ប្រសិនជាអ្នកមិនទាន់រកឃើញគោលដៅក្នុងជីវិតទេ ចូរសាកល្បងអនុវត្តចំណុចខាងក្រោមនេះ
មានថ្ងៃខ្លះ ស្រាប់តែពេលអ្នកងើបពីគេង អ្នកមានអារម្មណ៍ថាជីវិតដូចជាគ្មានន័យទាល់តែសោះ អ្នកមិនដឹងថាអ្នកត្រូវងើបឡើងដើម្បីអ្វី ងើបឡើងដើម្បីធ្វើអ្វី អ្នកគ្មានគោលដៅដែលត្រូវបំពេញ ក៏ប៉ុន្តែ ចូរកុំបន្ទោសខ្លួនឯងអី វាជារឿងធម្មតានោះទេ។ តែ ប្រសិនជាអ្នករកឃើញគោលដៅក្នុងជីវិតហើយ អ្នកនឹងមានអារម្មណ៍ថាជីវិតពិតជាមានតម្លៃខ្លាំងណាស់។ ខាងក្រោមនេះជាចំណុចដែលអាចជួយអ្នករកគោលដៅក្នុងជីវិតបាន៖
១) ស្តាប់បេះដូងរបស់អ្នក៖ ជាការពិតណាស់ អ្នកនឹងមានអារម្មណ៍ថាមិនសប្បាយប្រសិនជាអ្នកធ្វើអ្វីដែលផ្ទុយពីចិត្តរបស់អ្នកពីព្រោះថាវាប្រៀបបានដូចជាអ្នកកំពុងតែបង្ខំខ្លួនឯងឲ្យចូលចិត្តវាអ៊ីចឹង។ ដូច្នេះហើយ ចូរសួរខ្លួនឯងតើអ្នកចូលចិត្តអ្វីហើយធ្វើវាឲ្យបានល្អ។
២) យកអនុស្សាវរីយធំជាងលុយ៖ លុយពិតជាសំខាន់ណាស់សម្រាប់ជីវិត ប៉ុន្តែចូរកុំភ្លេចរស់នៅដោយសប្បាយចិត្ត។ អ្នកគួរតែលៃលកពេលវេលាខ្លះទៅធ្វើអ្វីដែលអ្នកចូលចិត្ត ចង់សម្រេច ឬចង់សាកល្បង។ កុំរស់ដើម្បីធ្វើការ កុំចំណាយពេលវេលាច្រើនពេកទៅលើការងារដោយភ្លេចរីករាយនឹងជីវិតដែលអ្នកមាន។
៣) កសាងទំនាក់ទំនង៖ អ្នកអាចនឹងមានលុយ មានឡាន មានផ្ទះ មានទូរស័ព្ទទំនើបៗ មានលុយដើរលេង។ល។ ប៉ុន្តែ ទាំងអស់នេះនឹងមិនធ្វើឲ្យអ្នកសប្បាយចិត្តបានយូរអង្វែងនោះទេពីព្រោះថាប្រសិនជាអ្នកគ្មានមិត្តភ័ក្ដិឬគ្រួសារនៅក្បែរ អ្នកប្រៀបបានដូចជារស់នៅក្នុងពិភពលោកដែលគ្មានមនុស្សអ៊ីចឹង អ្នកនឹងមានអារម្មណ៍ថាឯកាជាខ្លាំង។
៤) ឲ្យត្រលប់ទៅវិញ៖ ទោះបីជាវាមានសារៈសំខាន់ដែលអ្នកត្រូវគិតពីខ្លួនឯង តែវាកាន់តែសំខាន់ប្រសិនជាអ្នកអាចគិតដល់ប្រយោជន៍អ្នកដទៃផងដែរ។ ប្រសិនជាអ្នកអាចជួយអ្នកដទៃតាមរយៈ ការងារឬសេវាកម្មរបស់អ្នក អ្នកនឹងមានអារម្មណ៍ថាអ្នកពិតជាបានសម្រេចនិងជោគជ័យពិតប្រាកដក្នុងឆាកជីវិតមួយនេះ៕
ប្រែសម្រួល៖ អុឹង មុយយូ ប្រភព៖ addicted2success.com
