ឈប់ប្រកួតគ្នា តែមកបង្កើត សហម៉ាកសញ្ញា ដើម្បីទទួលបាន ១ បូក ១ ស្មើ ៣ តើអ្វីទៅជា (១+១=៣)?
នេះជាប្រធានបទនៃសិក្ខាសាលាមួយដោយមានការធ្វើបទបង្ហាញពីសាស្ត្រាចារ្យនៅសកលវិទ្យាល័យ Putra Malaysia គឺលោកសាស្ត្រាចារ្យបណ្ឌិត Kenny Teoh Guan Cheng អ្នកជំនាញផ្នែកទីផ្សារម៉ាឡេស៊ី។ លោកបានបង្ហាញពីខ្លឹមសារសំខាន់បំផុតមួយ គឺចង់ឱ្យអាជីវកម្មឈប់ប្រកួតគ្នាតែនាំគ្នាមកបង្កើតសហម៉ាកសញ្ញា ដើម្បីទទួលបានលទ្ធផលច្រើនជាងមុន (១ បូក ១ ស្មើ ៣)។
ការថ្លែងបែបនេះ គឺធ្វើឡើងនៅក្នុងសិក្ខាសាលាលំដាប់អន្តរជាតិមួយ ដែលរៀបចំឡើងដោយសមាគមអ្នកទីផ្សារកម្ពុជា (Marketing Association of Cambodia) នៅអគារសហប្រតិបត្តិការកម្ពុជាកូរ៉េកាលពីថ្ងៃសៅរ៍ សប្ដាហ៍មុន។
លោក បណ្ឌិត Kenny បានមានប្រសាសន៍ថា ជាការពិតអាជីវកម្មជាច្រើនកំពុងប្រជែងគ្នា ដោយគិតរកគ្រប់វិធីដើម្បីយកឈ្នះគ្នាទៅវិញទៅមកក៏ប៉ុន្តែប្រសិនបើអ្នកទាំងនោះងាកទៅគិតអំពីការធ្វើសហម៉ាកសញ្ញាជាមួយគ្នា នោះពួកគេនឹងកាន់តែទទួលបានលទ្ធផលល្អប្រសើរជាងមុនទាំងសងខាងតែម្ដង ពោលគឺគ្មានខាងណាខាតនោះទេ គឺចំណេញទាំងអស់គ្នាតែម្ដង។
ចំណេញត្រង់នេះគឺចំណេញទាំងការទទួលបានអតិថិជនច្រើនជាមុន ចំណេញទាំងទទួលបានម៉ាកយីហោល្បីល្បាញជាងមុន។ លោកបណ្ឌិតរូបនេះ បានថ្លែងបន្តថា ការធ្វើសហម៉ាកសញ្ញារួមគ្នានេះទៅបាន គឺអាស្រ័យលើចរិតលក្ខណៈរបស់មនុស្ស (attitude) ថាចង់ឱ្យមានការផ្លាស់ប្ដូរជាវិជ្ជមានដែរឬអត់។ លោកបានលើកឧទាហរណ៍មួយចំនួននៃគម្រោងដែលគេធ្វើសហម៉ាកសញ្ញាបានជោគជ័យថ្នាក់ពិភពលោកនាពេលកន្លងមកមានដូចជាក្រុមហ៊ុនភេសជ្ជៈគោលជល់ Red Bull ជាមួយនឹងក្រុមហ៊ុនផលិតកាមេរ៉ា GoPro បង្កើតកិច្ចសហការមួយជាលក្ខណៈសកលកាលពីឆ្នាំ២០១៦។
លោកបណ្ឌិតបានបញ្ជាក់ថា ក្រុមហ៊ុនទាំងពីរសុទ្ធតែទទួលបានផលចំណេញទាំងលក់កាមេរ៉ា និងភេសជ្ជៈ ហើយអ្វីដែលពិសេសគឺម៉ាកយីហោ (brand image) របស់ក្រុមហ៊ុនទាំងពីរកាន់តែល្បី។
លោកបណ្ឌិត ក៏បានលើកឧទាហរណ៍មួយទៀតថា ក្រុមហ៊ុនរថយន្ត និងក្រុមហ៊ុនជាច្រើនទៀត បានចូលរួមគ្នាបង្កើតកម្មវិធីប្រណាំងរថយន្តល្បីទូទាំងពិភពលោក គឺ Formula One ដែលកម្មវិធីមានការចូលរួមពីក្រុមហ៊ុន Mercedes-Bez, Toyota, Rolex, Benelton, Durex, Shell, Ferrari, Marlboro, Honda, Tax និងក្រុមហ៊ុនជាច្រើនទៀត។
ដោយសារតែ Formula One ធ្វើឱ្យក្រុមហ៊ុនមួយចំនួនដែលគេសូវស្គាល់ពីមុន បច្ចុប្បន្នមានគេស្គាល់ច្រើន។ លោកបណ្ឌិត Kenny បានផ្ដល់អនុសាសន៍ថា ក្រុមហ៊ុននៅកម្ពុជាបើអាចធ្វើបាន គួរធ្វើសហម៉ាកសញ្ញាដើម្បីបំពេញបេសកកម្មរួមគ្នា ធ្វើឱ្យម៉ាកយីហោរបស់កម្ពុជា (branding Cambodia) បានល្បីសុះសាយនៅទូទាំងសកលលោកជាជាងការប្រកួតប្រជែងគ្នា។ អ្វីដែលសំខាន់បំផុតនោះ គឺត្រូវពង្រឹងគុណភាពជាលក្ខណៈស្ដង់ដារ ហើយរួមគ្នាធ្វើម៉ាកយីហោកម្ពុជា៕
