ស្គាល់ថាអ្វីដែលសំខាន់សម្រាប់ខ្លួនឯងពិតប្រាកដ អ្នកនឹងអាចដោះស្រាយបញ្ហាបានដោយឈ្លាសវៃ
នៅក្នុងជីវិតយើងម្នាក់ៗ មានបញ្ហាកង្វល់ចិត្តជាច្រើន ដែលមានពេលខ្លះហាក់ដូចជាមានព្រួញជាច្រើនបាញ់តម្រង់មករកអ្នកតែម្នាក់ក្នុងពេលតែមួយ។ នៅពេលមនុស្សផ្ដោតទៅលើបញ្ហាជាជាងដំណោះស្រាយ ពួកគេនឹងមិនអាចរត់គេចចេញពីរង្វង់នៃបញ្ហាដែលមករឹតកពួកគេជាប់មិនលែងនោះឡើយ។ ប៉ុន្តែអ្នកត្រូវចាំថា អ្នកមិនអាចគ្រប់គ្រងទៅលើរឿងរ៉ាវគ្រប់បែបយ៉ាង ដែលកើតមានឡើងនៅក្នុងជីវិតអ្នកនោះឡើយ។
ត្រង់ចំណុចនេះ អ្នកត្រូវចេះថ្លឹងថ្លែងដោយភាពឈ្លាសវៃថាតើរឿងឈឺក្បាលណាដែលអ្នកគួរប្រលែងចោល និងរឿងណាដែលអ្នកគួរសន្សំកម្លាំងដើម្បីផ្ដោតរកដំណោះស្រាយបញ្ហាសម្រាប់វាវិញ។
អ្នកអាចដោះស្រាយបញ្ហាទាំងនោះបាន ទាល់តែអ្នកអាចឆ្លើយជាមុនសិនថា តើអ្វីទៅដែលសំខាន់សម្រាប់អ្នកពិតប្រាកដ ? នៅពេលអ្នកមិនដឹងថាអ្វីដែលសំខាន់សម្រាប់ខ្លួនឯងនោះទេ វាក៏មិនខុសគ្នាពីការណ៍ដែលអ្នកមិនស្គាល់ថាខ្លួនឯងជានរណាដូច្នោះ។
ការណ៍ដែលដឹងថាអ្វីសំខាន់សម្រាប់ខ្លួនឯង អ្វីដែលសំខាន់នេះនឹងផ្ដល់នូវគោលជំហរដ៏រឹងមាំជាក់លាក់មួយ ដែលប្រៀបដូចជាត្រីវិស័យសម្រាប់នាំអ្នកទៅកាន់គោលដៅដែលអ្នកចង់ទៅឲ្យដល់ក្នុងជីវិតដូច្នោះដែរ។ យ៉ាងណាមិញ នៅពេលអ្នកមិនដឹងថាអ្វីសំខាន់សម្រាប់ជីវិតរបស់អ្នក មិនស្គាល់ថាខ្លួនឯងជានរណា មិនមានអត្តសញ្ញាណរបស់ខ្លួនច្បាស់លាស់ គោលជំហររបស់អ្នកគឺគ្មានឡើយ។
គោលជំហររបស់អ្នកស្ថិតនៅលើការបោកបក់ពីឥទ្ធិពលខាងក្រៅ ដែលប្រាប់អ្នកឲ្យធ្វើនេះធ្វើនោះ ឬជាភាពមិននឹងននៃអារម្មណ៍របស់ខ្លួនឯង ដែលអាចនាំអ្នកទៅរកផ្លូវខុសបានយ៉ាងងាយបំផុត។ នៅពេលអ្នកមានគោលជំហរជាក់លាក់ជារបស់ខ្លួនហើយ ភ្នែករបស់អ្នក ចក្ខុវិស័យរបស់អ្នក គឺដឹងតែបាញ់ឆ្ពោះតម្រង់ទៅរករឿងតែម្យ៉ាងគត់ ដែលជាគោលដៅដែលអ្នកបានកំណត់ឲ្យខ្លួនឯងដើរទៅរកនេះឯង។
ដូច្នេះ អ្នកនឹងដឹងថាតើរឿងអ្វីដែលអ្នកគួរបោះចោល និងរឿងអ្វីដែលអ្នកគួរគិតគូរទៅលើដើម្បីរកដំណោះស្រាយ។ ព្រោះគ្មាននរណាម្នាក់នៅលើលោកនេះអាចគ្រប់គ្រងរឿងគ្រប់បែបយ៉ាងនៅក្នុងជីវិតនោះឡើយ។ បុគ្គលជោគជ័យគ្រប់គ្រងតែរឿងណាដែលស្ថិតនៅក្នុងដែនកំណត់របស់ខ្លួនប៉ុណ្ណោះ។ អ្វីដែលនៅក្នុងដែនកំណត់របស់ខ្លួនឯង គឺជាការផ្លាស់ប្ដូរខ្លួនឯង នោះស្ថានការណ៍ខាងក្រៅផ្លាស់ប្ដូរមកតាមការចង់បានរបស់អ្នកតាមក្រោយនោះទេ។
នេះមានន័យថាអ្នកបានផ្ដោតទៅលើដំណោះស្រាយជាជាងបញ្ហា ដែលចង់ឲ្យស្ថានការណ៍ខាងក្រៅផ្លាស់ប្ដូរមកតាមការចង់បានរបស់ខ្លួន ដោយមិនផ្លាស់ប្ដូរខ្លួនឯងជាមុន។ នៅពេលអ្នកដឹងថាអ្វីសំខាន់សម្រាប់អ្នកពិតប្រាកដ គោលជំហររបស់អ្នកនឹងអាចឲ្យអ្នកដោះស្រាយបញ្ហាបានដោយភាពឈ្លាសវៃនិងមានប្រសិទ្ធភាព៕
ដោយ៖ ស្រីពៅ
