តើគួរធ្វើយ៉ាងណាដើម្បីជួយដោះស្រាយជម្លោះ នៅកន្លែងការងារ?
នៅទីកន្លែងការងារ អ្នកមិនអាចគេចផុតពីការឈ្លោះទាស់ទែងគ្នាបានឡើយ អ្នកអាចជួបមនុស្សដែលតែងតែបង្កជម្លោះ ឲ្យកើតមានឡើងគ្រប់ពេលវេលា។ ហេតុនេះ ដើម្បីបំបាត់បញ្ហាឬជម្លោះដែលកើតមានឡើងក្នុងក្រុមហ៊ុន អ្នកគួរសាកល្បងអនុវត្តតាមវិធីខាងក្រោម៖
១) លួងលោមម្ខាងៗ សិន កុំឲ្យក្ដៅកាន់តែខ្លាំង៖ ពេលមនុស្សកំពុងតែខឹង ពួកគេត្រូវការទឹកដើម្បីមកពន្លត់។ ហើយទឹកនោះគឺជាសម្ដីត្រជាក់របស់អ្នក ដោយសម្ដីទាំងនោះគប្បីលាយឡំនឹងពាក្យយល់ចិត្ត លួងលោម និងនិយាយកាន់ជើងគេសិន។ ពេលដែលគេត្រជាក់ចិត្ត គេនឹងមានអារម្មណ៍ថាអ្នកជាមនុស្សយល់ពីអ្វីដែលគេចង់និយាយ នោះជម្លោះនឹងមិនវែងឆ្ងាយទៀតឡើយ។
២) បើកឲ្យគេនិយាយអ្វីដែលគេចង់៖ មិនថាគេនិយាយខុសឬត្រូវ សំខាន់អ្នកត្រូវបើកឱកាសឲ្យគេបាននិយាយខ្លះ ព្រោះអីគេអាចនិយាយពីអ្វីដែលអ្នកមិនបានដឹងក៏ថាបាន។ មិនថាគំនិតនោះវាអាក្រក់ ឬល្អប៉ុណ្ណាទេ ឲ្យតែអ្នកបានស្ដាប់ គេក៏អស់ចិត្តដែរ។
៣) ផ្ដល់គម្លាតរវាងគ្នានឹងគ្នា៖ បន្ទាប់ពីនិយាយគ្នារួចរាល់ អ្នកដែលមានជម្លោះគួរតែផ្ដល់គម្លាតដល់គ្នា ដើម្បីសម្រួលអារម្មណ៍ឡើងវិញ។ ពេលខ្លះ កំហឹងអាចបង្ខំមនុស្សឲ្យនិយាយពាក្យដែលមិនគួរនិយាយក៏ថាបាន។
៤) ឲ្យពួកគេរៀនកែប្រែទម្លាប់មិនល្អតាមផ្លូវរបស់គេ៖ បន្ទាប់ពីមានជម្លោះកើតឡើង ពួកគេនឹងដឹងថាជម្លោះនោះកើតមកពីអ្វី ហើយតើគួរធ្វើយ៉ាងណាទើបកុំឲ្យវាកើតមានឡើងសារជាថ្មី? ការផ្ដល់ពេលវេលាឲ្យពួកគេបានកែប្រែខ្លួនឯង គឺជាវិធីដ៏សំខាន់មួយ ដើម្បីលុបបំបាត់ជម្លោះនៅកន្លែងធ្វើការ៕
អត្ថបទល្អៗផ្សេងទៀត៖ បើរៀនខាងទីផ្សារ តើចប់ហើយអ្នកគួរធ្វើការផ្នែកអ្វី? ការងារ៧ប្រភេទដែលស័ក្ដិសមបំផុតសម្រាប់អ្នកមិនចូលចិត្តនិយាយស្ដី ឬ អៀនប្រៀនច្រើន ប្រើតិកនិកទាំងនេះ ដើម្បីកែទម្លាប់កម្ជិលរបស់អ្នកចេញចាប់ពីពេលនេះ
ប្រែសម្រួល៖ ព្រំ សុវណ្ណកណ្ណិកា ប្រភព៖ entrepreneur
