គន្លឹះសំខាន់ៗ ដើម្បីអាចផ្ដោតលើភាពវិជ្ជមាន ទោះជួបរឿងអាក្រក់ប៉ុណ្ណាក៏ដោយ
ការគិតវិជ្ជមានគឺជាអារម្មណ៍ផ្នែកស្មារតីនិងផ្លូវចិត្តដែលគិតនិងរំពឹងទុកអ្វីដែលល្អៗ។ ការកសាងឥរិយាបថវិជ្ជមាន (Positive attitude) គឺលើសពីការគិតវិជ្ជមានទៅទៀត។ ភាពសុទិដ្ឋិនិយមមិនមែនជាការគេចវេសពីភាពអវិជ្ជមាននោះទេ វាជាការទទួលស្គាល់ភាពអវិជ្ជមាន ហើយអ្នកផ្តោតទៅលើភាពវិជ្ជមានវិញ។ ភាពវិជ្ជមានគឺជាការគិត«មិនថាស្ថានភាពអាក្រក់បែបណា អ្វីៗនឹងប្រសើរឡើងនាពេលទីបញ្ចប់។» ខាងក្រោមនេះជាគន្លឹះដែលជួយអ្នកឲ្យមានភាពវិជ្ជមានឡើងវិញ៖
១) សើចឬញញឹម៖ ដោយគ្រាន់តែសើចទៅកាន់អ្នកដទៃ អ្នកក៏មានអារម្មណ៍ល្អឡើងវិញដែរ។ ការធ្វើល្អដាក់អ្នកដទៃមិនត្រឹមតែមានអារម្មណ៍ល្អនោះទេ ថែមទាំងមានទំនុកចិត្តជាងមុនទៀតផង។
២) ដឹងគុណ៖ ការកត់សម្គាល់និងដឹងគុណពីភាពវិជ្ជមានដែលកើតឡើងក្នុងជីវិតក៏ជួយឲ្យស្មារតីរបស់អ្នកល្អជាងមុនផងដែរ។
៣) សម្រាក៖ ការហត់នឿយគឺជាឃាតករលាក់មុខដែលសម្លាប់ភាពវិជ្ជមាន។ អ្នកគួរសម្រាកខ្លះនៅពេលដែលអ្វីៗដំណើរមិនសូវល្អ។ ក្រោយអ្នកសម្រាកហើយ អ្នកនឹងមានកម្លាំងទាំងផ្នែករាងកាយនិងស្មារតីក្នុងការជម្នះនូវបញ្ហាផ្សេងៗ។
៤) នៅជាមួយមនុស្សវិជ្ជមាន៖ តាមការសិក្សារកឃើញថា ការស្រ្តេសគឺជាជំងឺឆ្លង ដូច្នេះហើយប្រសិនជាអ្នកនៅជាមួយមនុស្សប្រភេទនេះច្រើន អ្នកនឹងក្លាយជាមនុស្សអវិជ្ជមាន។ ភាពរីករាយក៏ដូចគ្នាដែរ។ មនុស្សវិជ្ជមាននៅជុំវិញអ្នកនឹងជះឥទ្ធិពលដល់ការគិតរបស់អ្នក។ ដូច្នេះហើយ អ្នកត្រូវរៀនចេះសេពគប់មនុស្សឲ្យបានស្រួលប្រួល៕
ប្រែសម្រួល៖អុឹង មុយយូ ប្រភព៖ www.lifehack.org
