គន្លឹះងាយៗដែលអ្នកអាចអនុវត្តបានដើម្បីបង្កើនឱកាសកាន់តែច្រើនសម្រាប់ខ្លួនឯង
ភាពជោគជ័យមិនមែនកើតឡើងដោយសារតែការខំប្រឹង ការតស៊ូនិងការអត់ធ្មត់តែម៉្យាងនោះទេ។ ភាពជោគជ័យកើតមានឡើយដោយសារតែអ្នកចេះបង្កើនឱកាសឲ្យខ្លួនឯងឲ្យកាន់តែច្រើនឡើង។ តើអ្នកអាចបង្កើតឱកាសឲ្យខ្លួនឯងបានយ៉ាងដូចម្តេចទៅ? អនុវត្តគន្លឹះខាងក្រោមនេះ អ្នកនឹងភ្ញាក់ផ្អើលនូវឱកាសដែលអ្នកបានបង្កើត៖
១) បង្ហាញវត្តមានខ្លួនឯង៖ អ្នកមិនអាចទាក់ទាញឱកាសបានទេប្រសិនជាអ្នកមិនដែលបង្ហាញវត្តមានរបស់ខ្លួនឯងអ្វីសោះ។ អ្នកត្រូវបង្ហាញពីភាពសកម្មនិងបង្ហាញទៅកាន់អ្នកដទៃពីសមត្ថភាពឬភាពប៉ិនប្រសប់របស់ខ្លួនឯង។ ហើយគន្លឹះក្នុងការបង្ហាញវត្តមានខ្លួនឯងឲ្យបានច្រើនគឺកសាងបណ្ដាញទំនាក់ទំនងឲ្យបានច្រើន។ ការដែលអ្នកស្គាល់មនុស្សកាន់តែច្រើន មនុស្សក៏អាចណែនាំឱកាសដល់អ្នកបានកាន់តែច្រើនផងដែរ។
២) កុំធ្វើអ្វីងាយៗ៖ ប្រសិនអ្នកគិតតែចង់ធ្វើអ្វីដែលងាយៗ មិនពិបាក នោះអ្នកគ្មានថ្ងៃនឹងរីកចម្រើនឡើយ។ ប្រសិនជាអ្នកហ៊ានសាកល្បងធ្វើអ្វីដែលថ្មី អ្នកកំពុងតែបើកឱកាសឲ្យខ្លួនឯងក្នុងការពង្រឹងសមត្ថភាពនិងរៀនអ្វីដែលថ្មីផងដែរ។ ដូច្នេះហើយ កុំរង់ចាំឱកាសមកដល់អី ផ្ទុយទៅវិញចូរសាកល្បងអ្វីថ្មីៗនិងហ៊ានប្រឡូកក្នុងសង្គម។
៣) បង្ហាញស្នាដៃ៖ ប្រសិនអ្នកជាអ្នកនិពន្ធ នោះមានន័យថាអ្នកអាចសរសេរអត្ថបទល្អៗ។ តែ ប្រសិនជាអ្នកមិនដែលបង្អួតនូវស្នាដៃរបស់អ្នកទេ មិនថាស្នាដៃរបស់អ្នកអស្ចារ្យយ៉ាងណានោះទេ គ្មាននរណាម្នាក់ដឹងឡើយ។ ដូច្នេះហើយ អ្នកត្រូវចេះចែករំលែកនូវស្នាដៃដែលអ្នកមាន។ មនុស្សមិនត្រឹមតែស្គាល់នូវសមិទ្ធផលរបស់អ្នកនោះទេ កេរ្តិ៍ឈ្មោះរបស់អ្នកក៏កាន់តែល្បីល្បាញផងដែរ។
៤) ពង្រឹងសមត្ថភាពខ្លួនឯង៖ ប្រសិនជាអ្នកចេះកាន់តែច្រើន កាន់តែពូកែ អ្នកក៏ទាក់ទាញឱកាសបានកាន់តែច្រើនផងដែរ។ កុំឈប់ពង្រឹងសមត្ថភាពខ្លួនឯងឲ្យសោះ។ រៀងរាល់ខែ អ្នកអាចវាយតម្លៃខ្លួនឯងនិងមើលតើមានកន្លែងណាដែលអ្នកអាចពង្រឹងបន្ថែមដែរឬទេ។ ការដែលអ្នកបង្កើនសមត្ថភាពខ្លួនឯង អ្នកក៏បង្កើនឱកាសឲ្យខ្លួនឯងផងដែរ៕
ប្រែសម្រួល៖អុឹង មុយយូ ប្រភព៖ bustle.com
