៣យ៉ាងដែលអ្នកចង់បើកហាងកាហ្វេគួរស្វែងយល់ពីមូលហេតុដែលមនុស្សចូលចិត្តទៅហាងកាហ្វេ
ដូចដែលបានឃើញជាក់ស្ដែងហើយថាហាងកាហ្វេនៅទីក្រុងភ្នំពេញរីកដុះដាលដូចផ្សិតអ៊ីចឹង។ អ្នកអាចរកហាងកាហ្វេស្ទើរតែគ្រប់ទីកន្លែង។ ហើយមនុស្សគ្រប់វ័យទាំងក្មេង យុវវ័យនិងមនុស្សវ័យចំណាស់ភាគច្រើនចូលចិត្តទៅហាងកាហ្វេ។ ខាងក្រោមនេះបង្ហាញពីកត្តាដែលមនុស្សនិយមទៅហាងកាហ្វេ៖
១) ទៅធ្វើកិច្ចការសិក្សាឬរំលឹកមេរៀន៖ នៅសាកលវិទ្យាល័យ និស្សិតប្រាកដជាមានកិច្ចការសាលាដែលត្រូវបំពេញជាក្រុម។ សម្រាប់និស្សិតមួយចំនួន ពួកគាត់ពិបាកក្នុងការរកទីតាំងសម្រាប់ជួបជុំគ្នា ពិភាក្សាកិច្ចការសាលាព្រោះពួកគាត់ត្រូវការកន្លែងដែលអាចអង្គុយបានយូរ។ ដោយសារតែហាងកាហ្វេមួយចំនួនមានកន្លែងអង្គុយច្រើនដែលពួកគាត់មានលក្ខណៈងាយស្រួលក្នុងការបំពេញកិច្ចការសាលា បន្ថែមពីលើនេះទៅទៀត ពួកគាត់ក៏អាចផឹកកាហ្វេ ស្ដាប់ចម្រៀងនិងមានម៉ាស៊ីនត្រជាក់ថែមទៀតផង។
២) ពិភាក្សារឿងការងារ៖ ទោះបីជារឿងការងារអាចពិភាក្សានៅទីណាក៏បាន ហាងកាហ្វេគឺជាទីតាំងនិយមបំផុតសម្រាប់ពាណិជ្ជករព្រោះពេលខ្លះ ពួកគាត់អាចនិយាយរឿងការងារបែបក្រៅផ្លូវការ និយាយគ្នាលេង ម៉្យាងវិញទៀត ពួកគាត់អាចផឹកកាហ្វេផង លំហែកាយខ្លួនឯងផងនិងបន្ធូរអារម្មណ៍ផង ។
៣) ស្ទះចរាចរណ៍៖ ដោយសារតែម៉ោងចេញធ្វើការនិងម៉ោងចេញពីសាលាភាគច្រើនគឺម៉ោង៥ល្ងាច បន្ថែមពីលើនេះទៅទៀត ម៉ោង៥ល្ងាចក៏ជាម៉ោងដែលគូសង្សារមួយចំនួនចេញទៅញាំអី អ្នករកស៊ីត្រលប់ទៅផ្ទះវិញ នេះមានន័យថាមនុស្សស្ទើរតែគ្រប់តំបន់ធ្វើចរាចរណ៍ចំពេលវេលាតែមួយ ដែលធ្វើឲ្យផ្លូវមួយចំនួនមានការកកស្ទះចរាចរណ៍។ ដោយសារតែមូលហេតុនេះផងដែរ យុវជនមួយចំនួនចូលចិត្តទៅហាងកាហ្វេក្រោយចេញពីធ្វើការឬចេញពីរៀន ព្រោះពួកគាត់គិតថាទៅក៏ស្ទះដដែល សម្រាកផឹកកាហ្វេសិនក៏បានព្រោះហត់ដែរ៕
អត្ថបទ៖ មុយយូ
