អាហារបំប៉នចំនួន៥ ដែលអាចជំនួសមុខងារកាហ្វេក្នុងការផ្ចង់អារម្មណ៍អ្នកឲ្យមូលបាន
ដើម្បីបំពេញកិច្ចការងារប្រកបដោយប្រសិទ្ធភាព ការផ្ចង់អារម្មណ៍ឲ្យមូលយកចិត្តទុកដាក់ទៅលើការងារចំពោះមុខគឺជារឿងសំខាន់បំផុត។ ប៉ុន្តែមានកត្តាជាច្រើនដែលផ្ដល់ការលំបាកដល់អ្នកក្នុងការប្រមូលអារម្មណ៍មកផ្ដោតលើការងារ ដែលអាចបណ្ដាលមកពីភាពហត់នឿយ និងការគេងមិនបានគ្រប់គ្រាន់ជាដើម ហើយអ្វីដែលអ្នកនឹកឃើញមុនគេដើម្បីជួយអ្នកឲ្យផ្ចង់អារម្មណ៍បានមូលល្អ សម្រាប់មនុស្សភាគច្រើនតែងតែជាកាហ្វេពិតមែនទេ ? ថ្វីត្បិតតែកាហ្វេជួយអ្នកឲ្យផ្ចង់អារម្មណ៍ តែផ្ទុយទៅវិញវានឹងទាញយកថាមពលចេញពីក្នុងខ្លួនអ្នក។ ដូច្នេះតើអាហារប្រភេទណាវិញ ដែលអាចជំនួសកាហ្វេបាន ហើយថែមទាំងអាចបង្កើនថាមពលដល់អ្នកវិញផងនោះ ?
១) ទឹក៖ ភេសជ្ជៈដ៏សាមញ្ញបំផុត ក្បែរអ្នកបំផុត និងមិនអស់ថ្លៃចំណាយទៅទៀតនោះគឺជាទឹកនេះឯង។ ការខ្វះជាតិទឹកក្នុងខ្លួនក៏ជាមូលហេតុចម្បងមួយ ដែលនាំអ្នកឲ្យបាត់បង់ស្មារតីផ្ចង់អារម្មណ៍ដែរ។ បរិមាណទឹកដែលអ្នកត្រូវទទួលទានជាប្រចាំថ្ងៃ គឺអាស្រ័យទៅលើអាយុនិងភេទរបស់អ្នក។ ក្មេងដែលមានអាយុចន្លោះពី៤ដល់៨ឆ្នាំ ត្រូវការទឹក៥កែវក្នុង១ថ្ងៃ។ ពីអាយុ៩ដល់១០ឆ្នាំ ត្រូវការពី៧ទៅ៨កែវក្នុង១ថ្ងៃ។ បើពី១៤ដល់១៨ឆ្នាំ ត្រូវការពី៨ដល់១១កែវក្នុង១ថ្ងៃ។ សម្រាប់បុរសចាប់ពី១៩ឆ្នាំឡើង ត្រូវការទឹកចំនួន១៣កែវ រីឯស្ត្រីចាប់ពី១៩ឆ្នាំឡើង ត្រូវការទឹកចំនួន៩កែវ។ បរិមាណទឹក១០កែវចាំបាច់ចំពោះស្ត្រីមានគភ៌ និងទឹក១៣កែវសម្រាប់ស្ត្រីបំបៅដោះកូន។
២) បន្លែស្លឹកបៃតង៖ បន្លែស្លឹកបៃតងតែងមានផ្ទុកនូវសារជាតិដែលប្រឆាំងនឹងអុកស៊ីតកម្ម ហើយវាមិនត្រឹមតែអាចជួយបង្កើនការផ្ចង់អារម្មណ៍អ្នកក្នុងខណៈពេលបច្ចុប្បន្នឥឡូវនេះឡើយ នៅពេលអ្នកមានទម្លាប់ទទួលទានបន្លែបៃតងច្រើនក្នុងរបបអាហារប្រចាំថ្ងៃ វានឹងជួយឲ្យការគិតរបស់អ្នកមានភាពជាក់លាក់នៅពេលអនាគតផងដែរ។
៣) តែបៃតង៖ ជាប្រភេទតែតែងតែមាននូវសារជាតិកាហ្វេអ៊ីនដូចកាហ្វេដែរ ប៉ុន្តែគ្រាន់តែបរិមាណរបស់វាមានទាបជាង ទាបសមល្មមចំពោះសុខភាពអ្នក។ ក្នុងពេលតែមួយ ប្រយោជន៍តែបៃតងអាចជួយរក្សាទម្ងន់របស់អ្នក និងជួយដាស់ស្មារតីអ្នកឲ្យភ្ញាក់និងផ្ចង់អារម្មណ៍ឲ្យមូលល្អទៅលើការងារចំពោះមុខ។ មិនគួរឲ្យសង្ស័យឡើយដែលនេះជាមូលហេតុមួយដែលជនជាតិជប៉ុនតែងមានទម្លាប់ទទួលទានតែបៃតងជាប្រចាំថ្ងៃនោះ។
៤) ផ្លែចេក៖ បើអ្នកមានការប្រឡងឆាប់ៗខាងមុខ ហើយកំពុងតែត្រូវការអាហារបំប៉នខួរក្បាល នោះផ្លែចេកគួរតែជាអាហារបំប៉នដែលអ្នកគួរទទួលទានហើយ។ ផ្លែចេកជួយបង្កើនថាមពលដល់អ្នក ការផ្ចង់អារម្មណ៍ និងជួយឲ្យអ្នកមានអារម្មណ៍ស្រស់ស្រាយដូចគ្នានឹងផ្លែប៉ោមដែរ។
៥) ស៊ុត៖ អ្នកធ្លាប់ដឹងរួចមកហើយថា ស៊ុតមានអត្ថប្រយោជន៍ជាច្រើនសម្រាប់ការទទួលទានក្នុងរបបអាហារប្រចាំថ្ងៃ។ នេះក៏ព្រោះតែនៅក្នុងស៊ុតតែងតែមាននូវជាតិអូមេហ្គា៣ ហើយជាតិអូមេហ្គា៣នេះមានប្រយោជន៍សម្រាប់ការចងចាំនិងអារម្មណ៍របស់អ្នក។ រីឯជាតិកូលីនដែលមានក្នុងស៊ុតក៏បានជួយរក្សាភ្នាសកោសិកាខួរក្បាលរបស់អ្នកឲ្យមានសុខភាពល្អផងដែរ។ វានឹងកាន់តែមានប្រសិទ្ធភាព បើអ្នកទទួលទានទាំងផ្នែកពណ៌សនិងក្រហមរបស់ស៊ុតផងនោះ៕
ដោយ៖ ស្រីពៅ
