ចំណុចពិសេស ៤យ៉ាង នៃវប្បធម៌នៃការធ្វើជំនួញរបស់ជនជាតិជប៉ុន ដែលអ្នកគួររៀនសូត្រ
បិតាស្ថាបនិកសិង្ហបុរីបានពោលដូច្នេះថា៖ "បណ្ដុះវិន័យឲ្យមាននៅក្នុងខ្លួនសិន ទើបអាចឈានទៅដល់គោលដៅនៃក្ដីសុបិនបាន"។ ការប្រតិបត្តិដោយវិន័យគឺជាការយកឈ្នះលើខ្លួនឯង ជាមួយនឹងការហាត់ពត់លត់ដំចិត្តគំនិតរបស់ខ្លួនជាប្រចាំទៅរកសុភវិនិច្ឆ័យដ៏ត្រឹមត្រូវនិងវិជ្ជមាន នោះវានឹងបង្កជាទម្លាប់ល្អ ដែលប្រៀបបានទៅនឹងគោលការណ៍ដ៏រឹងមាំរបស់ជីវិតសម្រាប់ឆ្លើយតបទៅកាន់ស្ថានការណ៍ផ្សេងៗទាំងឡាយ។
តួយ៉ាងជនជាតិជប៉ុនតែងត្រូវបានគេលើកសរសើរចំពោះសមិទ្ធផលនៃផ្នែកផ្សេងៗដែលដើរទន្ទឹមគ្នា ជំរុញភាពរុងរឿងរបស់ប្រទេសទាំងមូល។ ក្នុងនោះចំណុចដែលគួរជាទីកត់សម្គាល់និងលើកសរសើរមួយនោះគឺ វប្បធម៌នៃការធ្វើជំនួញរបស់ជាតិសាសន៍ជប៉ុន ដែលសុទ្ធតែមានឫសគល់ចេញពីជោគជ័យក្នុងការបណ្ដុះនូវទម្លាប់ល្អៗទាំងអស់។ តើវប្បធម៌នៃការធ្វើជំនួញរបស់ជប៉ុនមានលក្ខណៈសំខាន់ៗដូចម្ដេចខ្លះ ដែលសហគ្រិនគ្រប់រូបអាចរៀនសូត្រធ្វើជាគំរូបាន?
១) បើជនជាតិជប៉ុនណាម្នាក់អះអាងថាខ្លួនអាចបំពេញការងារនោះរួចរាល់បាន នោះពួកគេនឹងធ្វើវាបានមែន
ពួកគេនឹងមិនអះអាងទទួលយកការងារណាដែលដឹងច្បាស់ថាហួសពីសមត្ថភាពខ្លួនឯងនោះទេ ដែលជាការបង្ហាញឲ្យឃើញពីការណ៍ដែលពួកគេយកគុណតម្លៃនៃការបំពេញតាមពាក្យសម្ដីរបស់ខ្លួនជាការទទួលខុសត្រូវដ៏សំខាន់របស់ខ្លួន។ បុគ្គលិករបស់ពួកគេព្យាយាមយល់ឲ្យច្បាស់អំពីភារកិច្ចរបស់ខ្លួនដែលត្រូវបំពេញក្នុងការងារណាមួយ និងប្រសិនបើការអនុវត្តមិនប្រព្រឹត្តទៅតាមគម្រោងការដែលបានកំណត់ទុក នោះគឺបុគ្គលិកខ្លួនឯងជាអ្នកទទួលខុសត្រូវចំពោះលទ្ធផលរបស់ខ្លួន។
២) ក្នុងទស្សនរបស់ជនជាតិជប៉ុន អតិថិជនពួកគេគឺជាព្រះជាម្ចាស់
អ្នកធ្វើជំនួញភាគច្រើនតែងនិយាយដូចគ្នាដូច្នេះថា បម្រើអតិថិជនឲ្យដូចជាស្ដេច។ យ៉ាងណាមិញ ជនជាតិជប៉ុនធ្វើលើសពីអ្វីដែលជាការសំណូមពររបស់អតិថិជនទៅទៀត ជាហេតុនាំមកនូវការពេញចិត្តដល់អតិថិជន ព្រមទាំងបង្កើតនូវចំណងទំនាក់ទំនងយ៉ាងគាប់ប្រសើរចំពោះគ្នាទៅវិញទៅមកទៀតផង។
៣) ការពន្យារពេលក្នុងការសម្រេចចិត្ត មិនមែនជាការឆ្លុះបញ្ចាំងពីអប្រសិទ្ធភាពរបស់ពួកគេនោះទេ
ដំណើរការណ៍នៃការសម្រេចចិត្តចំពោះផែនការណាមួយ សម្រាប់ជនជាតិជប៉ុន វាជាការសម្រេចចិត្តប្រកបដោយការគិតគូរល្អិតល្អន់ ព្យាយាមប្រមូលយកទិន្នន័យឲ្យបានសព្វគ្រប់ជ្រុងជ្រោយមុននឹងឈានដល់ការសម្រេចពិតប្រាកដ។ សម្រាប់សហគ្រិនពួកខាងលិចដែលមានទម្លាប់សម្រេចកិច្ចការអ្វីមួយភ្លាមៗ រហ័សរហួន អាចនឹងយល់ថាវាជាវិធីប្រតិបត្តិបែបអន្ទង់វែងឆ្នាំងវែង និងគ្មានប្រសិទ្ធភាព ផ្ទុយទៅវិញវាជាការបង្ហាញឲ្យឃើញនូវការឲ្យតម្លៃទៅលើគុណភាពខ្ពស់ចំពោះកិច្ចការរបស់ពួកគេទៅវិញទេ។
៤) ការផឹកស្រាជាមួយមិត្តរួមការងារត្រូវបានចាត់ទុកជាផ្នែកមួយនៃការងារ
ការផឹកស្រានឹងបណ្ដាលឲ្យពួកគេបន្ធូរអារម្មណ៍ស្មុគស្មាញរបស់ខ្លួន រួចក៏និយាយរឿងរ៉ាវក្នុងចិត្តពិតប្រាកដប្រាប់គ្នាទៅវិញទៅមក។ ការផឹកស្រាដែលត្រូវបានជនជាតិជប៉ុនចាត់ទុកថាជាផ្នែកមួយនៃការងារនេះទៀតសោត ក៏មិនមែនផឹកតែជាមួយមិត្តរួមការងារស្និទ្ធស្នាលបំផុតនោះដែរ សូម្បីតែអ្នកឋានៈតូចទាបក្ដី ក៏ព្រោះតែវាជាការរឹតបន្តឹងនូវទំនាក់ទំនងរបស់ពួកគេឲ្យកាន់តែស្និទ្ធស្នាលនោះឯង៕
ប្រែសម្រួល៖ ស្រីពៅ
ប្រភព៖ japantoday
