មានតំណែងជាអ្នកដឹកនាំហើយ តើអ្នកមានលក្ខណៈទាំង ៣យ៉ាងនេះ ដើម្បីឲ្យបុគ្គលិកទុកចិត្តអ្នកទេ ?
ភាពជាអ្នកដឹកនាំនាសម័យកាលឧស្សាហូបនីយកម្មបច្ចុប្បន្នខុសគ្នាដាច់ស្រឡះពីភាពជាអ្នកដឹកនាំកាលពីសម័យកាលមុន។ សម័យនេះមនុស្សភាគច្រើនទទួលបានការអប់រំខ្ពង់ខ្ពស់ មានន័យថាទំពាំងជំនាន់ក្រោយនេះគឺជាធនធានមនុស្សដែលពោរពេញទៅដោយចំណេះដឹង ជំនាញនិងសមត្ថភាពប្រាកដប្រជាប្រចាំខ្លួន។ ដូច្នេះហើយពួកគេមានជម្រើស ថាគួរប្រើប្រាស់ចំណេះដឹងរបស់ពួកគេជាប្រយោជន៍សម្រាប់ក្រុមហ៊ុនឬស្ថាប័នការងារណាមួយ។
ថ្វីត្បិតតែប្រាក់នៅតែស្ថិតជាតម្រូវការចាំបាច់ដ៏សំខាន់ដែលបុគ្គលិកម្នាក់ៗសម្លឹងមើលមុននឹងដាក់ខ្លួនបម្រើការនៅក្រុមហ៊ុនណាមួយ យ៉ាងណាមិញឥឡូវនេះអ្វីដែលពួកគេសម្លឹងផងដែរនោះគឺថា តើអ្នកដឹកនាំរបស់ក្រុមហ៊ុនមួយនោះមានលក្ខណៈនៃភាពជាអ្នកដឹកនាំបែបណា ? ហេតុនេះ បើអ្នកមានតំណែងជាអ្នកដឹកនាំហើយ តែមិនមានលក្ខណៈជាអ្នកដឹកនាំពិតប្រាកដដូចប៉ុន្មានចំណុចខាងក្រោមទេនោះ មិនយូរមិនឆាប់ផលប៉ះពាល់អវិជ្ជមាននឹងបង្ហាញខ្លួនឲ្យអ្នកឃើញជាមិនខានឡើយ។
១) កសាងទំនុកចិត្តជាមួយមនុស្សនៅជុំវិញខ្លួនអ្នក
សមិទ្ធផលអស្ចារ្យណាក៏ដោយក៏មិនអាចចៀសបានពីការដាក់ចិត្តដាក់កាយរួមសហការគ្នាឆ្ពោះទៅសម្រេចគោលដៅរួមមួយនោះដែរ។ ការសហការគ្នាដែលអាចផុសចេញពីក្រអៅបេះដូងបាន លុះត្រាណាតែសមាជិកនីមួយៗនៅក្នុងក្រុម ជាពិសេសគឺអ្នកដឹកនាំគេនេះហើយ អាចឲ្យអ្នកឯទៀតមានជំនឿទំនុកចិត្តមកលើខ្លួនជាមុន។ ប៉ុន្តែអ្នកយកអ្វីមកបញ្ជាក់ពួកគេថាអ្នកមានលក្ខណៈសម្បត្តិគ្រប់គ្រាន់ស័ក្ដិសមឲ្យពួកគេជឿទុកចិត្តបានហើយនោះ ? នោះគឺជាការផ្ដល់ការជឿទុកចិត្តចំពោះពួកគេជាមុនសិន និងបើកចំហចិត្តរបស់អ្នកឲ្យទូលាយនេះឯង។
២) ត្រូវយល់ដឹងពីរបៀបក្នុងការធ្វើទំនាក់ទំនងជាមួយអ្នកទាំងនោះ
មនុស្សដែលអាចធ្វើទំនាក់ទំនងជាមួយអ្នកដទៃបានប្រកបដោយប្រសិទ្ធភាពខ្ពស់ ដរាបណាម្នាក់នោះយល់ពីគោលបំណងជាអ្វីដែលដៃគូពិភាក្សារបស់ខ្លួនចង់បានពិតប្រាកដ និងយល់ពីចិត្តគំនិតរបស់ពួកគេ។ ដោយការព្យាយាមស្វែងយល់ពីអ្នកដទៃ នោះអ្នកនឹងអាចដឹងថាតើគួរប្រាស្រ័យជាមួយម្នាក់នេះរបៀបណា ហើយម្នាក់នោះវិញរបៀបណា ? ម្យ៉ាងទៀតវាក៏ជាសមត្ថភាពក្នុងការអាចកត់សម្គាល់បានពីចំណុចខ្លាំងរបស់បុគ្គលម្នាក់ៗ ដើម្បីអាចឲ្យម្នាក់ៗធ្វើការទៅតាមចំណុចខ្លាំងរបស់ខ្លួន នោះការសហការនឹងនាំមកនូវភាពជោគជ័យមិនខាន។
៣) ផ្ដល់ការអភិវឌ្ឍន៍ដល់បុគ្គលិកជានិច្ច
អ្នកដឹកនាំដ៏ល្អមួយរូប មិនមែនធ្វើខ្លួនដូចជាទឹកទន្លេដែលមិនបង្ហូរចេញចែកចាយទឹកទៅកាន់ប្រភពទឹកផ្សេងៗទៀត រហូតទាល់តែប្រភពទឹកខ្លួនឯងយូរៗទៅឡើងល្អក់កករនោះទេ។ ពួកគេត្រូវតែចេះចែកចាយបង្ហូរចេញទៅឲ្យប្រភពទឹកផ្សេងៗទៀត ដើម្បីប្រយោជន៍ប្រភពទឹកផ្សេងហើយក៏ដើម្បីខ្លួនឯងដែរ។ ប៉ុន្តែដើម្បីបណ្ដុះបណ្ដាលអ្នកដទៃបាន អ្នកមិនត្រូវភ្លេចអភិវឌ្ឍខ្លួនឯងជានិច្ចកាលនោះទេ ព្រោះគឺអ្នកនេះហើយដែលជាតួអង្គដ៏សំខាន់ក្នុងការជំរុញបុគ្គលិកទាំងអស់ឲ្យមានឱកាសពង្រីកសមត្ថភាពខ្លួនកាន់តែខ្ពស់ឡើងបាន៕
ប្រែសម្រួល៖ ស្រីពៅ ប្រភព៖ lifehack
