នេះជាអ្វីដែលនឹងកើតឡើងចំពោះអ្នក ពេលអ្នកក្លាយជានិស្សិតរៀននៅក្រៅប្រទេស
វានឹងមានរឿងផ្លាស់ប្ដូរកើតឡើង ពេលអ្នក ចាកចេញពីប្រទេសរបស់អ្នក ហើយអ្នកត្រូវរៀបចំខ្លួនព្រមទាំងសម្រួលខ្លួនឯងឲ្យស៊ាំនឹងវប្បធម៌នៅទីកន្លែងថ្មី។ អ្នកណាៗក៏ជួបប្រទះនឹងរឿងទាំងនេះដែរ ហើយពេលខ្លះវាក៏ពិបាកនឹងសម្របខ្លួនតាមដែរ តែក៏មិនបានន័យថាអ្នកធ្វើមិនបានដែរ។ នេះគឺជាអ្វីដែលនឹងជួបប្រទះ នៅពេលអ្នកទៅសិក្សានៅឯប្រទេសក្រៅ៖
១) មានមិត្តថ្មី៖ ការទៅរៀននៅក្រៅប្រទេស គឺជាផ្លូវដ៏ល្អមួយនាំមនុស្សថ្មីៗជាច្រើនឲ្យអ្នកបានស្គាល់។ ដើម្បីឲ្យសិស្សកាន់តែឆាប់ស៊ីចង្វាក់គ្នា និងស្គាល់គ្នាច្រើនជាងមុន សាលានីមួយៗភាគច្រើន តែងតែបង្កើតកម្មវិធីនៅដើមឆមាស ដើម្បីឲ្យសិស្សអន្តរជាតិទាំងអស់ឆាប់បានស្គាល់គ្នាជាងនេះ។
២) ពិសាអាហារថ្មីៗ៖ ជាការពិតណាស់ ប្រទេសមួយៗមានមុខម្ហូបខុសៗគ្នា។ បើអ្នកទម្លាប់តែពិសាអាហារប្រទេសរបស់អ្នក វាហាក់ដូចជាពិបាកបន្តិចហើយ។ តែពេលខ្លះនៅបរទេសក៏មានហាងអាហារខ្លះ ដែលអាចធ្វើម្ហូបរបស់ប្រទេសអ្នកបានដែរ តែវាកម្រមាន ហើយបើមានក៏តិចតួចដែរ។
៣) រស់នៅក្រោមច្បាប់ថ្មី៖ ច្បាប់ ប្រទេសនីមួយៗ គឺមិន ដូចគ្នាឡើយ។ ដូចនេះបើអ្នកទៅរស់នៅប្រទេសគេ អ្នកត្រូវរៀន ព្រមទាំងគោរពច្បាប់ប្រទេសគេឲ្យបានខ្ជាប់ខ្ជួន។
៤) វប្បធម៌នៅសាលារៀនថ្មី៖ តើអ្នកអាចទៅរៀនយឺតបានទេ? តើអ្នកទាក់ទងលោកគ្រូសាស្ត្រាចារ្យដោយរបៀបណា? តើសិស្សនៅទីនោះគោរពគ្នាយ៉ាងណា? តើវិន័យសាលាគឺដូចម្ដេចខ្លះ? នេះជាអ្វីដែលអ្នកត្រូវដឹងពីសាលាថ្មីរបស់អ្នក។
៥) ភាសាបរទេស៖ ភាសាក៏អាចជារបាំងមួយ សម្រាប់អ្នក ពេលទៅសិក្សានៅបរទេសដែរ។ តែភាគច្រើនគេតែងតែជ្រើសរើសភាសាអង់គ្លេសជាភាសាទី២សម្រាប់ទំនាក់ទំនង។ បើអ្នកចេះអង់គ្លេសស្ទាត់ជំនាញហើយ អ្នក ប្រហែលជាមិនសូវពិបាកខ្លាំងនោះទេ។
៦) មានអារម្មណ៍នឹកផ្ទះ៖ នរណាដែលមិននឹកផ្ទះ ពេលចាកចេញពីផ្ទះ និងស្រុកកំណើតរាប់ឆ្នាំបែបនេះ។ វាជារឿងធម្មតាទេដែលសុខៗ អ្នកស្រាប់តែនឹកឃើញអនុស្សាវរីយ ពីមុនៗ ពេលដែលអ្នក ជួបជុំគ្រួសារ នៅពិធីបុណ្យអ្វីមួយ។ នេះគឺជាអារម្មណ៍ដែលអ្នកនៅក្រៅប្រទេស តែងតែកើតមាន៕
ប្រែសម្រួល៖ ព្រំ សុវណ្ណកណ្ណិកា ប្រភព៖ studyinsweden
