ម្ចាស់ពានសហគ្រិនឆ្នើមអាជីវកម្មបង្កើតថ្មី ២០១៧ ឯម ច័ន្ទរិទ្ធិកុរ ៖«យកស្នូលពោតមកធ្វើឧបករណ៍ក្មេងលេង ដើម្បីឱ្យក្មេងខ្លាំងផ្នែកវិទ្យាសាស្ត្រ»
លោក ឯម ច័ន្ទរិទ្ធិកុរ ដែលមានវ័យទើបតែ ២១ឆ្នាំ បច្ចុប្បន្នជានិស្សិតឆ្នាំទី៣ នៃសាកលវិទ្យាល័យភូមិន្ទភ្នំពេញ បានបង្កើតក្រុមហ៊ុនផលិតឧបករណ៍ក្មេងលេងមួយឈ្មោះ DoyDoy ហើយយុវជនរូបនេះ ទើបបានក្លាយជាម្ចាស់ពានសហគ្រិនឆ្នើមអាជីវកម្មបង្កើតថ្មីប្រចាំឆ្នាំ២០១៧ កាលពីពេលថ្មីៗនេះ។ អ្វីដែលគួរឱ្យកត់សម្គាល់បំផុតនៅក្នុងអាជីវកម្មរបស់យុវជនរូបនេះ គឺផលិតផលត្រូវបានកែច្នៃពីស្នូលពោត។ យុវជន ច័ន្ទរិទ្ធិកុរ បានបង្កើត DoyDoy កាលពីខែសីហា ឆ្នាំ២០១៦។ DoyDoy ផលិតឧបករណ៍សម្រាប់ឱ្យក្មេងៗសង់ជារូបរាងផ្សេងៗពីធាតុពីរសំខាន់ គឺ ទុយយោ និងឧបករណ៍តរភ្ជាប់ (connector) ដែលផលិតដោយម៉ាស៊ីនព្រីន 3D ហើយវត្ថុធាតុដើមសម្រាប់ផលិត ឧបករណ៍តរភ្ជាប់ គឺ ស្នូលពោតដែលមានដល់ ៩០%។ ក្រៅពីលក់ផលិតផល DoyDoy ក៏មានផ្ដល់សេវាកម្មជាលក្ខណៈបង្ហាត់បង្រៀនដោយផ្ទាល់ (workshop) នៅថ្ងៃចុងសប្ដាហ៍ផងដែរ។ ការយកម៉ាស៊ីនព្រីន 3D មកផលិតជារូបរាងផលិតផលរបស់ខ្លួនកើតឡើងបន្ទាប់ពីរូបគេបានចូលរួមវគ្គបណ្ដុះបណ្ដាលមួយដែលរៀបចំឡើងដោយអង្គការ USAID កាលពីឆ្នាំ២០១៥។ កាលណោះប្អូនបានរៀនអំពីអាជីវកម្ម ម៉ាស៊ីនព្រីន៣D ការរចនាជា 3D និងមុខវិជ្ជាជាច្រើនទៀត។ យុវជនរូបនេះ បានចាប់អារម្មណ៍នឹងម៉ាស៊ីន ព្រីន 3D មែនទែន ហើយរូបគេក៏បានសិក្សា និងធ្វើគម្រោងជាក់ស្ដែងដោយមានគ្រូបង្ហាត់បង្ហាញត្រឹមត្រូវ។ បន្ទាប់ពីសិក្សាចប់ រូបគេក៏បានជាប់ ជា Top 3 ក្នុងកម្មវិធីប្រកួតប្រជែងដែលរៀបចំឡើងដោយអង្គការខាងលើ។ 
យុវជន ច័ន្ទរិទ្ធិកុរ បានថ្លែងប្រាប់ BizKhmer ថា ហេតុផលដែលធ្វើឱ្យរូបគេសម្រេចចិត្តបង្កើត DoyDoy ឡើង គឺមានគោលដៅជំរុញផ្នែក STEM (វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា) ដល់ក្មេងៗតូច ដោយសារតែរូបគេសង្កេតឃើញថា វិស័យ STEM បាននិងកំពុងរីកចម្រើននៅបណ្ដាប្រទេសអភិវឌ្ឍន៍ ខណៈប្រទេសកម្ពុជាទើបនឹងមានការជំរុញ និងផ្សព្វផ្សាយពីវិស័យនេះ ហើយកត្តាចម្បងមួយទៀតនោះ គឺមានតែសាលាធំៗសម្រាប់គ្រួសារអ្នកមានមួយចំនួនប៉ុណ្ណោះដែលមានកម្មវិធីនេះ។ សម្រាប់ ច័ន្ទរិទ្ធិកុរ រូបគេយល់ឃើញថា ការបណ្ដុះកុមារតាំងពីតូចឱ្យស្រលាញ់ផ្នែកវិទ្យាសាស្ត្រ គឺជារឿងសំខាន់សម្រាប់ការអភិវឌ្ឍន៍ និងជំនាញផ្នែកធនធានមនុស្សនៅកម្ពុជា ព្រោះថាពួកគេគឺជាគ្រឹះ និងជាថ្នាលដ៏សំខាន់។ ការបង្កើត Doy Doy ក្នុងគោលដៅធំបំផុតគឺផលិតផលនូវឧបករណ៍សាងសង់សម្រាប់ក្មេងដែលមានតម្លៃធូរថ្លៃដែលអាចឱ្យគ្រួសារមិនថាអ្នកមាន មធ្យម អាចមានលទ្ធភាពទិញសម្រាប់ឱ្យកូនៗរបស់ពួកគេលេងបាន។ គំនិតអាជីវកម្មដែលយុវជនរូបនេះទទួលបាន គឺមាន កត្តាពីរយ៉ាងធំៗ ទីមួយ រូបគេចូលចិត្ត និងបានចូលរួមជាអ្នកស្ម័គ្រចិត្តកម្មវិធីរបស់អង្គការទាំងថ្នាក់ជាតិ និងថ្នាក់អន្តរជាតិ ហើយរូបគេបានចូលរួមជួយការងារបណ្ដុះបណ្ដាលក្មេងៗនៅតាមបណ្ដាខេត្តមួយចំនួនដែលជួបនូវកង្វះខាត។ បែបនេះហើយទើបធ្វើ ឱ្យយុវជនរូបនេះមើលឃើញពីកង្វះខាតជាច្រើនទាំងសម្ភារៈសិក្សា និងល្បែងសម្រាប់កុមារលេងឱ្យឆ្លាតវៃ ហើយកត្តាមួយទៀត គឺដោយសារតែរូបគេជាគ្រូបង្រៀនផ្ទាល់ដូច្នេះរូបគេបានដឹងយ៉ាងច្បាស់ពីគម្លាត និងកង្វះខាតរបស់ក្មេងក្រីក្រ។ ត្បិតតែបច្ចុប្បន្ន ច័ន្ទរិទ្ធិកុរ កំពុងផ្គត់ផ្គង់ផលិតផលនៅក្នុងទីផ្សារក្នុងស្រុក ប៉ុន្តែរូបគេមានចក្ខុវិស័យចង់ផ្គត់ផ្គង់នៅទូទាំងពិភពលោកតែម្ដង។ ទោះជាផលិតផលនេះ បាននិងកំពុងទទួលបានការចាប់អារម្មណ៍ពីសំណាក់អតិថិជនជាពិសេសអ្នកនៅទីក្រុងភ្នំពេញ ប៉ុន្តែបញ្ហាមួយដែលរូបគេប្រឈម គឺការផលិតផលិតផលពីម៉ាស៊ីនព្រីន 3D មានដំណើរការយឺត និងថ្លៃ អីចឹងហើយរូបគេត្រូវស្វែងរកនូវវិធីថ្មីដែលអាចផ្គត់ផ្គង់ទីផ្សារបានច្រើន និងមានតម្លៃធូរថ្លៃសម្រាប់អតិថិជនគោលដៅ។ មិនត្រឹមតែប៉ុណ្ណោះ យុវជន ច័ន្ទរិទ្ធិកុរ មានគោលបំណងបង្កើតហ្គេមឱ្យបានច្រើនជាងមុនដូចជា ផលិតអង្គរវត្ត បង្កើត applications បង្កើត robot ផ្សេងៗ និងកម្មវិធីជាច្រើនទៀត។ ច័ន្ទរិទ្ធិកុរ ទទូចសុំឱ្យស្ថាប័នដែលពាក់ព័ន្ធនឹងវិស័យអប់រំ ជួយជ្រោមជ្រែង ហើយបើអាចគឺដាក់បញ្ចូលទៅក្នុងកម្មវិធីសិក្សារបស់រដ្ឋតែម្ដងដើម្បីលើកកម្ពស់ និងជំរុញឱ្យក្មេងៗឬកុមារស្រលាញ់ និងយល់ដឹងពីវិទ្យាសាស្ត្រតាំងពីក្មេង៕
