តើគួរធ្វើយ៉ាងណានៅពេលដែលអ្នកជួបឧបសគ្គដែលគិតថាមិនអាចឆ្លងផុត?
មនុស្សជាច្រើនរាល់ពេលជួបឧបសគ្គតិចតួចក៏មានគំនិតចង់បោះបង់ទៅហើយ។ ប៉ុន្តែ រាល់ឧបសគ្គនិងស្ថានភាពលំបាកៗដែលអ្នកជួបមិនមែនមានន័យថាអ្នកពុំអាចឆ្លងកាត់នោះទេ គ្រាន់តែទាមទារឲ្យអ្នកមានការអត់ធ្មត់ ការខិតខំប្រឹងប្រែងនិងមិនបោះបង់។ ប្រសិនអ្នកជួបឧបសគ្គហើយគិតថាខ្លួនឯងមិនអាចសម្រេចបាន ចូរសាកល្បងអនុវត្តគន្លឹះខាងក្រោមនេះសិនមុននឹងអ្នកបោះបង់៖
១) ធ្វើពុតរហូតដល់អ្នកអាចធ្វើវាបាន
ភាពខ្លាំងពូកែមិនអាចកើតមានឡើងក្នុងរយៈពេលខ្លីបានឡើយ។ ប៉ុន្តែ ចូរកុំបារម្ភអី ប្រសិនអ្នកមិនចេះអ្វីមួយ អ្នកអាចបន្លំបាន។ ឧទាហរណ៍ថាអ្នកត្រូវធ្វើបទបង្ហាញទៅកាន់អតិថិជនជាដើម ប៉ុន្តែអ្នកមានភាពភ័យខ្លាចរាល់ពេលដែលអ្នកនិយាយ។ តែ ភាពភ័យខ្លាចអាចបំបាត់បានដោយអ្នកអនុវត្តការនិយាយឲ្យបានច្រើនមុនពេលធ្វើបទបង្ហាញ ហើយការអនុវត្តនេះនឹងជួយឲ្យអ្នកនិយាយបានល្អដោយមានទំនុកចិត្ត ដែលជួយឲ្យអតិថិជនមើលមិនឃើញនូវភាពភ័យខ្លាចរបស់អ្នក។ មិនថាស្ថានភាពអ្វីក៏ដោយ អ្នកអាចធ្វើពុតបានប្រសិនជាអ្នកមានការអនុវត្តគ្រប់គ្រាន់។
២) ភាពអត់ធ្មត់និងការខំប្រឹង
មនុស្សជាច្រើនបោះបង់ចោលនូវក្តីសុបិនដោយសារតែពួកគាត់មិនពេញចិត្តនឹងលទ្ធផលដំបូង។ ប៉ុន្តែ ចូរចងចាំថាភាពអស្ចារ្យមិនអាចកើតឡើងដោយងាយស្រួលនោះទេ។ ដូច្នេះហើយ វាទាមទារឲ្យមានភាពអត់ធ្មត់ខ្ពស់និងការខំប្រឹង។ ឧទាហរណ៍អ្នករាំរបាំទៅមើល៍ ពួកគាត់ហ្វឹកហាត់រាប់ខែរាប់ឆ្នាំទម្រាំតែអាចពត់ខ្លួនបានទន់ល្អ ប្រសិនជាពួកគេគ្មានការអត់ធ្មត់និងការខំប្រឹងទេ ពួកគេនឹងមិនជោគជ័យក្នុងអាជីពរបស់ពួកគាត់ឡើយ។
៣) សុំជំនួយពីអ្នកដទៃ
សុភាសិតមួយបានពោលថា៖ «ខួរក្បាលពីរប្រសើរជាងខួរក្បាលមួយ»។ ប្រសិនជាអ្នកជួបបញ្ហាដែលអ្នកមិនដឹងត្រូវដោះស្រាយយ៉ាងដូចម្តេច ចូររកមិត្តភ័ក្ដិឬមនុស្សណាដែលធ្លាប់ឆ្លងកាត់ដើម្បីទទួលបានមតិយោបល់ល្អឬសុំឲ្យពួកគេជួយគិតតើត្រូវដោះស្រាយដោយរបៀបណា។ ពេលខ្លះ យើងគិតមិនឃើញមធ្យោបាយល្អនោះទេ។ ដូច្នេះហើយ ប្រសិនជាមានអ្នកផ្សេងជួយគិត បញ្ហាអាចនឹងដោះស្រាយបាន៕
ប្រែសម្រួល៖ អុឹង មុយយូ
ប្រភព៖ success.com
