តើមានរឿងអាក្រក់អ្វីខ្លះកើតឡើង បើអ្នកចូលចិត្តប្រៀបធៀបខ្លួនឯងជាមួយអ្នកដទៃ?
មនុស្សសឹងតែគ្រប់គ្នាសុទ្ធតែធ្លាប់ ប្រៀបធៀបខ្លួនឯងទៅនឹងអ្នកដទៃដើម្បីដឹងថា ខ្លួនកំពុងស្ថិតក្នុងទីតាំងណា ហើយមានចំណុចខ្សោយ និងចំណុចខ្លាំងអ្វីខ្លះ។ ត្រង់ចំណុចនេះ វាមិនអាក្រក់ពេកទេ ប្រសិនបើយើងប្រៀបធៀបដើម្បីទាញឲ្យចេញជាប្រយោជន៍ និង ដើម្បីពង្រឹងខ្លួនឯងឲ្យប្រសើរ។ ប៉ុន្តែបញ្ហានៅត្រង់ថា មនុស្សភាគច្រើនចូលចិត្តប្រៀបធៀបខ្លួនឯងក្នុងផ្លូវមិនល្អ ដូច្នេះហើយធ្វើឲ្យពួកគេមានអារម្មណ៍ខ្លួនអន់។
១) ចង់ធ្វើឲ្យដូចអ្នកដទៃ៖ មនុស្សម្នាក់ៗក្នុងលោកនេះ សុទ្ធតែមានចំណុចពិសេសរៀងខ្លួន។ ប៉ុន្តែភាគច្រើនមនុស្សមិនបានចំណាយពេលច្រើនដើម្បីសិក្សាពីចំណុចពិសេសរបស់ខ្លួននោះទេ តែបើជាព្យាយាមធ្វើឲ្យដូចដទៃ ដែលប្រៀបដូចជា សត្វត្រី ដែលប្រឹងហោះឲ្យដូចបក្សីដែលភ្លេចគិតថា ខ្លួនឯងគ្មានស្លាប ហើយចំណុចខ្លាំងរបស់ខ្លួនគឺនៅក្នុងទឹក។ អ៊ីចឹងហើយទោះប្រឹងយ៉ាងណាក៏ប្រឹងមិនជោគជ័យដែរ ព្រោះវាផ្ទុយពីលក្ខណៈពិសេសរបស់ខ្លួន។ ដូច្នេះហើយ ការប្រឹងប្រែងសិក្សាអំពីលក្ខណៈពិសេសរបស់ខ្លួន គឺជារឿងសំខាន់បំផុត។
២) បាក់ទឹកចិត្ត៖ ពេលខ្លះ មនុស្សមួយចំនួនចូលចិត្តប្រៀបធៀបខ្លួនឯងជាមនុស្សដ៏សែនអស្ចារ្យក្នុងលោក ហើយតាំងមកអង្គុយសំកុកបាក់ទឹកចិត្ត ដោយមើលមកខ្លួនឯងហ្នឹងអន់ខ្លាំងពេក មិនអាចដូចខ្លាំង ឬ អស្ចារ្យដូចគេបាន។ បើប្រៀបធៀប ហើយធ្វើឲ្យខ្លួនឯងឈឺចិត្ត ហើយបាក់ទឹកចិត្តលែងចង់ដើរទៅមុខបែបនេះ ហេតុអ្វីចូលចិត្តប្រៀបធៀបបែបនេះ។ តែបើជ្រុលជាប្រៀបធៀបហើយ ត្រូវស្វែងរកគន្លឹះដើម្បីឲ្យខ្លួនឯងអាចជោគជ័យដែរ ដោយព្យាយាមស្វែងរកមូលហេតុដែលធ្វើឲ្យអ្នកទាំងនោះជោគជ័យ ហើយហេតុអ្វីខ្លួនឯងមិនអាចជោគជ័យដូចគេ។
៣) គិតថា អ្នកដទៃតែងមានភាពរីករាយជាងខ្លួន៖ គ្មានមនុស្សណាមួយក្នុងលោកនេះ ដែលអាចញញឹមរាល់វិនាទីនោះឡើយ ព្រោះម្នាក់ៗសុទ្ធតែមានបញ្ហារៀងៗខ្លួន ទោះធំឬតូចអាស្រ័យលើស្ថានភាពជាក់ស្ដែងរបស់ខ្លួន។ ប៉ុន្តែនៅពេលដែលប្រៀបធៀបខ្លួនឯងជាមួយអ្នកដទៃនោះ ម្នាក់យល់ឃើញថា គេរីករាយជាងខ្លួន ហើយមានសុភមង្គលជាងខ្លួន។ ការគិតបែបនេះ នាំឲ្យខ្លួនឯងកាន់តែស្អប់ខ្លួនឯង និង លែងស្គាល់ខ្លួនឯងទៀត៕
