បើមានសញ្ញាទាំង៥យ៉ាងនេះ បញ្ជាក់ថា ជីវិតរបស់អ្នកមិនអន់នោះឡើយ ទោះអ្នកមិនគិតអ៊ីចឹងក៏ដោយ!
មនុស្សជាច្រើនគិតអវិជ្ជមានចំពោះខ្លួនឯង ថាខ្លួនឯងជាមនុស្សដែលគ្មានបានការ។ ប៉ុន្តែគ្រាន់តែគិតអាក្រក់ៗលើខ្លួនឯងបែបនេះ គឺមិនអាចផ្លាស់ប្តូរអ្វីបានឡើយ ថែមទាំងធ្វើឲ្យអ្នកបាក់ទឹកចិត្តទៀត។ ដូច្នេះហើយ អ្នកត្រូវគិតផ្លូវល្អចំពោះខ្លួនឯងឲ្យបានច្រើន ហើយព្យាយាមពុះពារដើរទៅមុខ ដើម្បីសម្រេចតាមក្តីប្រាថ្នា។ បើមានចំណុចទាំង៥នេះ មានន័យថា ជីវិតរបស់អ្នកមិនអាក្រក់ពេកនោះទេ៖
១) អ្នកមានការងារច្បាស់លាស់មួយ៖ មិនថាការងាររបស់អ្នកស្ថិតក្នុងលំដាប់ណានោះទេ ប៉ុន្តែឲ្យតែជាការងារត្រឹមត្រូវ មិនលួចឆក់ប្លន់គេ គឺមានន័យថា ជីវិតរបស់អ្នកកំពុងដើរលើផ្លូវត្រូវមួយហើយ។ ដូច្នេះហើយកុំអស់សង្ឃឹមប្រសិនបើការងាររបស់អ្នកផ្តល់ប្រាក់ខែតិចតួចក្តី ព្រោះវាប្រសើរជាងអត់ការងារធ្វើ ឬ ធ្វើការងារណាដែលបំផ្លាញសង្គមដែរ ហើយអ្នកត្រូវតែខិតខំបន្តទៀតដើម្បីធ្វើឲ្យខ្លួនជោគជ័យលើការងារដែលចង់ធ្វើនៅពេលខាងមុខ។
២) អ្នកមានជម្រកច្បាស់លាស់៖ ទោះបីជា អ្នកហាក់មិនពេញចិត្តចំពោះទីជម្រកបច្ចុប្បន្ននេះក៏ដោយ ប៉ុន្តែអ្នកគួរតែសប្បាយចិត្តដោយសារតែ មានទីជម្រកមួយច្បាស់លាស់ ទោះបីជាតូចបន្តិចក្តី ព្រោះអ្នកមិនចាំបាច់ដើរពីកន្លែងមួយទៅកន្លែងមួយដោយគ្មានគោលដៅច្បាស់លាស់នោះទេ។
៣) អ្នកមានគ្រួសារដ៏រីករាយមួយ៖ គ្រួសារដែលរីករាយ មិនមែនទាល់តែមានលុយច្រើនចាយមិនអស់នោះទេ ព្រោះលុយមិនអាចកំណត់ពីសុភមង្គលបានទាំងស្រុងឡើយ។ ភាពរីករាយក្នុងគ្រួសារ គឺកើតឡើងពីការស្រលាញ់ យល់ចិត្ត និង អធ្យាស្រ័យគ្នាទៅវិញទៅមក។ ដូច្នេះអ្នកគួរតែមានមោទនភាព ប្រសិនបើអ្នកមានគ្រួសារល្អប្រភេទនេះ។
៤) អ្នកមានអាហារគ្រប់គ្រាន់៖ ទោះបីជាឆ្ងាញ់ ឬ មិនសូវឆ្ងាញ់ក្តី ឲ្យតែមានអារម្មណ៍សម្រាប់បរិភោគគ្រប់គ្រាន់ និង ទៀងពេលនោះ មានន័យថាជីវិតរបស់អ្នកគឺនៅតែសំណាងជាមនុស្សជាច្រើនទៀត ដែលមិនស្គាល់ពាក្យថា «ហូបឆ្អែត»។ ដូច្នេះមិនគួរគិតអវិជ្ជមានចំពោះជីវិតរបស់អ្នកឡើយ ហើយគួរតែពើងទ្រូង ជំនះរាល់ឧបសគ្គដើម្បីសាងជីវភាពឲ្យប្រសើរជាងនេះ។
៥) អ្នកមានលទ្ធភាពរស់នៅដោយខ្លួនឯង៖ មនុស្សជាច្រើនចូលចិត្តបង្ហាញពីសម្ភារៈថ្លៃៗ ថាខ្លួនជាអ្នកមានទ្រព្យសម្បត្តិច្រើន។ ប៉ុន្តែជាការកត់សម្គាល់ វត្ថុថ្លៃៗទាំងនោះ មិនមែនជាលុយញើសឈាមរបស់ខ្លួនឡើយ គឺបានមកពីលុយឪពុកម្តាយប៉ុណ្ណោះ។ ដូច្នេះប្រសិនបើអ្នក អាចមានលទ្ធភាពរស់នៅដោយខ្លួនឯង ទោះបីជាអាចទិញបានតែរបស់ថោកៗសម្រាប់ប្រើប្រាស់ក៏ដោយ អ្នកគួរតែមានមោទនភាពចំពោះខ្លួនឯង ព្រោះវាជាលុយរបស់អ្នក៕
ដោយ៖ រតនា វិចិត្រ
