អ្នកមិនគួររំលងចំណុចទាំងនេះឡើយប្រសិនជាអ្នកចង់ឲ្យជំនួញរបស់អ្នកជោគជ័យ
បើទោះបីជាអ្នកមានសមត្ថភាពឬមានលុយគ្រប់គ្រាន់ក្នុងការកសាងជំនួញដោយខ្លួនឯងក៏ដោយ នោះក៏មិនប្រាកដថាជំនួញរបស់អ្នកនឹងជោគជ័យដែរ។ ច្បាស់ណាស់ថា អ្នកនឹងជួបឧបសគ្គនៅតាមផ្លូវ។ ប៉ុន្តែ ប្រសិនជាអ្នកចង់ជោគជ័យ ចូរធ្វើនូវចំណុចខាងក្រោមនេះ៖
១) ធ្វើជាសិស្សរហូត៖ មិនថាអ្នកមានបទពិសោធន៍ការងារច្រើនយ៉ាងណាឬអាយុច្រើនយ៉ាងណាក្តី ហើយអ្នកគិតថាអ្នកដឹងច្រើនឬមានចំណេះដឹងច្រើន អ្នកត្រូវតែបន្តរៀនសូត្រជានិច្ច បន្តអភិវឌ្ឍន៍ខ្លួនឯងជានិច្ចពីព្រោះថាការបន្តការរៀនសូត្រមិនត្រឹមតែជួយបង្កើនចំណេះដឹងថ្មីៗ ដើរទាន់សម័យកាលនោះទេ ថែមទាំងជួយអ្នកឲ្យមានទំនុកចិត្តខ្លាំងជាងមុន។
២) រៀនគ្រប់គ្រងអារម្មណ៍៖ អ្នកត្រូវតែរៀនគ្រប់គ្រងអារម្មណ៍ខ្លួនឯងឲ្យបាន។ បើទោះបីជាអ្នកជាថៅកែក៏ដោយ អ្នកក៏មិនអាចប្រើប្រាស់អារម្មណ៍របស់អ្នកក្នុងការងារបានដែរ។ ឧទាហរណ៍ថា៖ អ្នកមានអារម្មណ៍មិនល្អមកពីផ្ទះ អ្នកមិនអាចជះកំហឹងទៅកាន់បុគ្គលឬអតិថិជនរបស់អ្នកបានឡើយ។
៣) មើលថែជំនួញរបស់អ្នកឲ្យបានល្អ៖ ពិតប្រាកដណាស់ គ្មានជំនួញណាអាចដើរទៅមុខដោយគ្មានការមើលថែនោះទេ។ ក្នុងនាមជាអ្នកជំនួញ មានរឿងជាច្រើនដែលយើងត្រូវធ្វើនិងមិនត្រូវធ្វើ។ ឧទាហរណ៍ថា៖ មិត្តភ័ក្ដិមានកម្មវិធីផឹកស៊ីហើយអញ្ជើញអ្នកទៅ ហើយអ្នកមានកិច្ចប្រជុំនៅថ្ងៃស្អែកនៅក្រុមហ៊ុន អ្នកប្រហែលជារវល់គ្មានពេលចូលរួមនោះទេ តែប្រសិនជាអ្នកអាចលៃលកពេលវេលាបាន អ្នកក៏មិនអាចផឹកស្រាច្រើនផងដែរពីព្រោះវាអាចនឹងប៉ះពាល់ដល់ការប្រជុំនិងការងារថ្ងៃស្អែក។
ជីវិតអ្នកជំនួញគឺអញ្ចឹងហើយ បើចង់ជោគជ័យ ត្រូវតែហ៊ានលះបង់ការសប្បាយនិងយកចិត្តទុកដាក់លើជំនួញ៕
ប្រែសម្រួល៖ អុឹង មុយយូ ប្រភព៖ addicted2success.com
