អនុវត្តទម្លាប់ទាំង៤យ៉ាង ដើម្បីជួយសម្រួលដល់បញ្ហាផ្លូវចិត្តរបស់អ្នក
អ្នកខ្លះមានបញ្ហាផ្លូវចិត្តដូចជា ភាពភ័យខ្លាច ភាពអស់សង្ឃឹម ភាពយល់ច្រឡំ។ល។ ឯអ្នកខ្លះទៀតក៏មានបញ្ហាផ្លូវចិត្តដោយសារតែគិតពីអ្នកដទៃខ្លាំងពេក។ វាពិតជាមានសារៈសំខាន់ណាស់ដែលយើងត្រូវយល់ដឹងពីបញ្ហានេះ ហើយព្យាយាមស្វែងរកដំណោះស្រាយ។ ទោះបីជាបញ្ហាផ្លូវចិត្តមិនអាចព្យាបាលបានទាំងស្រុង ទម្លាប់ខាងក្រោមនេះអាចជួយដល់បញ្ហាផ្លូវចិត្តបាន៖
១) ផ្ទះដែលគ្មានអំពើហិង្សា ឬបញ្ហាស្មុគស្មាញ៖ ការរស់នៅក្នុងស្ថានភាពដែលពោរពេញទៅដោយការឈ្លោះគ្នា វ៉ៃគ្នា បំពានគ្នាបណ្ដាលឲ្យបញ្ហាផ្លូវចិត្តកើតមានឡើង។ យូរៗទៅ បញ្ហាផ្លូវចិត្តនឹងកាន់តែធ្ងន់ធ្ងរ។ ប្រសិនជាអ្នករស់នៅស្ថានភាពបែបនេះ អ្នកគួរតែរកវិធីចាកចេញមួយរយៈ ដើម្បីស្វែងរកកន្លែងស្ងប់ស្ងាត់។
២) អាហារូបត្ថម្ភ៖ អាហារូបត្ថម្ភមិនមែនជាអ្វីដែលមនុស្សនឹកឃើញមុនគេនោះទេពេលនិយាយពីបញ្ហាផ្លូវចិត្ត។ តែ អាហារូបត្ថម្ភពិតជាមានការទាក់ទង ពីព្រោះថាប្រសិនជាអ្នកមិនបានទទួលអាហារូបត្ថម្ភល្អឬគ្រប់គ្រាន់នោះទេ វាប៉ះពាល់ដល់សុខភាពរាងកាយ បន្ទាប់មកបញ្ហាផ្លូវចិត្តដោយសារតែមិនបានធ្វើការឬគិតថាខ្លួនឯងគ្មានប្រយោជន៍។
៣) គេងឲ្យបានគ្រប់គ្រាន់៖ វាពិតជាសំខាន់ដែលអ្នកគេងយ៉ាងហោចណាស់៧ទៅ៩ម៉ោង។ ការគេងបានគ្រប់គ្រាន់ក៏ជួយដល់ការព្យាបាលបញ្ហាផ្លូវចិត្តឲ្យឆាប់ជាផងដែរ។
៤) សុខភាពផ្លូវកាយ៖ សុខភាពផ្លូវកាយពិតជាទាក់ទងដល់សុខភាពផ្លូវចិត្តដោយសារតែសុខភាពផ្លូវកាយមានការជះឥទ្ធិពលទៅដល់សុខភាពផ្លូវចិត្ត។ ឧទាហរណ៍ថា៖ អ្នកឧស្សាហឈឺក្បាល វាជះឥទ្ធិពលដល់ស្ត្រេសឬសមត្ថភាពក្នុងការដោះស្រាយបញ្ហានានា ជាលទ្ធផល អ្នកចាប់ផ្តើមធុញថប់ បញ្ហាផ្លូវចិត្តក៏កើតមានឡើង៕
ប្រែសម្រួល៖ អ៊ឹង មុយយូ
ប្រភព៖ www.powerofpositivity.com
