ការធ្វើដំណើរកម្សាន្ត នឹងផ្តល់អត្ថប្រយោជន៍សំខាន់ៗ៤យ៉ាងនេះដល់អ្នក!
ក្នុងសង្គមបច្ចុប្បន្ន ពោរពេញទៅដោយការប្រកួតប្រជែងខ្លាំង ធ្វើឲ្យមនុស្សគ្រប់គ្នាខិតខំច្រើនទាំងការសិក្សា ធ្វើការ និង ធ្វើជំនួញក្នុងគោលបំណងឲ្យជីវភាពរបស់ខ្លួន និង គ្រួសារមានលក្ខណៈល្អប្រសើរ។ ការខិតខំខ្លាំងបែបនេះហើយ ធ្វើឲ្យមនុស្សគ្រប់គ្នាតែងមានអារម្មណ៍តានតឹងក្នុងចិត្ត ហើយពេលខ្លះក៏ទាល់គំនិតក្នុងការរកអ្វីដែលល្អៗសម្រាប់ការរីកចម្រើន។ ប្រសិនបើអ្នកជួបបញ្ហាតានតឹង និង ស្មុគស្មាញបែបនេះ អ្នកត្រូវតែរៀបចំដំណើរកម្សាន្តមួយទៅតាមលទ្ធភាព ដើម្បីធ្វើឲ្យអារម្មណ៍ស្រស់ស្រាយឡើងវិញ។
ខាងក្រោមនេះ គឺជាប្រយោជន៍សំខាន់ៗមួយចំនួនដែលអ្នកគួរលៃលកពេលដើម្បីដើរកម្សាន្ត៖
- ជួយកាត់បន្ថយភាពតានតឹងក្នុងចិត្ត៖ ដូចដែលបានដឹងហើយថា ការធ្វើការងារ ឬ សិក្សាច្រើនខ្លាំងពេក ធ្វើឲ្យអារម្មណ៍របស់អ្នកមានភាពតានតឹង ហើយកាលណាស្ថានភាពបែបនេះបន្តទៅយូរពេក វាបង្កបញ្ហាដល់អ្នកមិនខាន ព្រោះបើកាលណាអារម្មណ៍មិនសូវល្អហើយ ទោះធ្វើអ្វីក៏មិនសូវល្អដែរ។ ដូច្នេះ ជម្រើសដ៏ល្អបំផុតអ្នកគួរតែរើសពេលវេលាណាមួយធ្វើដំណើរកម្សាន្ត ដើម្បីទទួលបានភាពរីករាយ និង ស្រស់ស្រាយឡើងវិញ។
- មានគំនិតច្នៃប្រឌិតជាងមុន៖ ការដើរកម្សាន្តទៅកន្លែងផ្សេងៗ មិនត្រឹមតែធ្វើឲ្យជួយអ្នកមានអារម្មណ៍សប្បាយរីករាយនោះទេ តែវាក៏ជួយឲ្យអ្នក មានគំនិតថ្មី និង មានគំនិតច្នៃប្រឌិតជាងមុនផងដែរ។ នៅពេលដើរកម្សាន្តនោះ អ្នកប្រាកដជា ឃើញទិដ្ឋភាពប្លែកៗ ហើយនឹងយល់ដឹងអំពីរបៀបរស់នៅ និង ការធ្វើជំនួញផ្សេងៗរបស់អ្នកនៅតំបន់ទេសចរណ៍ទាំងនោះ ដែលចំណុចទាំងនេះពិតជាមានសារសំខាន់សម្រាប់ ការអភិវឌ្ឍន៍គំនិត។
- បង្កើតភាពរីករាយដល់គ្រួសារ៖ នៅពេលបច្ចុប្បន្នដោយសារតែ រវល់ខ្លាំងពេក មនុស្សភាគច្រើនគ្មានពេលគ្រប់គ្រាន់សម្រាប់បង្កើតភាពរីករាយក្នុងគ្រួសារនោះទេ សូម្បីតែបរិភោគអាហាររួមគ្នាក៏ពិបាកដែរ។ ដូច្នេះហើយ អ្នកគួរយកពេលណាមួយដើរកម្សាន្តរួមគ្នាជាមួយនឹងគ្រួសារ ដើម្បីសាងភាពស្និទ្ធស្នាល និង ផ្អែមល្ហែមរួមគ្នា។ វាជាចំណុចសំខាន់មួយដែល ជួយឲ្យគ្រួសារមានសុភមង្គលផងដែរ។
- ជួយឲ្យសុខភាពប្រសើរ៖ កាលណាមនុស្សធ្វើការច្រើនពេក នោះនាំឲ្យមានបញ្ហាសុខភាពកើតឡើង។ ការឈប់សម្រាក ដើម្បីដើរលំហែកាយគឺជា ប្រការដ៏ចាំបាច់បំផុតសម្រាប់អ្នកដែលស្ថិតក្នុងស្ថានភាពនេះ។ កាលណា អ្នកមានអារម្មណ៍ស្មុគស្មាញ បូករួមនឹងការចុះខ្សោយនៃកម្លាំងកាយផង វានាំឲ្យមានបញ្ហាសុខភាពធ្ងន់ធ្ងរនៅពេលណាមួយមិនខាន ដូច្នេះ ការដើរលំហែកាយ នឹងក្លាយជាពេលវេលាមួយដ៏ល្អបំផុត សម្រាប់ពង្រឹងរាងកាយ និង អារម្មណ៍ ហើយវានឹងជួយឲ្យអ្នកមានសុខភាពប្រសើរឡើងវិញមិនខាន៕
ដោយ៖ អ៊ុន ភក្តី
