អ្នកជំនាញពីររូបរបស់កម្ពុជា យល់ស្របគ្នាថា សុំឡើងតំណែងជោគជ័យ ឬ អត់អាស្រ័យលើ«ចំណុចសំខាន់មួយ»
កាលពីចុងសប្ដាហ៍ ម្សិលមិញនេះ សំណួរដែលតែងតែដក់ជាប់នៅក្នុងខួរក្បាលរបស់មនុស្សជាច្រើន ត្រូវបានយកមកជជែកពិភាក្សាគ្នានៅក្នុងសិក្ខាសាលាមួយ នៅក្រោមប្រធានបទ "ជំនាញនៃការចរចា" ដោយវាគ្មិនប្រកបដោយបទពិសោធន៍ជ្រៅជ្រះ២រូប គឺលោក ស៊ី វណ្ណា និងលោក សោម សម្បត្តិ ដែលបានប្រព្រឹត្តទៅនៅមជ្ឈមណ្ឌលសហប្រតិបត្តិការកម្ពុជា-ជប៉ុន ឬហៅកាត់ CJCC ចាប់ពីម៉ោង៧:៣០ព្រឹកដល់១២:០០ថ្ងៃត្រង់។ គោលបំណងរបស់មនុស្សគ្រប់គ្នាគឺជាការចរចាដ៏មានប្រសិទ្ធភាពជាមួយថ្នាក់លើក្នុងការសុំដំឡើងតំណែងរបស់ខ្លួន។ ដូច្នេះ ក្នុងនាមអ្នកជាបុគ្គលិក មុននឹងសម្រេចចិត្តចង់ចរចាជាមួយថ្នាក់លើ អ្នកគួរគិតជាមុនសិនថា តើអ្នកមានគុណសម្បត្តិអ្វី ដែលស័ក្ដិសមសម្រាប់ឲ្យថ្នាក់លើរបស់អ្នក សម្រេចចិត្តប្រគល់តំណែងខ្ពស់ជាងមុនឲ្យអ្នក ? ហេតុអ្វីនៅពេលនិយាយអំពីយីហោផ្លាកសញ្ញាល្បីៗលំដាប់ពិភពលោកដូចជា Starbuck ឬ Addidas ឬ Chanel ជាដើម កម្រមានអ្នកបដិសេធថាមិនដែលស្គាល់សោះ ? ហេតុអ្វីក៏ឲ្យតែនឹកឃើញដល់កាហ្វេ គឺនឹកឃើញដល់ Starbuck បើជាសំលៀកបំពាក់កីឡា គឺនឹកឃើញដល់ Addidas ដូច្នោះ ?
ប្រធានផ្នែកអភិវឌ្ឍធនធានមនុស្សនៃCJCC លោក ស៊ី វណ្ណា បាននិយាយថា នោះហើយគឺជាឥទ្ធិពលនៃយីហោរបស់ពួកគេ គឺជាការជឿទុកចិត្តរបស់អតិថិជនចំពោះគុណភាពដែលយីហោទាំងនោះមាន។ ដូចគ្នាដែរ មនុស្សយើងម្នាក់ៗសុទ្ធតែមាននូវយីហោផ្ទាល់ខ្លួន ឬ personal branding ពោលគឺជាកេរ្តិ៍ឈ្មោះរបស់អ្នកនេះឯង។ ល្អឬអាក្រក់គឺអាស្រ័យទៅលើថាអ្នកបង្កើតយីហោរបស់ខ្លួនយ៉ាងដូចម្ដេច។ តើអ្នកមានចំណុចពិសេសលេចធ្លោអ្វី សមត្ថភាពពិសេសអ្វីនិងអត្តចរិតបែបណា ដើម្បីឲ្យថ្នាក់លើជឿទុកចិត្តក្នុងការប្រគល់តំណែងដែលអ្នកចង់បាននោះមកឲ្យអ្នក ? ដូចស្ថាបនិករបស់ក្រុមហ៊ុនលំដាប់ពិភពលោក Chanel លោកស្រី Coco Chanel បាននិយាយថា៖ "ដើម្បីឲ្យគេមិនអាចយកនរណាមកជំនួសអ្នកបានទាល់តែសោះ អ្នកត្រូវតែធ្វើជាមនុស្សដែលលេចធ្លោខុសពីគេជានិច្ច"។
ភ្ជាប់ជាមួយឥទ្ធិពលនៃយីហោផ្ទាល់ខ្លួននេះដែរ ប្រធានប្រតិបត្តិក្រុមហ៊ុន Campaint លោក សោម សម្បត្តិ ក៏បានលើកឡើងពីបទពិសោធន៍របស់គាត់ កាលស្វែងរកដើមទុនដំបូងដើម្បីបង្កើតក្រុមហ៊ុនCampaintឡើង។ គាត់ត្រូវបានគេឲ្យខ្ចីប្រាក់ចំនួន៣ម៉ឺនដុល្លារ ក្នុងរយៈពេលត្រឹមតែ១១ថ្ងៃប៉ុណ្ណោះ ដែលគាត់បានបំបែកកំណត់ត្រាដំបូងបំផុតក្នុងប្រវត្តិសាស្ត្រប្រទេសកម្ពុជា។ នេះគឺមកពីយីហោផ្ទាល់ខ្លួនរបស់គាត់ គឺមកពីគេជឿទុកចិត្តលើអត្តចរិតស្មោះត្រង់ពិតប្រាកដរបស់គាត់។ គាត់ក៏បានបញ្ចប់ជាមួយនឹងសម្ដីមួយឃ្លារបស់ Jim Rohn ថា៖ "ចូរប្រឹងប្រែងធ្វើការទៅលើខ្លួនឯងឲ្យខ្លាំងជាងទៅលើការងាររបស់អ្នក"។ ដូចសុភាសិតខ្មែរបុរាណបានពោលថា ចេះប្រាកដ ប្រាក់រត់តាមហោប៉ៅដូច្នោះឯង៕
