យុវជនដែលចង់រកស៊ី ត្រូវយល់ពីចំណុចស្លាប់រស់នៃអាជីវកម្មទាំងនេះឲ្យច្បាស់សិន
មនុស្សភាគច្រើនសុទ្ធតែមានក្តីស្រមៃចង់ធ្វើអាជីវកម្ម ឬ ជំនួញ ព្រោះម្នាក់ៗសុទ្ធតែចង់រស់នៅដោយធ្វើជាម្ចាស់លើខ្លួនឯង ហើយចង់ក្លាយជាមនុស្សដែលបញ្ជាគេជាជាងអង្គុយស្ដាប់តាមការបញ្ជារបស់អ្នកដទៃ។ ប៉ុន្តែថ្វីត្បិតមនុស្សភាគច្រើន មានក្តីស្រមៃចង់ធ្វើជំនួញមែន ប៉ុន្តែតិចណាស់ដែលអាចក្លាយជាការពិត ព្រោះវាលំបាកខ្លាំងណាស់ ហើយលំបាកលើសពីការរំពឹងទុក អ៊ីចឹងហើយបានជា អាជីវកម្មមួយចំនួនបើកបានប៉ុន្មានខែ ឬ ឆ្នាំក៏ដួលផ្ងារជើងទៅវិញ ក្រោមហេតុផលជាច្រើន។ យ៉ាងណាក៏ដោយ ប្រសិនបើអ្នកពិតជាចង់ធ្វើជំនួញដោយជោគជ័យមែន ខាងក្រោមនេះ ជាចំណុចសំខាន់ៗដែលអ្នកត្រូវតែមាន និង ត្រៀមខ្លួនជាស្រេច៖
១) ដើមទុន៖ សាមញ្ញបំផុត ដើម្បីធ្វើអាជីវកម្មមួយបាន គេត្រូវយកលុយដើម្បីទៅចាត់ចែងដំណើរការ មិនមែនយកក្រដាស ឬ យកតែមាត់ទៅធ្វើនោះទេ។ ទំហំនៃដើមទុននេះ វាអាស្រ័យទៅលើប្រភេទអាជីវកម្ម និង ទំហំអាជីវកម្មដែលអ្នកចង់បាន។ ត្រូវចាំថា ត្រូវមានទុនសម្រាប់ដំណើរការក្នុងរយៈពេលច្បាស់លាស់មួយ ហើយក៏ត្រូវមានថវិកាបម្រុងផងដែរ ដើម្បីប្រាកដថា នៅពេលជួបបញ្ហាផ្សេងៗ អាជីវកម្មរបស់អ្នកនឹងមិនដួលដោយងាយ។
២) ផែនការអាជីវកម្មច្បាស់លាស់៖ ត្រូវចាំថា បើអ្នកបរាជ័យក្នុងការរៀបចំគម្រោង ឬ ផែនការ វាមានន័យស្មើនឹងអ្នកកំពុងតែរៀបគម្រោងដើម្បីបរាជ័យ។ អ្នកត្រូវតែរៀបចំឲ្យច្បាស់លាស់ ប៉ុន្តែសូមកុំគិតរហូតដល់សុញ ហើយដំណើរការអាជីវកម្មលែងកើតឲ្យសោះ ព្រោះថា ពេលខ្លះអ្វីៗវាប្រែប្រួលទៅតាមស្ថានការណ៍ជាក់ស្ដែង។
៣) ជ្រើសរើសដៃគូ ឬ ធ្វើតែឯង៖ អ្នកត្រូវតែសម្រេចចិត្តថា តើអ្នកចង់ធ្វើអាជីវកម្មតែម្នាក់ឯង ឬ ជាមួយដៃគូ។ អ្នកត្រូវមើលឲ្យធ្លុះពីគុណសម្បត្តិ និង គុណវិបត្តិរបស់វា មុននឹងសម្រេចចិត្ត។ បើអ្នកសម្រេចចិត្តធ្វើវាតែម្នាក់ឯង គឺថា អ្វីៗស្ថិតក្រោមការសម្រេចចិត្តរបស់អ្នក ហើយមិនពិបាកពិភាក្សាប្រកែកគ្នានៅពេលក្រោយ ប៉ុន្តែទាល់តែអ្នកមានដើមទុនច្រើនគួរសមផងដែរ ហើយអ្នកក៏ត្រូវតែជាមនុស្សដែលមានចំណេះដឹងខ្ពស់ និង មានបទពិសោធន៍ច្រើន បើមិនដូច្នោះទេ គឺពិបាកបន្តិច។ តែបើអ្នកជ្រើសរើសដៃគូដើម្បីធ្វើអាជីវកម្ម គឺថា ងាយស្រួលក្នុងការដំណើរការ ព្រោះ មានដើមទុនគ្រប់គ្រាន់ និង មានគំនិតល្អៗច្រើន ប៉ុន្តែត្រូវចាំថា វាពិតជាពិបាកក្នុងការសម្រេចចិត្ត ហើយបើប៉ះដៃគូល្អក្នុងការធ្វើការមិនជាអ្វីទេ តែអ្នកខ្លះវិញ នៅពេលជួបបញ្ហាបន្តិចបន្តួចក៏ចង់រត់ចោល ហើយធ្វើការក៏មិនស្មើគ្នា តែបើនិយាយពីប្រយោជន៍វិញ គឺទាមទារនោះទាមទារ ហើយថ្ងៃក្រោយអាចនឹងមានការឈ្លោះគ្នា ប្រសិនបើមិនបានជជែកគ្នា ឬធ្វើកិច្ចសន្យាឲ្យបានច្បាស់។
៤) បទពិសោធន៍ និង ចំណេះដឹងលើវិស័យនោះ៖ ប្រសិនបើអ្នកចង់រកស៊ីផ្នែកអ្វីមួយ អ្នកត្រូវប្រាកដថា អ្នកមានចំណេះដឹង និង បទពិសោធន៍ច្បាស់លាស់ ដើម្បីប្រាកដថា អ្នកបានក្ដោបព័ត៌មានបានច្រើន ហើយងាយនឹងដំណើរការ ជាពិសេសទៅទៀតដឹងច្បាស់ថា ទីផ្សារវាដំណើរការយ៉ាងដូចម្ដេច និង ដឹងច្រើនពីឱកាស និង ការគំរាមកំហែងក្នុងទីផ្សារ។ សូមកុំរកស៊ីផ្នែកអ្វីដែលអ្នកមិនដែលស្គាល់ ឬ ដឹងឲ្យសោះ ព្រោះថា ឱកាសនៃការបរាជ័យគឺ ធំខ្លាំងណាស់។
៥) មានការស្រលាញ់ និង ការអត់ធ្មត់៖ ត្រូវចាំថា បើអ្នកមិនស្រលាញ់អាជីវកម្មដែលខ្លួនចង់ដំណើរការនោះទេ អ្នកនឹងបោះបង់វាចោលមិនខាននៅពេលដែលជួបបញ្ហា។ អ្នកត្រូវមានការស្រលាញ់ និង ការអត់ធ្មត់ឲ្យធំបំផុត ពេលខ្លះត្រូវមានវាឲ្យលើសពីផែនការអាជីវកម្មទៅទៀត ព្រោះថា ក្នុងស្ថានភាពមួយចំនួនមិនមែនផែនការអាជីវកម្មល្អនោះទេ ដែលនាំឲ្យអ្នកជោគជ័យ ប៉ុន្តែវាជាការស្រលាញ់ និង ការអត់ធ្មត់។ ជាក់ស្ដែង ក្នុងពេលដំណើរការអាជីវកម្ម វាពិតជាមានរឿងរ៉ាវជាច្រើនដែលកើតឡើង ហើយពេលខ្លះវាពិតជានឹកស្មានមិនដល់ ហើយផែនការអាជីវកម្មរបស់អ្នកនោះគឺមិនអាចអនុវត្តចេញបានឲ្យមានប្រសិទ្ធភាពឡើយ ដែលទាមទារឲ្យមានការកែសម្រួល ប៉ុន្តែបើអ្នកពិតជាស្រលាញ់ប្រភេទអាជីវកម្មនោះទេមែន ទោបីជាលំបាកប៉ុណ្ណាក៏ដោយ អ្នកនៅតែបន្តធ្វើការងារនោះរហូត ជាមួយនឹងភាពអត់ធ្មត់ដ៏ធំមួយ ដូច្នេះហើយ នៅទីបំផុតអ្នកនឹងសម្រេចវា៕
ដោយ៖ រតនា វិចិត្រ
