នកដទៃ ចេះដាក់ខ្លួន ចេះរាក់ទាក់នឹងអ្នកដទៃជាដើម។
៣) គុណភាពនៃផ្លូវចិត្ត៖ ផ្លូវចិត្តមានទំនាក់ទំនងយ៉ាងធំធេងនឹងជីវិតរបស់យើងម្នាក់ៗ។ ដូចដែលបានឃើញស្រាប់ ថ្ងៃណាដែលអ្នកពិបាកចិត្តឬមិនសប្បាយចិត្ត អ្នកសឹងតែមិនអាចសម្រេចអ្វីទាំងអស់ ចង់តែដេកជាដើម។ ដូច្នេះហើយ អ្នកត្រូវចេះរក្សាសុខភាពផ្លូវចិត្តឲ្យបានល្អ ចេះគ្រប់គ្រងអារម្មណ៍ខ្លួនឯង មិនអនុញ្ញាតឲ្យអារម្មណ៍អាក្រក់មកប៉ះពាល់ដល់ជីវិតឡើយ។
ដោយ៖ អុឹង មុយយូ
