គន្លឹះសម្រាប់អ្នក ដែលចង់ក្លាយជាមេធាវីដ៏ពូកែមួយរូប
តួនាទីរបស់មេធាវីគឺជួយណែនាំបង្ហាញផ្លូវអំពីច្បាប់ឬតវ៉ាក្តីឲ្យកូនក្តីដោយមានជំនាញនិងភាពប៉ិនប្រសប់។ ដូច្នេះហើយ ចង់ក្លាយទៅជាមេធាវីពូកែម្នាក់មិនមែនជារឿងងាយនោះឡើយ ពោលគឺត្រូវឆ្លងកាត់ការរៀនសូត្រ និង ស្រាវជ្រាវយូរឆ្នាំ។ ខាងក្រោមនេះ ជាគន្លឹះដែលជួយអ្នកឲ្យក្លាយជាមេធាវីដ៏ឆ្នើមម្នាក់៖
១) ដឹងច្បាស់អំពីច្បាប់៖ អ្នកត្រូវតាមឲ្យទាន់អំពីច្បាប់ពីព្រោះថាមានច្បាប់ថ្មីៗបានបង្កើតឡើងឬត្រូវបានផ្លាស់ប្តូរ។ ប្រសិនជាអ្នកតាមមិនទាន់ទេ វាអាចប៉ះពាល់ដល់សមត្ថភាពក្នុងការតវ៉ារឿងក្តីរបស់អ្នក។
២) ធ្វើការស្រាវជ្រាវជាប្រចាំ៖ ប្រសិនជាអ្នកទទួលបានរឿងក្តីដែលអ្នកពុំធ្លាប់ធ្វើពីមុនមក អ្នកគួរតែចំណាយពេលខ្លះក្នុងការស្រាវជ្រាវនិងសិក្សាពីច្បាប់ឬរឿងក្តីនោះ។ កុំគិតថាអ្នកដឹងអ្វីរឿងយ៉ាងទោះបីជាអ្នកធ្វើជាមេធាវីរាប់ឆ្នាំក៏ដោយ។
៣) បង្កើនសមត្ថភាពការគិតត្រឹះរិះរបស់អ្នក៖ ដើម្បីក្លាយជាមេធាវីដ៏ពូកែម្នាក់ អ្នកត្រូវមានសមត្ថភាពមើលរឿងក្តីបានគ្រប់ជ្រុងដើម្បីរកដំណោះស្រាយបានល្អ។ ការវិភាគបានជ្រៅក៏ជួយអ្នកដឹងពីបញ្ហា ដែលជាលទ្ធផល អ្នកអាចរកដំណោះស្រាយឬរកហេតុផលមកគ្រាំទ្រក្នុងការជជែកវែកញែកក្នុងរឿងក្តីរបស់អ្នក។
៤) បង្កើនសមត្ថភាពនិយាយ៖ មេធាវីដែលជោគជ័យសុទ្ធតែពូកែខាងការសន្ទនា។ ពួកគាត់ត្រូវមានសមត្ថភាពក្នុងការពិពណ៌នារឿងក្តីរបស់កូនក្តីរបស់ពួកគាត់ឲ្យបានក្បោះក្បាយទៅកាន់តុលាការ សួរសំណួរទៅកាន់សាក្សី តវ៉ាជាមួយគណៈវិនិច្ឆ័យ។ល។
៥) រកមេធាវីដែលមានបទពិសោធន៍ជាងអ្នកដើម្បីពិគ្រោះយោបល់៖ មិនថាអ្នកមានបទពិសោធន៍ប៉ុន្មានឆ្នាំនោះទេ អ្នកគួរតែរកមេធាវីណាម្នាក់ដែលមានបទពិសោធន៍ច្រើនជាងអ្នកដើម្បីពិភាក្សាឬដោះដូរគំនិត។ នេះជាឱកាសដែលអ្នកអាចពង្រឹងសមត្ថភាពក្នុងការតវ៉ាក្តីរបស់អ្នក៕
ប្រែសម្រួល៖ អុឹង មុយយូ
