គន្លឹះងាយ ៗ ជំរុញឲ្យអ្នកសម្ភាសន៍ការងារឆាប់ជាប់!
អ្នកណាដែលថាមិនមានសម្ពាធ ពេលឈានដល់ការសម្ភាសន៍ការងារម្ដងៗនោះ។ សម្ពាធខ្លាំងពេកនាំឲ្យអ្នកភិតភ័យ ហើយការងារនឹងមិនអាចក្លាយជារបស់អ្នកបានឡើយ។ ហេតុនេះតើមានគន្លឹះអ្វី ដែលអាចនាំឲ្យអ្នកកុំឲ្យភិតភ័យ ហើយឆ្លើយសំនួរបានយ៉ាងល្អឥតខ្ចោះទេ?
១) និយាយចម្លើយឲ្យចំៗ៖ បើអ្នកតែងតែឆ្លើយសំណួរ លក្ខណៈទូទៅពេក អ្នកសួរគេនឹងមិនសូវយល់ច្រើនពីអ្នកឡើយ។ វាជារឿងល្អ បើអ្នកអាចឆ្លើយសំណួរដោយនិយាយរៀបរាប់ពីបទពិសោធន៍ខ្លួនឯង និងផ្ដល់ជាឧទាហរណ៍ជាក់ស្ដែងឲ្យច្បាស់ និងចំចំណុច។
២) កុំនិយាយរដាក់រដុប៖ បើអ្នកឧស្សាហ៍ប្រពាក្យ «ហ៊ឹម ឬអា» ច្រើនពេក វាបង្ហាញថាអ្នកកំពុងភិតភ័យនិយាយរដាក់រដុប រកនឹកអ្វីនិយាយមិនឃើញ។ ពេលខ្លះបើអ្នកទទួលបានសំណួរដែលពិបាក ហើយឆ្លើយមិនចេញ អ្នកត្រូវប្រញាប់ឆ្លើយវិញភ្លាម ថាអ្នកមិនសូវយល់នឹងសំណួរ ទាំងនោះក៏បាន។
៣) ត្រូវចេះរៀនសួរសំណួរគេវិញ៖ ពេលអ្នកមិនសួរសំណួរទៅគេវិញ អ្នកបានបាត់បង់ឱកាស ក្នុងការទទួលយកព័ត៌មានល្អៗពីក្រុមហ៊ុនបាត់ទៅហើយ។ បើអ្នកមិនសួរសំណួរ វាបង្ហាញថាអ្នកមិនចាប់អារម្មណ៍នឹងការងារនោះទាល់តែសោះ។ ដូចនេះត្រូវបង្ហាញពីចំណាប់អារម្មណ៍របស់អ្នក តាមរយៈការសួរសំណួរឲ្យបានច្រើន។
៤) ត្រូវចាំថាអ្វីខ្លះមាននៅក្នុងប្រវត្តិរូបសង្ខេបអ្នក៖ មនុស្សមួយចំនួន មិនចងចាំថាក្នុងប្រវត្តិរូបការងារ មានដាក់អ្វីខ្លះនោះទេ។ ម្ល៉ោះហើយវាអាចធ្វើឲ្យអ្នកសម្ភាសន៍គិតថា រាល់ព័ត៌មានទាំងឡាយគឺមិនពិតនោះទេ៕
ប្រែសម្រួល៖ ព្រំ សុវណ្ណកណ្ណិកា ប្រភព៖ lifehack
