មានឆ្ងល់ទេ ហេតុអ្វីថ្នាក់លើមិនអាចឃាត់បុគ្គលិកពូកែៗក្នុងក្រុមហ៊ុនឲ្យធ្វើការបានយូរ?
តើវាគួរឲ្យសោកស្ដាយប៉ុណ្ណាទៅ ដែលអ្នកមិនអាចឃាត់ បុគ្គលិកល្អ ៗ ឲ្យចាកចេញពីក្រុមហ៊ុនអ្នកបាន? វាហាក់ដូចជាខាតបង់ធំណាស់ ដែលអ្នកប្រលែងពួកគេឲ្យចេញពីទ្រនំ រួមគ្នា របស់អ្នក។ តើមានមូលហេតុអ្វីទៅ ទើបពួកគេសម្រេចចិត្តចេញ?
១) គេទទួលបានការងារច្រើនពេក៖ ជាការពិតណាស់ ពួកគេនឹងមិនអាចទ្រាំទ្របានឡើយ ប្រសិនបើការងារវាច្រើនលើសការរំពឹងទុកពេក។ ពួកគេមានអារម្មណ៍ថា ពួកគេដូចជាទទួលការពិន័យសម្រាប់ ការបំពេញការងារដ៏ល្អរបស់ពួកគេអញ្ចឹង ម្ល៉ោះហើយ ទើបគេជ្រើសរើសការចាកចេញ។
២) ថៅកែមិនដែលមើលឃើញការខិតខំ និងមិនដែលផ្ដល់រង្វាន់៖ ធ្វើជាថៅកែល្អមួយ អ្នកគួរតែដឹងថាតើបុគ្គលិកមួយណា បានធ្វើអ្វីខ្លះ និងបានសម្រេចអ្វីហើយ។ ជាពិសេស ពេលអ្នកមើលឃើញ អ្នកគួរតែផ្ដល់ជារង្វាន់លើកទឹកចិត្ត ដល់កិច្ចខំប្រឹងប្រែងរបស់ពួកគេផង។
៣) ថៅកែមិនខ្វល់ពីបុគ្គលិក៖ មនុស្យសឹងតែពាក់កណ្ដាលទៅហើយ ដែលលាចេញពីការងារគឺដោយសារតែឈ្លោះគ្នាជាមួយថៅកែ។ វាហាក់ដូចជាពិបាកណាស់សម្រាប់បុគ្គលិក ដែលចំណាយពេល៨ម៉ោងក្នុងមួយថ្ងៃទៅធ្វើការជាមួយ ថៅកែដែលមិន នៅជាមួយ និងមិនខ្វាយខ្វល់ពីអ្នកបែបនេះ។
៤) ដំឡើងតំណែងឲ្យមនុស្សខុស៖ បុគ្គលិកល្អ តែងចង់បានមេ ដែលជាមនុស្សត្រឹមត្រូវ ឲ្យតម្លៃអ្នកខំធ្វើការ និងមិនលំអៀង។ វាហាក់ដូចជាមើលងាយ បុគ្គលិកល្អរបស់ខ្លួនណាស់ ដែលថៅកែមិនដំឡើង តំណែងឲ្យពួកគេ តែបែរជាដំឡើងអ្នកផ្សេងដែលមិនប្រឹងប្រែងធ្វើការសូម្បីបន្តិច។ ដូចនេះ តើអ្នកណាទ្រាំនៅតទៀតបាន?
ប្រែសម្រួល៖ ព្រំ សុវណ្ណកណ្ណិកា ប្រភព៖ entrepreneur
