គន្លឹះងាយៗតែជួយឲ្យដំណើរកម្សាន្តរបស់អ្នកកាន់តែមានន័យជាងមុន
យើងម្នាក់ៗអាចនឹងមមាញឹកនឹងការសិក្សា ជំនួញឬការងារជាដើមហើយពុំសូវមានពេលវេលាទៅដើរលេងប៉ុន្មានទេ។ ដូច្នេះហើយ ប្រសិនជាអ្នកមានពេលទៅដើរលេងហើយ អ្នកគួរតែរៀបចំដំណើរកម្សាន្តឲ្យបានល្អព្រោះបើមិនអ៊ីចឹងទេ ដំណើរកម្សាន្តរបស់អ្នកមិនត្រឹមតែអត់សប្បាយថែមទាំងគួរឲ្យធុញទៀតផង។ ដូច្នេះ អត្ថបទថ្ងៃនេះនឹងបង្ហាញពីគន្លឹះងាយៗដែលជួយឲ្យដំណើរកម្សាន្តរបស់អ្នកប្រកបដោយភាពរីករាយនិងគួរឲ្យចងចាំ៖
១) រៀបចំគម្រោងជាមុន៖ ដំណើរកម្សាន្តល្អគឺត្រូវមានការរៀបចំឲ្យបានដិតដល់ផងដែរ។ ដូច្នេះហើយ អ្នកគួរតែចំណាយពេលវេលាខ្លះៗគិតពីទីតាំងដែលអ្នកចង់ទៅ រយៈពេលប៉ុន្មានថ្ងៃដែលអ្នកចង់ទៅឬសម្ភារៈដែលអ្នកត្រូវការ។ល។ ការមានគម្រោងត្រឹមត្រូវនឹងជួយឲ្យដំណើរកម្សាន្តរបស់អ្នកទៅបានរលូនដោយមិនខ្វះមុខឬខ្វះក្រោយ។
២) យកតែរបស់ដែលត្រូវការ៖ ជាទូទៅ ដំណើរកម្សាន្តគឺមានរយៈពេលខ្លីអាចពីមួយថ្ងៃទៅមួយអាទិត្យជាដើម។ ដើម្បីភាពងាយស្រួលក្នុងដំណើរកម្សាន្ត អ្នកគួរតែយករបស់ដែលអ្នកចាំបាច់និងត្រូវការប្រើប្រាស់បានហើយ។ កុំយករបស់ច្រើនពេកព្រោះប្រសិនជាកាតាបឬវ៉ាលីរបស់អ្នកធ្ងន់ពេក អ្នកងាយនឹងឆាប់ហត់និងមិនអាចរីករាយនឹងដំណើរកម្សាន្តបានអស់ដៃនោះទេ។
៣) ហៅមិត្តភ័ក្ដិទៅជាមួយ៖ ប្រសិនជាអាច អ្នកគួរតែហៅមិត្តភ័ក្ដិទៅជាមួយព្រោះដំណើរកម្សាន្តអាចនឹងសប្បាយជាងមុននិងកាន់តែមានការចងចាំឬអនុស្សាវរីយល្អៗជាជាងទៅដើរលេងតែម្នាក់ឯង។ ម៉្យាងវិញទៀត អ្នកមិនត្រឹមបង្កើតអនុស្សាវរីយល្អៗនិងសើចសប្បាយជាមួយមិត្តរបស់អ្នកនោះទេ អ្នកក៏អាចកាត់បន្ថយការចំណាយផងដែរ។
៤) ពិភាក្សាគម្រោងជាមួយមិត្ត៖ ក្រោយមានគ្នាហើយ អ្នកក៏មិនគួររៀបចំកាលវិភាគម្នាក់ឯងដែរ។ អ្នកត្រូវពិភាក្សាជាមួយមិត្តដើម្បីទទួលបានគំនិតកាន់តែច្រើននិងត្រូវយល់ស្របពីគម្រោងដំណើរកម្សាន្តនេះជាមួយគ្នា។ ហើយប្រសិនជាដល់ថ្ងៃដើរលេងហើយមានបញ្ហាឬមិនដូចអ្វីដែលបានគ្រោងទុក ចូរកុំបន្ទោសគ្នាឬឈ្លោះគ្នាអី។ ផ្ទុយទៅវិញ ត្រូវជួយគ្នាគិតពីជំហានបន្ទាប់ទៀត នេះទើបធ្វើឲ្យដំណើរកម្សាន្តប្រកបដោយភាពរីករាយបាន។
៥) ថតរូប៖ បើទោះបីជាអនុស្សាវរីយអាចចងចាំក្នុងចិត្តបាន តែប្រសិនជាអាចថតរូបទុកជាអនុស្សាវរីយទៀត នោះកាន់តែអស្ចារ្យ។ បន្ថែមពីលើនេះទៅទៀត ដំណើរកម្សាន្តកាន់តែមានន័យប្រសិនជាអ្នកបានថតរូបនូវសកម្មភាពសប្បាយឬឆ្កួតៗជាមួយមិត្តរបស់អ្នក។ ថ្ងៃក្រោយ អ្នកអាចត្រឡប់មើលរូបថតទាំងនេះហើយសើចសប្បាយទៀតផង៕
ប្រែសម្រួល៖ អុឹង មុយយូ ប្រភព៖ wikihow.com
