ភាពជោគជ័យរបស់ក្រុមហ៊ុន Zappos ដែលមានCEOលោក Tony Hsieh ឆ្លុះបញ្ចាំងឲ្យឃើញថាតើអត្តសញ្ញាណរបស់ក្រុមហ៊ុនសំខាន់ខ្លាំងប៉ុណ្ណា
វប្បធម៌របស់សង្គមជាតិមួយ គឺជាអ្វីៗទាំងឡាយដែលប្រៀបបានទៅនឹងកញ្ចក់ឆ្លុះបញ្ចាំងពីអត្តសញ្ញាណពិសេសជាក់លាក់របស់សង្គមជាតិមួយនោះ។ រីឯវប្បធម៌របស់ក្រុមហ៊ុនមួយវិញ ក៏មិនខុសគ្នាអ្វីដែរ។ វប្បធម៌ក្រុមហ៊ុនគឺជាអ្វីៗទាំងអស់របស់ក្រុមហ៊ុនមួយនោះ។ វាគឺជាចំណុចស្នូលខាងក្នុង ដែលតំណាងឲ្យអត្តចរិតរបស់ក្រុមហ៊ុន គឺជាអ្វីដែលក្រុមហ៊ុនមួយនោះផ្ដោតតម្លៃទៅលើ។ ហេតុនេះនៅពេលក្រុមហ៊ុនមួយមិនមានវប្បធម៌របស់ខ្លួនច្បាស់លាស់ នោះប្រៀបបានទៅនឹងមនុស្សដែលឥតមានឧត្ដមគតិជារបស់ខ្លួនដូច្នោះ។ បង្កើតនូវភាពរីករាយនិងភាពចម្លែកបន្តិច គឺជាវប្បធម៌មួយរបស់CEO លោក Tony Hsieh ដែលបានសាងភាពជោគជ័យឲ្យក្រុមហ៊ុន Zappos ជាមួយប្រាក់ចំណូលរាប់ពាន់លានដុល្លារជារៀងរាល់ឆ្នាំ។
បង្កើតឡើងនៅក្នុងឆ្នាំ២០០០ ក្រុមហ៊ុន Zappos ដែលមានសហគ្រិនជនជាតិអាមេរិក លោក Tony Hsieh ជាCEOរបស់ក្រុមហ៊ុន គឺជាក្រុមហ៊ុនលក់ស្បែកជើងតាមអនឡាញ ហើយត្រឹមតែ៩ឆ្នាំក្រោយប៉ុណ្ណោះ Zappos ត្រូវបាន Amazon.com ប្រកាសប្រាក់ចំណូលរបស់ពួកគេដែលមានចំនួនរហូតដល់ទៅ១.២ពាន់លានដុល្លារ ក្នុងមួយពព្រិចភ្នែកប៉ុណ្ណោះ។ ឥឡូវនេះ លោក Tony Hsieh បានគ្រប់គ្រងទៅលើទ្រព្យសម្បត្តិប្រមាណ៧៨០លានដុល្លារក្នុងវ័យ៤៤ឆ្នាំរបស់ខ្លួន។
blogs.ubc.ca[/caption] លោកគឺជាអតីតនិស្សិតបញ្ចប់ការសិក្សាពីមហាវិទ្យាល័យហាវើដ ផ្នែកវិទ្យាសាស្ត្រកុំព្យូទ័រក្នុងឆ្នាំ១៩៩៥។ នៅឆ្នាំបន្ទាប់ គាត់មានគំនិតបង្កើតក្រុមហ៊ុនបណ្ដាញផ្សព្វផ្សាយដ៏ល្បីឈ្មោះមួយដែលមានឈ្មោះថា LinkExchange ប៉ុន្តែក្រោយមកក៏លក់ទៅឲ្យក្រុមហ៊ុន Microsoft ក្នុងឆ្នាំ១៩៩៩ ក្នុងតម្លៃ២៦៥លានដុល្លារ។ ក្នុងឆ្នាំ២០១០ គាត់ក៏ជាអ្នកនិពន្ធសៀវភៅ Delivering Happiness ជាសៀវភៅមួយក្បាលដែលបានជាប់ចំណាត់ថ្នាក់កំពូលគេក្នុងតារាងរបស់ The New York Time Best Sellers និងរក្សាក្នុងតំណែងនេះបន្តជាប់ៗគ្នារហូតដល់ទៅ២៧សប្ដាហ៍ទៀត។ 
ឈប់រត់ដេញតាមលុយ ហើយរត់ដេញតាមជំនក់ចិត្តរបស់អ្នកវិញ ស្វែងរកឲ្យឃើញនូវអ្វីដែលអ្នកជក់ចិត្ត ជាអ្វីដែលអ្នកតែងមានថាមពលពុះកញ្ជ្រោលនឹងធ្វើ។ នៅពេលអ្នកចាប់ផ្ដើមធ្វើអ្វីដែលខ្លួនស្រឡាញ់ នោះវានឹងនាំភាពជោគជ័យមកឲ្យអ្នក មានន័យថានៅពេលអ្នករត់ដេញតាមជំនក់ចិត្តខ្លួនឯង នោះលុយនឹងរត់មកតាមក្រោយអ្នកនោះទេ ហើយសេចក្ដីសុខរបស់ខ្លួនឯងនិងសម្រាប់មនុស្សជុំវិញខ្លួនអ្នក ដូចជាបុគ្គលិកនិងអតិថិជនក៏មកព្រមៗគ្នាជាមួយគ្នាដែរ។ លះបង់ប្រយោជន៍រយៈពេលខ្លី ដើម្បីទទួលប្រយោជន៍ធំធេងក្នុងរយៈពេលវែង សំណួរដ៏គួរឲ្យចាប់អារម្មណ៍មួយដែលCEOរបស់ក្រុមហ៊ុន Zappos តែងតែសួរទៅកាន់បុគ្គលិកក្នុងដំណាក់កាលសម្ភាសសុំការងារនោះគឺ ចាប់ពីកម្រិត១ដល់១០ តើអ្នកគិតថាភាពចម្លែករបស់អ្នកស្ថិតក្នុងកម្រិតណាមួយ។ បុគ្គលិកនីមួយៗត្រូវបានស្វាគមន៍ជាលើកដំបូងជាមួយនឹងការហ្វឹកហាត់ណែនាំរយៈពេល៤សប្ដាហ៍ដំបូង។ នៅថ្ងៃចុងសប្ដាហ៍ទី១ គាត់នឹងប្រគល់ប្រាក់ចំនួន២០០០ដុល្លារបើពួកគេយល់ព្រមលាឈប់ពីការងារ។ មូលហេតុដែលលោកធ្វើបែបនេះក៏ព្រោះតែ វានឹងឆក់ទាញយកមនុស្សដ៏ត្រឹមត្រូវមករួមដំណើរ រួមគោលដៅតែមួយជាមួយគ្នា គឺជាមនុស្សដែលពោរពេញដោយសេចក្ដីស្រឡាញ់ពេញចិត្តចំពោះការងាររបស់ខ្លួន មិនមែនគ្រាន់តែដើម្បីលុយនោះឡើយ។ ការលះបង់ប្រយោជន៍ក្នុងរយៈពេលខ្លីនឹងតបស្នងនូវប្រយោជន៍ដ៏ធំធេងមកវិញក្នុងរយៈពេលវែង។ លោកបានរៀបរាប់ថា បើទោះជាអ្នកត្រូវការមនុស្សច្រើនទៀតមកបំពេញតួនាទីដែលនៅសល់ក៏ដោយ តែអ្នកត្រូវតែធ្វើវាដោយសន្សឹមៗ ព្រោះបើអ្នកបង្ខំ នោះអ្នកនឹងជ្រើសរើសមនុស្សខុស ក្នុងរយៈពេលវែងគឺមនុស្សខុសទាំងនោះហើយដែលធ្វើឲ្យខាតបង់ក្រុមហ៊ុនអ្នក ហើយអ្នកក៏បាត់បង់ថាមពលជក់ចិត្តទៅលើការងារអ្នកផងដែរ។ on] បម្រើអតិថិជនចាស់ៗរបស់អ្នកឲ្យល្អបំផុត នោះពួកគេនឹងប្រើមាត់ដើម្បីជួយផ្សព្វផ្សាយឲ្យអ្នក ខុសពីក្រុមហ៊ុនដទៃដែលតែងតែជះលុយទៅលើយុទ្ធសាស្ត្រផ្សព្វផ្សាយមុខសញ្ញាអាជីវកម្មរបស់ខ្លួនដើម្បីទាក់ទាញចំណាប់អារម្មណ៍ឲ្យគេស្គាល់ច្រើន។ ដោយឡែកក្រុមហ៊ុន Zappos ផ្ដោតទៅលើការមើលថែទាំបម្រើអតិថិជនរបស់ខ្លួនឲ្យបានល្អបំផុត ដោយផ្ដល់សេវាកម្មដឹកជញ្ជូនដោយឥតគិតថ្លៃសម្រាប់ការកុម្ម៉ង់ គោលការណ៍ដូរយកលុយវិញក្នុងរយៈពេល៣៦៥ថ្ងៃ និងទំនាក់ទំនងជាមួយអតិថិជននៅរាល់ពេលពួកគេត្រូវការជំនួយ។ ជាជាងជំរុញឲ្យបុគ្គលិកទាក់ទងនិយាយតាមទូរស័ព្ទជាមួយអតិថិជនឲ្យបានច្រើននាក់ ពួកគេផ្ដោតទៅលើរយៈពេលនិយាយជាមួយអតិថិជនទៅវិញ កាន់តែយូរប៉ុណ្ណាកាន់តែល្អប៉ុននោះដែរ។ នៅពេលអតិថិជនពេញចិត្តជាមួយសេវាកម្មពួកគេហើយ បន្ទាប់មកទុកឲ្យអតិថិជនស្មោះត្រង់ជាអ្នកធ្វើទីផ្សារឲ្យផលិតផលអ្នកចុះ៕
ដោយ៖ ស្រីពៅ
