រឿងរ៉ាវទាំងនេះហើយ ដែលនាំឲ្យអ្នកស្ដាយក្រោយនឹងខ្លួនឯងពេលធ្វើវាហើយ
មានរឿងខ្លះដែលអ្នកធ្វើហើយ វានាំផលល្អដល់អ្នក ។ តែបើរឿងមួយចំនួនវិញ បើអ្នកធ្វើដោយមិនបានគិត អ្នកនឹងនាំឲ្យខ្លួនឯងស្ដាយក្រោយទៅថ្ងៃមុខជាក់ជាមិនខាន។ ហើយបើសិនជាអាចត្រលប់ក្រោយវិញបាន អ្នកនឹងមិនធ្វើរឿងអស់ទាំងនេះទេ។ តើមានអ្វីខ្លះទៅ?
១) ខំធ្វើការខ្លាំងដើម្បីគេចចេញពីបញ្ហា៖ តើអ្នកអាចគេចវេះពីបញ្ហាបានទេ? តើអ្នក គិតថាបញ្ហាគឺសុទ្ធតែនាំផលល្អដល់អ្នកមែនទេ? តើអ្នកដឹងទេ ថាបុគ្គលជោគជ័យជាច្រើន តែងតែជួបប្រទះនឹងបញ្ហា តែហេតុអ្វីពួកគេនៅតែជោគជ័យមកដល់សព្វថ្ងៃ? តាមពិតទៅបញ្ហាគឺមិនអាចមកសម្លាប់អ្នកឲ្យស្លាប់បានទេ តែអ្វីដែលអ្នកត្រូវធ្វើ គឺត្រូវប្រឈមមុខនឹងវា។ បើគេចវេះពីវា វាក៏មិនបាត់ទៅណាដែរ។ ដូចនេះត្រូវប្រឈមមុខនឹងវាដោយជឿជាក់ទៅ។
២) តែងបង្ហាញពីអារម្មណ៍ជាងរកដំណោះស្រាយ៖ តាមពិតទៅបើ អ្នកជាមនុស្សប្រើអារម្មណ៍ពេក វាក៏មិនសូវនាំប្រយោជន៍មកអ្នកដែរ។ ភាគច្រើនអ្នកដែលពូកែប្រើអារម្មណ៍នោះគឺស្រ្ដីភេទ។ ឧទាហរណ៍ពេលអ្នកជួបបញ្ហា អ្នកតែងតែបង្ហាញពីអារម្មណ៍របស់ខ្លួន ថាខ្លាចបែបនេះឬខ្លាចបែបនោះ តែហេតុអ្វីមិនចំណាយពេលរកដំណោះស្រាយទៅវិញទៅ។ បើអ្នករវល់តែបង្ហាញពីអារម្មណ៍របស់ខ្លួន តើអ្នកមានពេលស្វែងរកដំណោះស្រាយបានដែរទេ?
៣) ឈ្លោះគ្នាជាមួយគេឯងដោយសារចង់ឈ្នះ៖ តាមពិតទៅទស្សនៈនេះក៏ត្រឹមត្រូវដែរ«ចាញ់ជាព្រះ ឈ្នះជាមារ»។ វាមានន័យថា បើសិនជាអ្នកធ្វើចាញ់ អ្នកអាចក្លាយជាព្រះដែលគេគោរព តែបើអ្នកចង់ឈ្នះគេ អ្នកបានត្រឹមតែគេស្គាល់ថាជាមនុស្សអាក្រក់ប៉ុណ្ណោះ។ ប្រាកដណាស់ គ្មានអ្នកណាគេចង់ចាញ់នោះទេ តែបើការឈ្នះនោះវានាំឲ្យអ្នកដទៃឈឺចាប់ឬក៏វាអយុត្តិធម៌សម្រាប់គេឯង អ្នកគួរចុះចាញ់ដើម្បីទទួលបានភាពសុខសាន្តរៀងៗខ្លួនទើបល្អ៕
ប្រែសម្រួល៖ ព្រំ សុវណ្ណកណ្ណិកា ប្រភព៖ lifehack
