ហេតុផល៣យ៉ាងដែលការបរាជ័យជួយអ្នកទៅជាភាពជោគជ័យ
ជាការពិតមិនអាចប្រកែកបាននោះទេ មនុស្សគ្រប់គ្នាសុទ្ធតែធ្លាប់ឆ្លងកាត់នូវភាពបរាជ័យក្នុងជីវិត ហើយពេលខ្លះទៀតវាក៏ឈឺចាប់និងបន្សល់ទុកនូវស្នាមរបួសផងដែរ។ យ៉ាងណាក៏ដោយ ការបរាជ័យមិនមែនជាទីបញ្ចប់ឡើយ។ ការបរាជ័យអាចជាដំណើរថ្មីមួយដែលជួយអ្នកទៅរកភាពជោគជ័យបានប្រសិនជាអ្នកចេះប្រើប្រាស់វាឲ្យបានល្អ។ ខាងក្រោមនេះជាហេតុផល៣យ៉ាងដែលជួយអ្នកឆ្ពោះទៅរកភាពជោគជ័យបានតាមរយៈការបរាជ័យនេះ៖
១) កត់ត្រានូវមូលហេតុហេតុអ្វីបានជាអ្នកបរាជ័យ៖ នរណាម្នាក់ក៏មានក្តីសុបិនឬមហិច្ឆតាដែលពួកគេចង់សម្រេចផងដែរ។ ប៉ុន្តែ រាល់ពេលដែលអ្នកបរាជ័យ អ្នកត្រូវសិក្សារកមូលហេតុឲ្យឃើញតើអ្វីទៅដែលបណ្ដាលឲ្យបរាជ័យ។ ចំណាយពេលសម្រាប់សិក្សានិងគិតបន្តិចទៅ។ ការសិក្សាពីមូលហេតុមិនត្រឹមតែជួយអ្នកមិនឲ្យប្រព្រឹត្តនូវកំហុសនេះម្តងទៀតទេ ថែមទាំងអាចជួយអ្នកទៅរកផ្លូវជោគជ័យទៀតផង។
២) រៀនពីកំហុស៖ មនុស្សជាច្រើនក្រោយពេលធ្វើខុស ចូលចិត្តទម្លាក់កំហុសទៅអ្នកដទៃ។ នេះមិនមែនជាទង្វើដ៏ត្រឹមត្រូវមួយទេ។ អ្វីដែលអ្នកគួរធ្វើនោះគឺទទួលស្គាល់នូវកំហុស កត់ត្រានូវមូលហេតុដែលធ្វើឲ្យអ្នកបរាជ័យនិងចុងក្រោយគឺសិក្សាពីកំហុសទាំងនោះ។ ការទទួលស្គាល់កំហុសមិនមែនជារឿងអាក្រក់នោះទេ ព្រោះវាបានផ្ដល់នូវមេរៀនដ៏មានតម្លៃនិងជួយអ្នកឲ្យធ្វើបានល្អលើកក្រោយ។
៣) កុំបាក់ទឹកចិត្តឲ្យសោះ៖ ពិតប្រាកដណាស់ ការបរាជ័យអាចធ្វើឲ្យមនុស្សឈឺចាប់ កុំចង់សាកល្បងម្ដងទៀតឬចង់បោះបង់ចោលជាដើម។ ប៉ុន្តែ វាជាច្បាប់ធម្មជាតិតែប៉ុណ្ណោះ។ មនុស្សគ្រប់រូបតែងមានអារម្មណ៍មិនល្អពេលជួបរឿងបរាជ័យ។ ប៉ុន្តែ ចូរចងចាំថាការមានជំនឿចិត្តលើខ្លួនឯងគឺជាកម្លាំងដ៏ខ្លាំងក្លាជាទីបំផុត ដែលជួយអ្នកចេញពីភាពបរាជ័យហើយឆ្ពោះទៅរកភាពជោគជ័យបាន។ ត្រូវរំលឹកខ្លួនឯងថាភាពបរាជ័យគឺជាឱកាសមួយសម្រាប់អ្នករៀនសូត្រនិងរីកចម្រើនជាងមុន គ្មានអ្វីត្រូវបាក់ទឹកចិត្តនោះទេ៕
ប្រែសម្រួល៖ អុឹង មុយយូ ប្រភព៖ addicted2success.com
