វិធីសាមញ្ញៗ ៤យ៉ាងដើម្បីធ្វើខ្លួនឱ្យកាន់តែឆ្លាតវៃក្នុងការបំពេញការងារ និងអាជីវកម្ម
ភាពឆ្លាតវៃមិនមែនមានតែកម្រិតឆ្លាតវៃខាងក្នុង (ហៅថា IQ) នោះទេ មែនទែនទៅ បរិយាកាសខាងក្រៅក៏ជាកត្តាធ្វើឱ្យមនុស្សកាន់តែឆ្លាតវៃជាងមុនដែរ។ បរិយាកាសខាងក្រៅនេះ គឺចង់សំដៅទៅលើមនុស្សដែលលោកអ្នកសេពគប់ ការប្រឈមទៅនឹងបញ្ហាថ្មីៗ (new challenge) ភាពយន្តដែលអ្នកទស្សនា កន្លែងដំណើរកម្សាន្តដែលអ្នកជ្រើសរើស ជាដើម។ល។ គឺសុទ្ធតែជាកត្តាធ្វើឱ្យអ្នកឆ្លាតជាងមុនប្រសិនបើអ្នកជ្រើសរើសវាត្រឹមត្រូវ។ ចំណុចដែលរៀបរាប់នេះ គឺជាការជ្រើសរើសបរិយាកាសដ៏ត្រឹមត្រូវ។
១) ត្រូវចេះហ៊ានប្រឈមនឹងបញ្ហា (Challenge)៖ លោក Lev Vygotsky ជាអ្នកបង្កើតទ្រឹស្ដី Zone of Proximal Development ក្នុងអំឡុងពេល១០ឆ្នាំចុងក្រោយនៃជីវិតរបស់លោក។ លោកមានជំនឿថា កិច្ចការដ៏ប្រសើរដើម្បីអភិវឌ្ឍន៍សមត្ថភាពខាងក្នុងគឺចាប់ផ្ដើម និងទទួលយកកិច្ចការណាដែលលំបាក។ បញ្ញា ប្រៀបបានទៅនឹងសាច់ដុំរបស់មនុស្សយើងអីចឹងដែរពោលគឺវានឹងមិនរឹងមាំដាច់ខាតប្រសិនបើវាមិនទទួលនឹងទម្ងន់ការងារថ្មីៗ។ នោះហើយគឺជាជំហានដែលធ្វើឱ្យខ្លួនឯងឆ្លាតជាងមុន។
២) អានដោយឆ្លាតវៃ៖ ចូរធ្វើខ្លួនជានិស្សិតរហូត ពោលគឺមានន័យថា ត្រូវអាន ឬស្រាវជ្រាវតាមបណ្ដាញអ៊ីនធឺណិត ឬឯកសារផ្សេងៗដើម្បីបង្កើនបញ្ញាជាប្រចាំ។ យោងតាមអត្ថបទមួយដែលសរសេរដោយលោក Glen Stansberry បានសរសេរថា ៖«អ្នកដែលអានច្រើន គឺមានពិន្ទុ GPA ខ្ពស់ មានបញ្ញាខ្ពស់ និងមានចំណេះដឹងទូលំទូលាយជាងអ្នកដែលមិនសូវអាន»។
៣) ដើរជាមួយមនុស្សដែលឆ្លាតជាងអ្នក៖ ដូចបានបញ្ជាក់នៅក្នុងអត្ថបទមុនៗអីចឹង។ ការសេពគប់មិត្តគឺពិតជារឿងសំខាន់ណាស់ដើម្បីអភិវឌ្ឍន៍ខ្លួនឱ្យកាន់តែប្រសើរ។ មិនថាកម្រិតទំនាក់ទំនងរបស់អ្នកនិងមិត្តភក្ដិខ្លាំងឬខ្សោយកម្រិតណា វាពិតជាមានឥទ្ធិពលទៅលើឥរិយាបថ គំនិត និងអារម្មណ៍របស់អ្នក។ ដូច្នេះប្រសិនបើអ្នកបានដើរជាមួយមិត្តភ័ក្ដិដែលឆ្លាតជាងខ្លួន ពួកគេនឹងបង្ហាញការគោរព និងសមត្ថភាពរបស់គេចំពោះអ្នកដែលទាំងនោះគឺនឹងជួយធ្វើឱ្យអ្នកឆ្លាត និងមានពុទ្ធិថ្មីៗដែលអ្នកបានរៀនសូត្រពីទំនាក់ទំនងនោះ។
៤) ធ្វើខ្លួនជាម៉ាស៊ីនបង្កើតគំនិត (Ideal Machine)៖ លោក James Altucher អ្នកនិពន្ធសៀវភៅ The Choose Yourself Guide to Wealth ដែលបានចែករំលែកទម្លាប់ប្រចាំថ្ងៃរបស់លោកទៅដល់អ្នកអានថា ជារៀងរាល់ថ្ងៃទោះជាមានបញ្ហាអ្វីក៏ដោយ ក៏លោកកត់ត្រានូវគំនិតថ្មីៗរបស់លោកចំនួន ១០ដែរ។ យើងកាន់តែធ្វើជារៀងរាល់ថ្ងៃ យើងកាន់តែមានទម្លាប់ និងមានគំនិតថ្មីៗកាន់តែច្រើន៕
ដោយ៖ រតនៈវិភូ
