ចំណុច៤យ៉ាងអំពីស្វីស ដែលជាប្រទេសដែលពិបាកវាយលុកបំផុតនៅលើពិភពលោក
អស់រយៈកាលជាច្រើនសតវត្សកន្លងមកហើយ ស្វីសគឺជាប្រទេសដ៏មានស្ថិរភាពមួយដែលមិនធ្លាប់ចូលពាក់ព័ន្ធនឹងសង្គ្រាមភ្នក់ភ្លើងដូចបណ្ដាប្រទេសមហាអំណាចជិតខាងដទៃទៀតនោះឡើយ។ កងកម្លាំងយោធាការពារជាតិដ៏រឹងមាំបានធ្វើឲ្យស្វីសត្រូវបានគេចាត់ទុកជាប្រទេសមួយដែលពិបាកនឹងវាយលុកបំផុត។ ទោះជាយ៉ាងណាក៏ដោយ ចំណុច៤យ៉ាងខាងក្រោមគឺជាលក្ខណៈមានប្រៀបរបស់ស្វីសលើប្រទេសដទៃ។
១) គុណភាពជីវិតមានខ្ពស់
បើអ្នកបានធ្វើដំណើរទៅកាន់ស្វីស អ្នកនឹងសង្កេតឃើញថាសូម្បីតែអ្នកសុំទានអត់អាហារម្នាក់ក៏រកមិនមានដែរ។ ប្រជាជនរបស់ពួកគេមានចំណូលប្រចាំខែខ្ពស់ មិនថាតែអ្នកបម្រើនៅតាមភោជនីយដ្ឋាននោះទេ យ៉ាងហោចណាស់ក្នុង១ម៉ោងក៏អាចទទួលបានប្រាក់២០CHF ដែលមានតម្លៃប្រមាណ២០ដុល្លារអាមេរិកដែរ ស្របពេលដែលថ្លៃពន្ធក៏មានតម្លៃទាបដែរ។
២) តុល្យភាពជីវិតនិងការងារ
ប្រជាជនស្វីសមិនធ្វើការនៅពេលល្ងាច និងថ្ងៃចុងសប្ដាហ៍នោះឡើយ ឯនៅតាមហាងលក់ទំនិញក៏ដូចគ្នាដែរ លើកលែងតែនៅតាមបារដែលបើកនៅថ្ងៃធម្មតាដល់ម៉ោង៧យប់ បិទម៉ោង៤ល្ងាចនៅថ្ងៃសៅរ៍ និងបិទពេញមួយថ្ងៃអាទិត្យតែម្ដង។ ម្យ៉ាងទៀត ពួកគេក៏ជាអ្នកគិតគូរពីសុខភាពរបស់ខ្លួនដែរ ដូច្នេះហើយអ្នកនឹងឃើញថាប្រជាជនពួកគេតែងធ្វើលំហាត់ប្រាណ និងលេងកីឡាជាប្រចាំថ្ងៃ។
៣) ប្រព័ន្ធអប់រំដែលធូរថ្លៃបំផុត
បើទោះជាសាកលវិទ្យាល័យល្បីឈ្មោះជាងគេក្នុងស្វីសក៏ដោយ ក្នុង១ឆមាសអ្នកអាចនឹងត្រូវចំណាយត្រឹមតែ៥០០CHF ដែលអាចមានតម្លៃជាង៥០០ដុល្លារអាមេរិកតែប៉ុណ្ណោះ។ រីឯថ្នាក់អនុបណ្ឌិត និងសូម្បីតែថ្នាក់បណ្ឌិតក៏មិនខុសគ្នាដែរ។
៤) បរិស្ថានល្អនិងខ្យល់អាកាសបរិសុទ្ធ៖ បរិស្ថានល្អអាចទៅរួចបាន ដោយសារតែពួកគេមិនអនុញ្ញាតឲ្យប្រើប្រាស់ម៉ាស៊ីនត្រជាក់នោះទេ បើទោះជាសីតុណ្ហភាពឡើងក្ដៅរហូតដល់ទៅ៣២អង្សាក៏ដោយ ក៏អ្នកនឹងឃើញថាពួកគេគ្រាន់តែប្រើប្រាស់កង្ហារមិនថានៅផ្ទះឬនៅតាមកន្លែងធ្វើការនោះទេ។ ម្យ៉ាងទៀត ស្មារតីគិតគូរពីបរិស្ថានរបស់ពួកគេ ក៏អាចឲ្យអ្នកផឹកទឹកពីបំពង់ទឹកដែលដាក់នៅតាមទីសាធារណៈដោយគ្មានការភ័យព្រួយអ្វីដល់សុខភាពនោះដែរ៕
ប្រែសម្រួល៖ ស្រីពៅ
ប្រភព៖ businessinsider
