រឿងតែម្យ៉ាងគត់ដែលស្ត្រីត្រូវតែជម្នះឲ្យបានជាមុន មុននឹងចាប់ផ្ដើមអាជីវកម្មដោយខ្លួនឯង
ចំណេះដឹងគឺជាកូនសោតែមួយគត់ ដែលអាចដោះលែងអ្នកឲ្យមានសេរីភាពចេញពីគុកឃុំឃាំងបាន។ តើគុកឃុំឃាំងនេះគឺជាអ្វី ? ជាគុកឃុំឃាំងសម្រាប់អ្នកប្រព្រឹត្តឧក្រិដ្ឋកម្មអ្វីឬ ? មិនមែនជាគុកប្រភេទនេះទេ តែគឺជាគុកនៃការគិតរបស់ខ្លួនឯងនេះហើយ។
ក្នុងការចាប់ផ្ដើមអាជីវកម្មមួយដោយខ្លួនឯង តើស្ត្រីសុទ្ធតែអសមត្ថភាពជាងបុរសទាំងអស់ឬ ? តើជំនឿបែបនេះមានឫសគល់ចេញមកពីណា ? តើមនុស្សឲ្យនិយមន័យទៅលើសមត្ថភាពនិងចំណេះដឹងរបស់បុគ្គលម្នាក់ដោយផ្អែកទៅលើអ្វី ? តើធម្មជាតិនៃភេទរបស់មនុស្សកំណត់ទៅលើភាពជោគជ័យនិងបរាជ័យរបស់មនុស្សឬ ?
តាំងពីបុរាណកាលមក ស្ត្រីតែងតែត្រូវបានគេពាក់ស្លាកជាភេទដែលទន់ខ្សោយ និងអសមត្ថភាពធ្វើកិច្ចការធំដុំដោយឯកឯង និងមានសិទ្ធិសម្រេចលើកិច្ចការតូចតាចនៅក្នុងជីវិតរបស់ខ្លួនប៉ុណ្ណោះ។ ការគិតរបស់អ្នក ដែលអ្នកជឿជាក់ថាបែបណា គឺបែបនោះហើយនឹងប្រែក្លាយមកជាការពិតរបស់អ្នក និងកំណត់ជោគវាសនារបស់អ្នក។ ខួរក្បាលរបស់បុរសនិងស្ត្រីមានទម្ងន់១.៣គីឡូក្រាមដូចតែគ្នាទេ វាមិនមែនជាបញ្ហារបស់ភេទនោះឡើយ ដែលកំណត់ថាមនុស្សម្នាក់មានជោគជ័យឬអត់ តែវាគឺជាសមត្ថភាពនិងចំណេះដឹងពិតប្រាកដរបស់មនុស្សនោះ ហើយចំណេះដឹងទាំងនោះតើមិនមែនកកើតចេញពីខួរក្បាលដែលមានទម្ងន់ប៉ុនគ្នានេះទេឬ ? ការរើសអើងពីសង្គមមកលើស្ត្រីភេទចំពោះសមត្ថភាពរបស់គាត់ គឺជារឿងដែលមិនអាចលុបបំបាត់ឲ្យអស់ពីសង្គមនោះឡើយ។
ដូច្នេះ ក្នុងនាមជាស្ត្រី យើងមិនអាចផ្ដោតទៅលើអ្វីដែលយើងមិនអាចផ្លាស់ប្ដូរបាននោះទេ តែត្រូវងាកមកផ្ដោតទៅលើអ្វីដែលយើងអាចផ្លាស់ប្ដូរបានជាមុន។ អ្វីដែលយើងអាចផ្លាស់ប្ដូរបាន នោះគឺយើងត្រូវផ្ដោតមកលើចំណេះដឹងរបស់យើង ត្រូវដុសខាត់ចំណេះដឹងខាងក្នុងរបស់យើងឲ្យមុតស្រួច។ ប៉ុន្តែមុននឹងរឿងនេះកើតឡើងបាន លុះត្រាតែយើងត្រូវជឿជាក់លើខ្លួនឯងជាមុនសិនថាយើងអាចធ្វើបាន។ ហេតុអ្វីដុសខាត់ចំណេះដឹងរបស់ខ្លួនឯងជាមុនជារឿងសំខាន់ ?
លោកស្រី Coco Chanel ដែលជាCEOរបស់ក្រុមហ៊ុន Chanel បាននិយាយថា៖ "ដើម្បីឲ្យគេមិនអាចយកនរណាមកជំនួសអ្នកបាន អ្នកត្រូវធ្វើជាមនុស្សដែលលេចធ្លោខុសពីគេសិន"។ នៅពេលអ្នកមានចំណេះដឹង អ្នកនឹងដឹងថាមនុស្សគ្រប់គ្នាសុទ្ធតែមានសក្ដានុពលខ្ពស់ហួសពីអ្វីដែលខ្លួនឯងធ្លាប់គិតដល់ ជាសក្ដានុពលដែលអាចផ្លាស់ប្ដូរជីវិតខ្លួនឯងនិងសង្គមឲ្យល្អប្រសើរ។ នៅពេលអ្នកមានចំណេះដឹង អ្នកនឹងដឹងថាអ្នកមិនត្រូវការការទទួលស្គាល់ពីមជ្ឈដ្ឋានសង្គមមកលើអ្វីដែលខ្លួនឯងយល់ថាត្រឹមត្រូវនោះទេ អ្នកគ្រាន់តែចង់បានការទទួលស្គាល់ពីខ្លួនឯងប៉ុណ្ណោះ ដែលជាការមានជំនឿជឿជាក់ទៅលើខ្លួនឯងនេះហើយ។ ចំណេះដឹងទាំងនោះមានទាំងការសិក្សាទៅលើទីផ្សារ ចំណេះដឹងហិរញ្ញវត្ថុ ជាពិសេសអ្នកក៏ត្រូវមានជំនាញជាក់លាក់របស់ខ្លួនដែរ ដើម្បីដំណើរការណ៍អាជីវកម្មរលូនបាន។
ការស្គាល់ពីចំណុចខ្លាំងរបស់ខ្លួនគឺជាចំណុចខ្លាំងរបស់ខ្លួនឯង ប៉ុន្តែអ្នកក៏ត្រូវស្គាល់ពីចំណុចខ្សោយរបស់ខ្លួនដែរ។ នៅពេលនោះ អ្នកមិនគួរអល់អែករកនរណាដែលអាចក្លាយជាដៃគូសហការដ៏ល្អជាមួយអ្នកនោះឡើយ។ បើទោះជាត្រូវចំណាយថវិកាច្រើនបន្តិចដើម្បីជួលគេមក ក៏អ្នកគួរតែធ្វើដែរ ឲ្យតែគេជាមនុស្សមានបទពិសោធន៍ពិតប្រាកដ។ បើអ្នកជួលមនុស្សមិនសូវចេះមកធ្វើការ ថ្វីត្បិតតែចំណាយតិចជាង តែក្នុងរយៈពេលវែងមនុស្សនេះនឹងធ្វើឲ្យអ្នកខាតបង់លើសដើមជាមិនខាន។ ទោះបីជាអ្នកបានក្លាយជាម្ដាយគេហើយក៏ដោយ ក៏អ្នកអាចចាប់យកក្ដីសុបិនរបស់អ្នកជាម្ចាស់អាជីវកម្មបានដែរ។
នៅក្នុងសង្គម អ្នកនឹងទទួលបាននូវដំបូន្មានជាច្រើនអនេកអំពីការចាប់ផ្ដើមអាជីវកម្ម។ នៅពេលអ្នកស្ដាប់ទៅ ដំបូន្មានទាំងនោះសុទ្ធតែល្អនិងសមហេតុផលទាំងអស់។ ម្នាក់ណែនាំឲ្យចាប់ចេញពីជ្រុងនេះដើម្បីជោគជ័យ ម្នាក់ទៀតណែនាំឲ្យចាប់ចេញពីជ្រុងផ្សេងទៀតនោះអ្នកនឹងជោគជ័យក្នុងអាជីវកម្ម។ ពិតមែនហើយ ដំបូន្មានទាំងនោះសុទ្ធតែល្អទាំងអស់ ប៉ុន្តែអ្នកក៏ត្រូវចាំដែរថា ស្ថានការណ៍និងបទពិសោធន៍ផ្ទាល់ខ្លួនគឺមិនដូចគ្នានោះទេ។
មនុស្សគ្រប់គ្នាសុទ្ធតែដឹងថាចង់រកស៊ីអ្វី ប៉ុន្តែក្នុងចំណោមអ្នកទាំងនោះមានតិចតួចណាស់ដែលអាចឆ្លើយនឹងសំណួរថា ហេតុអ្វីទើបពួកគេចង់ធ្វើអាជីវកម្មមួយនេះ ដែលមិនមែនជាហេតុផលនៃលុយតែម្យ៉ាងនោះឡើយ។ គឺហេតុអ្វីនេះហើយ ដែលជាគោលជំហររបស់អ្នក ជាក្ដីសង្ឃឹមដែលលើកទឹកចិត្តដល់អ្នកគ្រប់ពេលដែលអ្នកជួបនឹងឧបសគ្គ។ ដូច្នេះដំបូន្មាននីមួយៗពីអ្នកជំនាញទាំងឡាយគួរតែយកមកថ្លឹងថ្លែងវិនិច្ឆ័យល្អិតល្អន់ក្នុងស្ថានការណ៍ផ្ទាល់ខ្លួនរបស់អ្នកជាមុនសិន សឹមយកវាទៅអនុវត្ត៕
ដោយ៖ ស្រីពៅ
